Notísia foun


Timor Post (19/03/2021)—Defeza husi arguidu ba kazu pedofilia Eis Padre Amerikanu Richard Dasbach informa, julgamentu adia ba loron 24 to’o 28 Maiu 2021, oras tuku 09:00 iha Tribunál Distrital Oekusi.

Advogadu Dr. Miguél Faria ba Timor Post hatete, nia parte simu de’it informasaun husi tribunál kona-ba data adiamentu maibé la fó justifikasaun ruma kona-ba mudansa data julgamentu ne’ebé antes ne’e deside ba loron 23 Marsu 2021.

Maske nune’e Dr. Miguel hatete, parese tribunál halo adiamentu ne’e liga ho situasaun surtu COVID-19, iha ne’ebé Dili tama hela iha serka sanitária no operasaun ró-ahi ba Oekusi paradu.

Tribunál Distritál Oekusi hala’o ona julgamentu dahuluk ba kazu ne’e iha iha loron Tersa 22-23 Fevereiru liu ba hodi prova faktu sira husi arguidu, no julgamentu tuir mai sei prova faktu sira husi vítima no sasin sira.

Entretantu iha loron Kinta (11/03/2021) maizumenus oras tuku 11 dader iha Topu Honis Kutet, labarik sira halai namkari bainhira haree hetan membru polísia na’in-4 husi komandu Rejiaun Autónomu Espesiál Oekusi Ambeno (RAEOA) hala’o vizita ho órden Ministériu Públiku nian.

Informasaun ne’ebé Timor Post asesu haktuir, membru polísia na’in-4 ne’e ba Topu Honis tuir mandatu husi Ministériu Públiku atu haree labarik sira nia situasaun.

Maske nune’e, Diretora Orfonatu Topu Honis mós hakfodak ho prezensa membru polísia sira halo labarik sira halai namkari.

Labarik sira haree polísia sira trauma tanba uluk sira hetan visum obrigatóriu.

Liliana Tarung rekoñese membru polísia na’in-4 ne’e kompostu husi feto rua – mane rua maka hala’o vizita ba ho farda kompletu sein armas. Nia dehan koñese de’it membru na’in rua husi sira na’in haat.

“Bainhira kareta polísia nian foin maka to’o portaun oin ne’e, labarik sira halai hotu tuir portaun kotuk nian,” Liliana haktuir.

Nia dehan, konsege konversa duni ho membru polísia sira hodi fó mós informasaun katak durante ne’e labarik ho inan faluk sira iha orfonatu moris hakmatek hela. Maibé labarik sira maka trauma ho polísia.

Entretantu Defeza husi Eis Padre Richard Dasbach nu’udar arguidu ba kazu pedofilia ka halo violasaun seksuál hasoru labarik sira iha orfonatu Topu Honis, Advigadu Dr. Miguel Faria, rona informasaun ne’e subliña, normalmente Ministériu Públiku ka Defeza ba arguidu sira maka la hetan ona konfiansa ka la kopera husi kliente sira ne’e presiza halo avaliasaun.

“Hanesan advogadu mos ami nia kliente la fiar ona ami, ami ko’alia ho nia maka nia fila kotuk ona, ne’e ami presiza halo avaliasaun ba ami nia servisu. Nune’e mós hanesan Ministériu Públiku, nia ba bolu labarik mak labarik sira hala’I lakon hotu ne’e presiza halo avaliasaun ba nia akujasaun,” Advogadu Miguel Faria subliña ba Timor Post.

Kona-ba Richard Dascbach, moris iha loron 26 Janeiru 1937 iha Pennsylvanian, Estadus Unidu Amérika (EUA) lori misaun evanjelizasaun Katólika tama iha Oekusi iha tinan 1972.

Nia ordena sai padre iha tinan 1965, no liu tinan rua de’it, nia mai ona Nusa Tenggara Timur (NTT) no ikus liu tama ba Ambeno iha tinan 1972.

Invazaun Indonézia mai Timor-Leste, nia hela iha Oekusi to’o tinan 1999 no konsege subar joven lubuk ida hosi atakasaun pro-integrasionista.

Durante hala’o misaun evanjelizasaun, nia harii uma mahon ida ho naran Topu-Honis (Guide To Life) iha tinan 1993 ho objetivu atu fó mahon ba labarik kbi’it la’ek sira.

Richard akuzadu ho kazu pedofilia ka halo abuzu seksuál hasoru labarik minoridade.

Entretantu antes ne’e, Arsebispu Metropolitana Dili, Don Virgílio do Carmo da Silva, SDB, lihosi konferénsia imprensa iha Cámara Eclesiástica, Lecidere, Dili, subliña, entrega prosesu ne’e ba parte justisa hodi hatúr lia loos.

Kazu ne’e to’o mós iha Roma, Amu Papa foti ona desizaun hodi hasai Richard husi kargu nu’udar Padre. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 802
  • Page views today : 927
  • Total visitors : 239,381
  • Total page view: 345,483