Notísia foun


Timor Post (24/03/2021)—Kazu grupu organinzadu halo torturasaun ba joven na’in-2 ne’ebé na’in-1 tattoo iha kakorok “Antí PNTL, F-FDTL ho BOP”, mosu uluk kazu atake no baku rahun uma no sasan inklui motor ida iha Aitarak-Laran, Dili.

Kazu dahuluk atake ba rezidénsia inisiál AC, husi parte ne’e fó hatene ona ba polísia hodi halo atuasaun, maibé tanba liu ona semana laiha asaun ruma maka mosu grupu organizadu ne’ebé ikus mai polísia identifika liuhusi rekolla evidénsia deskonfia pretense ba grupu arte-marsiál Ikatan Kera Sakti (IKS), buka tuir joven na’in-2 hodi halo torturasaun molok entrega ba polísia liuhusi Batallaun Órden Públika (BOP).

“Iha semana kotuk, labarik mane na’in-2 ne’e mak mai serang uluk uma ne’e, ami mos telefone polísia, hein too semana ida la kaer, entaun sira tun rasik hodi ba baku joven na’in-2 ne’e,” sasin ida ne’ebé lakohi fó sai nia identidade ba Timor Post iha rezidénsia AC, bainhira jornalista sira akompaña polísia ba hala’o mandadu detensaun no rekolla evidénsia sira iha terrenu.

Bazeia ba mandadu detensaun tribunál ho númeru prosesu 0177/21 DICMR, kazu tortura joven na’in-2 ho inisiál AC (inisiál hanesan ho kazu dahuluk) no AB, tersa (23/03/2021), polósia halo buska ba arguidu sira nia rezidénsia konsege prende sasan arte marsiál inklui farda IKS, Katana-2 no gás lacrimogêneo (gas air mata.

Observasaun Timor Post haktuir, polísia investigasaun hahú tama iha aldeia Beto Tasi, Suku Komoro ba iha fatin ka uma kiik ida ne’ebé arguidu na’in-7 lori joven na’in-2 ba baku. Iha ne’eba konsege identifika fatin ida ne’ebé arguidu sira uza lori adora foto na’in ba organizasaun arte marsiál IKS.

Hosi nee, iha fatin hanesan kuandu polísia kontinua pasa revista buska ba arguidu JG no JN nia uma, konsege hetan katana rua no atributu arte marsiál nian.

Polísia tama fali iha aldeia Naroman, Aninfuik no Fomento iha arguidu AS, MS no AD lahetan evidénsia. No ba fali aldeia 10 de Outobru Tasi Tolu iha arguidu MR nia uma hetan gás lacrimogêneo ida, ikus iha Aldeia Aitarak laran arguidu AC nia rezidénsia ne’ebé hetan uluk atake husi joven na’in-2 la hetan evidénsia.

Ba Jornalista sira Komandante PNTL, Komandu Munisípiu Dili, Superintendente Xefe Polísia, Hendrique da Costa, subliña, nia parte konsege halo ona investigasaun ba arguidu na’in-7.

Sira sei kumpre mandadu detensaun durante oras 72 nian laran iha sela Polísia Komandu Dili, no lori ba tribunál hodi halo julgamentu, no tribunál mak sei deside.

Kazu ne’e akontes iha loron 21 fulan Marsu 2021, tuku 14:30 mosu insedente sekoestru no raptu ne’ebé komete hosi suspeitu na’in-7 ho nia sirkuntansia sira hanesan suspeitu sira halo detensaun ilegal, transfere no halo torturasaun ba joven na’in-2.

Iha momentu kuandu suspeitu na’in hitu, halo transaksaun ilegal no halo torturasaun hasoru lezada na’in rua, sira halo gravasaun no asaun tau iha media sosial, ho intensaun ema barak konsumu nomos fo oportunidade ba ema seluk hosi sira nia grupu hodi prepara atu prepara halo asaun foun,” deklara komandante liu hosi preskonfrens.

Arguidu na’in hitu, ho naran inisiala, DDJ, AS, JG, JODC, CM, ALB, DC, no MS.

No atendementu polísia nian hahú iha loron 22/03, liu hosi koordenasaun entre seksaun investigasaun kriminal no komandu munisípiu Dili nomos xefe infomasaun PNTL no Ministériu Públiku ne’ebé konsege sobu suspeitu na’in 7,  ne’ebé sei submete iha investigasaun tribunál liu hosi prosesu primeiru interogatoriu.

Entretantu ba joven na’in-2 ne’ebé antes ne’e kumpri mós sela detensaun livre ona konsideradu vítima, maibé depois prosesu investigasaun la’o ba suspitu na’in 7, joven na’in-2 mos sei kumpri justisa nu’udar suspeitu ba kazu danu antes sira komete.

Jornalista Cesaltina Guterres

Editór Noémio Falcão

Please follow and like us:

NOTÍSIA FOUN

Site Statistics

  • Users online: 1 
  • Visitors today : 77
  • Page views today : 86
  • Total visitors : 240,254
  • Total page view: 346,576