Notísia foun


Timor Post (08/04/2021)—Ohin, governu liuhusi Ministériu Saúde (MS) hahú halo distribuisaun vasina ho marka AtraZeneca ba munisípiu neen inklui Baukau, LautemLikisá, Bobonaro, Ainaro ho Kovalima.

Tuir planu, munisípiu sira seluk sei hala’o distribuisaun iha loron 09/04/2021.

Ministra Saúde (MS) Odete Maria Freitas Belo ho Vise-Ministru Saúde (VMS) Bonifácio Mau Coli dos Reis hala’o lansamentu nee iha iha edifísiu SAMES, Kampung Alor, Dili.

Ministra Odete iha nia intervensaun subliña, vasina ne’e asaun ida ikus nian ba prevensaun Covid-19.

“Hakarak atu alerta no apela nafatin katak, prevensaun importante sei hala’o nafatin mak ita presizamente uza ita-nia maskara ne’ebé mak iha. Asegura katak ita-nia liman sempre moos nafatin antes atu haan, minimiza ita-nia agrupamentu ne’e ha’u hanoin sei fó vantajen di’ak ba ita hodi hadook ita husi moras ida-ne’e no distansia sosiál ne’e importante tebtebes,” Odete salienta.

Odete la dúvida ho kualidade vasina AtraZeneca tanba  iha mundu nasaun barak mak uza no iha Timor iha esperiénsia boot halo distribuisaun ai-moruk malirin nian. Entaun vasina ba Covid-19 laiha diferénsia ho vasina sira seluk ne’ebé mak durante ne’e halo hela distribuisaun ne’ebé tau iha temperatura rua (2) to’o ualu (8) grau selsíus (2-8 OC).

Partisípa iha serimónia distribuisaun mak reprezentante husi Organizasaun Mundiál Saúde, Unicef, DIFAT, Diretóra Jerál Prestasaun Saúde (DGPS) Odete da Silva Viegas, Diretór Ezekutivu SAMES Santana Martins no sira seluk.

Hafoin importasaun vasina AtraZeneca iha Timor Leste, loron hirak liu ba Primeiru Ministru Taur Matan Ruak ho membru governu sira no Prezidente Parlamentu Nasionál Aniceto Guterres ho deputadu balun ho Líder Nasionál José Ramos Horta no Komandante PNTL halo ona vasina. (cao)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 72
  • Page views today : 81
  • Total visitors : 240,249
  • Total page view: 346,571