Notísia foun


Timor Post (10/03/2021)—Governu lideradu Primeiru Ministru Taur Matan Ruak liuhusi reuniaun Konsellu Ministru, ohin deside hapara ona serka sanitária ba Munisípiu Kovalima.

Maske nune’e, ba Postu Administrativu Fatumea sei kontinua medida serka sanitária to’o 23 Marsu ne’e tanba situasaun epidimolójika sei kontinua nafatin, no esforsu atu buka tuir moras ne’e nia hún, sé mak lori moras ne’e no daet ba sé iha Fatumea maka presiza intensifika tan.

Ministru Prezidénsia Konsellu Ministru Fidelis Leite Magalhão haktuir, desizaun ne’e foti hafoin konsellu ministru análiza situasaun atuál iha Kovalima hahú normal, maibé regra sira kona-ba saúde públiku nian kontinua eziste.

“Ita loke ona movimentu ba munisípiu sira. Sira bele halo ona atividade hanesan baibain, sira ne’ebé ba eskola bele, servisu no atividade seluk,” Fidelis subliña hafoin desizaun konsellu ministru.

Entretantu governu liuhusi Konsellu Ministru Extraordinária taka total movimentu iha munisípiu Bobonaro no Kovalima tanba ema tama sai ilegal husi fronteira hodi provoka moras daet COVID-19 sa’e no posibilidade boot ba transmisaun lokal. Desizaun ne’e foti, liu tiha semana ida governu hapara uluk serka sanitária iha Bobonaro.

Serka sanitaria iha munisípiu rua ne’e atu evita mós virus foun SARS-Cov-2 ne’ebé hamate mós ema barak ona iha mundu.

Portavoz Governu Fidelis konsidera, movimentu ilegal perigu tebes ba nasaun. (cao)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 802
  • Page views today : 927
  • Total visitors : 239,399
  • Total page view: 345,502