Notísia foun


Timor Post (08/03/2021)—Movimentu transporte públiku no atividade komersial hahú husi rotunda Estátua Prezidente Nicolau Lobato to’o Tasi Tolu inklui Aldeia Terra Santa ne’ebé identifika ema na’in-rua hetan moras daet COVID-19, kontinua la’o normal.

Xefe Bairro Aldeia Terra Santa, João Clau ba Timor Post haktuir, komunidade iha área ne’eba rona duni ema na’in-rua hetan COVID-19 no ekipa médiku sira halo ona evakuasaun ba izolamentu maibé dezde horiseik to’o ohin, movimentu la’o normal.

João dehan, autoridade seguransa hahú horkalan matein ona seguransa iha área ne’eba maibé seidauk bandu movimentasaun sira tanba tuir nia sei hein hela desizaun governu liuhusi konsellu ministru kona-ba serka sanitária.

“Iha ne’e mai situasaun la’o normal hela, osida mak foin hatene maibé ami la hatene. Komunidade la’o ba mai hela. Ita fó avizu maié sira hakarak oinsá ha’u mós ko’alia ladi’ak.

“Autoridade seguransa iha BTN sorin ne’e nakonu dezde horkalan to’o agora. La check point, hein hela desizaun husi governu,” João haktuir.

Maske nune’e, eskola balun iha sidade Dili fó anúnsiu hapara provizória atividade eskola.

Tuir observasaun Timor Post iha Eskola São Pedro, Komoro, odamatan boot eskola nian xave metin. Nune’e mós iha EBC 30 de Agusto, Komoro mós hanesan.

Autoridade eskola Kristal, Dili fó sai avizu urjente ba estudante no professor sira feriadu durante loron rua. Tuir planu atividade sei hahú fali iha Kuarta semana ne’e maibé depende ba desizaun governu se deside serka sanitária maka parte eskola sei submete hodi kontribui ba prevensaun moras da’et COVID-19 iha Timor Leste.

Desizaun hanesan mós husi Eskola Dili Institute Technology (DIT). “Ohin Segunda, 8 Marsu, DIT suspende temporária atividade hanorin iha kampus tanba Covid-19 iha Dili laran. Estudante sira hein iha uma too avizu tuir mai.” Anúnsiu ne’e fó sai iha pájina ofisiál Dosente Estanislau Saldanha.

Entretantu restreiu ba kontaktu ne’ebé ekipa sira halo iha Bairro BTN-2, Tasi Tolu, Aldeia Terra Santa, Dili, Domingu (07/03/2021) konsege deteta na’in-2 pozetivu COVID-19 servisu iha administrasaun públika.

Tanba ne’e, Koordenadór Forsa-Tarefa ba Prevensaun no Mitigasaun Surtu COVID-19, Doutór Ruia Maria de Araújo informa, Sala Situasaun Sentru Integrasaun Jestaun Krize (SS CIGC sigla Portugués) koordena kedas ho autoridade seguransa hodi blokeia movimentasaun iha Aldeia Terra Santa.

Iha sala de situasaun, CCD, Rui la temi ema na’in rua ne’ebé identifikadu servisu iha ministériu ne’ebé, maibé husu de’it ba populasaun tomak atu koopera ho autoridade sira hotu hodi fó tempu ba ekipa konjunta sira hala’o servisu.

Rui dehan, ekipa sira kontinua halo restreiu ba kontaktu sira husi sira na’in-2.

Maske nune’e, Rui kontinua husu ba populasaun hotu iha Dili laran atu kalma iha ida-idak nia fatin, labele pániku no bainhira laiha asuntu importante iha liur lalika sai ba fatin públiku sira. (cao/ono)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 86
  • Page views today : 98
  • Total visitors : 240,263
  • Total page view: 346,588