Notísia foun


Timor Post (09/03/2021)—Adjuntu Prezidente Autoridade Munisípiu Dili, Antonio Moniz Clau hare, durante ne’e sidadaun barak seidauk kumpre protokolu hosi Organizasaun Mundial Saúde no Ministériu Saúde kona bá uza máskara fase liman ho sabaun no mantein distánsia fízika.

Moniz hato’o ne’e bainhira halo observasaun ba atividade negósiu ne’ebé komersiante hala’o iha merkadu Taibesse, Tersa Feira (09/03).

“Realidade sira hale’u ita ne’e laiha distansiamentu sosiál, ne’e hatudu katak ita nia sidadaun sira ne’e seidauk tau konsiderasaun másimu ba orientasaun sira ne’e liu-liu ba regra serka sanitáriu, ita hare  sira la tau máskara, sira nunka hakfodak ba regra hosi estadu nian”, hato’o Moniz.

Maski nune’e nia dehan, nu’udar autoridade nafatin hakbesik-aan ba populasaun sira, sensibiliza informasaun, katak saúde  iha ema nia liman rasik, maski populasaun balun ladún fiar.

“Ita ko’alia sira dehan ita bosok, maibé ha’u dehan ba hotu saúde ne’e iha ita nia liman rasik”, tenik Nia.

Nia enkoraja atu ema hotu kumpre regra koordena  ho instituisaun relevante sira hodi asegura atividade tuir protokolu OMS-MS no regra serka sanitaria ne’ebé fó sai.

“Regra ida serka sanitaria ba munisípiu Dili ne’e mai hosi Konsellu Ministru, signifika munisípiu Dili ne’e iha kondisaun situasaun ne’ebé mak perigozu, entaun husu ba sidadaun sira iha munisípiu Dili tenke kumpre regra sira”, dehan Moniz.

Informasaun hosi palasiu Sinzas katak, hafoin deteta kazu foun rua iha bairru BTN II, Tasi Tolu, Suku Madohi, Postu Administrativu Dom Aleixo, to’o horisehik ekipa konjuntu saúde buka-tuir nafatin kontaktu-besik sira husi kazu rua ne’e. Husi ezersisiu ida ne’e, deteta tan kazu 9 husi kontaktu-besik ho kazu husi sidadaun ida-ne’ebé nu’udar funsionáriu administrasaun públika iha SEFOPE.

Alende ne’e Vise-Koordenadora Forsa-Tarefa ba Prevensaun no Mitigasaun Surtu Covid-19 iha Timor-Leste, CIGC-SS informa ba públiku katak, atividade rastreiu seletivu massa horseik 8 marsu amostra ne’ebé ekipa foti hamutuk 471. (Husi SEFOPE amostra ne’ebé rekolla hamutuk 28, Ministériu Transporte no Komunikasaun 137, TIC 46, Bebonuk 51, Ministériu Finansas 82, Ospitál Nasionál 3 no Gabinete Primeiru-Ministru 124).

Ohin, ekipa konjuntu saúde kontinua nafatin buka tuir kontaktu-besik iha SEFOPE, MTC, HNGV no mós Bebonuk no rezultadu sei fosai iha loron hirak tuir mai.

Tuir dadus jerál  kazu foun 13, kazu rekuperadu 0 no kazu ativu 48.

Jornalista       : Jaime Pires

Editor              : Mariano Martins

Please follow and like us:

NOTÍSIA FOUN

Site Statistics

  • Users online: 3 
  • Visitors today : 318
  • Page views today : 351
  • Total visitors : 239,441
  • Total page view: 345,553