Notísia foun


Timor Post (09/03/2021)— Arsebispu ba Arkedioseze Metropolitana Dili, Don Virgílio do Carmo da Silva, SDB, liuhusi Sekretariadu Kâmara Eklesástika lansa tiha ona komunikadu ba imprensa kona-ba suspensaun misa iha parókia 11 ne’ebé tama iha área Munisípiu Dili nian tanba governu aprova ona serka sanitária no konfinamentu obrigatória hodi prevene moras daet COVID-19.

“Atu bele contribui ba sucesso husi Cerca Sanitária no Confinamento Obrigatório, tanba ne’e, Ha’u hakarak fó hatene no husu ba Reverendo Pároco, Padre sira, Religioso, Religiosa no Sarani sira, katak hahu husi 09-15 de março de 2021, ita mos sei suspende Missa sira Diária, Dominical ba público no Serviço Cartorial iha Paróquia sira iha Munisípiu de Dili de’it,” Arsebispu subliña iha komunikadu ba imprensa ne’ebé Timor Post asesu hafoin governu liuhusi Konsellu Ministru halo desizaun iha loron 08/03/2021 ba serka  sanitária iha Munisípiu Dili.

Katak Parókia sira ne’ebé halo parte iha Munisípiu Dili, hanesan: Atauro, Aimutin, Balide, Becora, Bedois, Catedral, Comoro, Dare, Hera, Metinaro no Motael, atu implementa orientação ida ne’e iha ida-idak nia fatin.

“Ba imi hotu nia kolaborasaun Ha’u hato’o obrigadu wain. Mai ita hotu reza husu Maromak nia tulun ho Nain Feto Maria Virgem, Timor nia Liurai Feto no São José, Aman Igreja Universal nia harohan daet, atu hadook lalais ita husi moras ne’e,” Arsebispu haklaken.

Entretantu Governu liuhusi reuniaun Konsellu Ministru foti ona desizaun hodi implementa medida serka sanitaria no konfinamentu obrigatóriu iha sidade Dili duran loron-hitu hahú husi loron Tersa (09/03/2021) to’o loron Segunda (15/03/2021).

Durante periodu serka sanitária no konfinamentu obrigatóriu, bandu atu realiza kualker atividade sira ne’ebé ho karater sosial, kultural, desportiva no religiosa, ne’ebé bele halibur ema barak.

Hafoin reuniaun Konsellu Ministru, Ministru Prezidénsia Konsellu Ministru (MPKL) Fidelis Leite Magalhães haktuir, desizaun ne’e governu foti tanba transmisaun lokal moras daet COVID-19 iha Dili laran.

Fidelis dehan, tanba tuir regra serka sanitaria durasaun ba loron hitu maka depois de prazu ida ne’e maka governu sei halo fali desizaun bazeia ba dezenvolvimentu situasaun atuál iha rai laran liuliu iha munisípiu Dili.

Durante serka sanitaria, Fidelis subliña, bandu ema halo viazen sai husi Dili ba munisípiu seluk exeptu ekipa sira ne’ebé transporta aimoruk,  aihan no seguransa.

“Maibé só iha autorizasaun husi ministériu interior no husi Sentru Integradu Jestaun Krize (SIJK),” Fidelis hatete.

Nia hatutan, ba sira ne’ebé husi munisípiu seluk no rejidente iha Dili,  sira bele tama mai Dili maibé tenke relata ba SIJK no kumpri konfinamentu obrigatóriu.

Konsellu Ministru mós deside atu labele halo atividade kulturais, reliziosa no atividade sira ne’ebé halibur ema barak durante periodu serka sanitaria iha Dili.

Fidelis dehan, konsellu ministru mós bandu atu komunidade sira sai husi um aba fatin públiku sira bainhira laiha nesesidade.

“A não ser nesesidade urjente sira hanesan ba hola aihan ou hola eletrisidade ou hola medikamentu sira, maibé la’o iha númeru kiik no bainhira pesoal seguransa sira halo para karik tenke justifika,” Fidelis salienta.

Atividade eskola no merkadu sira sei hatúr tuir despaixu husi parte relevante  sira sei fó sai.

“Konklui katak atvidade hotu sei paradu durante loron hitu ne’e nia laran,” Fidelis subliña. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 305
  • Page views today : 332
  • Total visitors : 239,428
  • Total page view: 345,534