Notísia foun


DILI—Hospital Nasionál Guido Valadares (HNGV), sei limita vizita família ne’ebé baixa iha HNGV, durante aplika serka sanitária loron hitu, família ida de’it maka iha diretu ba hein pasiente inklui bandu família atu labele lori sasán barak tama iha HNGV, tanba HNGV laiha dezinfeta.

Xefe Gabinete Kontrola Kontrolu Kualidade no Komunikasaun Sosiál HNGV, Sara Maria Xavier, hatete relasiona ho kazu tranzmisaun lokál iha Timor-Leste, Hospital Nasionál Guido Valadares (HNGV) sei limita vizitante.

“Iha posibilidade boot, tanba ita haree ba situasaun atuál ohin loron, iha tempu tuir mai dala-ruma HNGV sei limita totalmente, ita sei hasai oráriu no ita sei autoriza pasiente ida, família ida maka hein”, hatete Sara ba jornalista sira iha HNGV, tersa (09/10).

Tuir gabinete ne’e hateten katak, HGNV bainhira hasai ona oráriu, signifika fó de’it oportunidade ba família ida no sei taka totalmente ba vizitór sira.

Nia informa katak, HNGV iha seguransa sivíl, ne’ebé sempre fó hanoin ba família pasiente, bainhira tama iha HNGV la uza máskara haruka fila ba sosa tiha máskara foin bele tama ba vizita pasiente.

“Ami sempre kontrola rotina ba iha enfermaria sira, bainhira iha família pasiente balun sira iha máskara, maibé sira la uza ka tara de’it iha kakorok, ami fó hanoin ba sira oinsá atu uza máskara ne’e ho loloos”, Sara subliña.

Kona-ba sasán ne’ebé família pasiente sira lori tama iha HNGV, Sara dehan sasán hirak ne’e laiha dezinfeta, maibé ba oin HNGV sei haree sasán ne’ebé la nesesáriu tenke dezinfeta.

Tanba ne’e HNGV nafatin fó avizu nafatin família pasiente sira, bainhira mai HNGV lalika lori sasán barak, lori roupa tahan ida rua, sasán uitoan de’it depois roupa fo’er foin lori ba uma.

“Ita nia serka sanitária ne’ebé governu aplika, ami nia visitor komesa menus, maibé atividade poliklínika la’o nafatin, tanba HNGV hanesan prestasaun, servisu sekundáriu no terseiru nian signifika katak, atendimentu ba kazu espesializadu sira kontinua la’o, maibé kazu normal sira se bele ba halo tratamentu iha sentru saúde no postu saúde sira”, nia informa.

Enkuantu, pasiente ne’ebé atu ba HNGV nia sente labele ona, la presiza ba sentru saúde no postu saúde, maibé tenke ba HNGV, nune’e mós tratamentu matan ba sira ne’ebé la urjente bele pasiénsia uitoan lai.

Iha sorin seluk, família pasiente Carmelita Soares, hatete hanesan família tenke koopera ho parte hosi Hospital Nasionál Guido Valadares (HNGV).

“Ami hanesan família mai haree ami nia tiun ida maka moras iha ne’e, tan ne’e maka ami mai haree, maibé ami mai troka malu”, nia tenik.

Tuir observasaun Timor Post iha Hospital Nasionál Guido Valadares (HNGV), pasiente sira forma ho distánsia sosiál, antes tama ba klínika halo tratamentu tenke liuhosi teste restreu, foin bele hakat tama ba HNGV, nune’e mós observasaun iha sentru saúde Formosa, iha loron tersa 09/03, tratamentu pasiente menus, iha ne’ebá sentru saúde aplika oráriu tratamentu ba iha tornu rua dadeer ho meiudia.(res)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 802
  • Page views today : 927
  • Total visitors : 239,395
  • Total page view: 345,497