Notísia foun

Reitór Universidade Nasionál Timor Lorosa’e (UNTL), João Soares Martins

Timor Post (08/02/2021)—Reitór Universidade Nasionál Timor Lorosa’e (UNTL), João Soares Martins hatete, nia parte mantein ho lista kandidatu estudante hamutuk 5.582 ne’ebé simu husi Ministériu Ensinu Superior Siénsia no Kultura (MESSK).

“Ami sei la hatun no la aumenta ona,” Reitór João ba jornalista sira iha Palásiu Governu, Segunda (08/02/2021), hafoin hasoru malu ho Primeiru Ministru Taur Matan Ruak.

Reitór dehan, protesta sira hasoru prosesu ne’e normal ba ema hotu ne’ebé la kontente, maibé ne’e responsabilidade MESSK ho parte sira kompetente ba rektrutamentu estudante foun ba UNTL nian.

“Prosesu selesaun tomak iha MESSK liu hosi Komisaun Asesu Ensinu Superior (KAES), ne’ebé mak dirije hosi Ministru rasik, no Prezidente (KAES), ne’e mak diretor MESSK rasik, maski membru UNTL na’in rua mak tama iha komisaun ne’e maibé ha’u labele ko’alia ida ne’e, so ministru mak bele hatan,” Reitór subliña.

“Ha’u labele dehan ida ne’e mosu iregularidade, tanba ita seidauk halo avaliasaun, maibé di’ak liu chek didi’ak lai iha membru (KAES), karik iha iregularidade prontu tanba ita ema nunka sees hosi sala,” Reitór hatutan.

Nia subliña, karik iregularidade la ho intensaun dalaruma mós iha falansu tekniku ruma.

Entretantu, kandidatu estudante ba Universidade Nasional Tomor Lorosa’e (UNTL) hamutuk  na’in-5.582 mak admitidu ka liu ba kontinua estudu iha universidade públiku ne’e.

Prezidente Komisaun Asesu Ensinu Superior Públiku, Maria Filomena Maia Guterres, liu hosi konferensia imprensa ne’ebé mak realiza iha Salaun INFORDP, Matadoru, sesta (05/02) haktuir, prosesu ne’e hahú ho aprovasaun diploma ministerial númeru 32/2020, 16 de Setembru.

“Liuhosi diploma ne’e fó kompetensia ba komisaun asesu ensinu superior hodi responsabiliza ba atividade hotu-hotu relativa ba asesu ensinu superior publika, komisaun ne’e kompostu hosi komisaun (MESSK), UNTL no IPB, no kordena ho entidade relevante sira hanesan (MEJD), MSSI no MAKLN, no lidera porosesu dezaminasaun iha munsipiu hotu-hotu kona-ba rejime asesu, rekejitu sira ba admisaun  faze no kalendariu ba implemtasaun no numeru vaga sira ne’ebé disponivel ba estudante sira bele asesu ba esnsinu superior,” dehan Nia.

Nia dehan, rejime jeral fó oportunidade ba finalista hosi ensinu sekundariu sira ne’ebé remata iha tinan 2020.

Rejime espesial, fó oportunidade ba kandidatu sira ne’ebé mak iha situasaun exsesional, hafoin realiza prosesu asesu ba ensinu superioe publiku ba tinan akademiku 2021.

Nia esplika, Rejime jeral, total estudante finalista sira hosi ESJ no ESTV, hamutuk 23.988, no sira ne’ebé mak pronxe boletim eskola departamentu hamutuk 23.460, no sira la prenxe boletim hamutuk 528.

Nia dehan, numeru estudante sira ne’ebé mak admitidu ba UNTL no IPB hamutuk 4.075, hosi numeru ida ne’e 3.865 ba UNTL no 210 ba IPB.

Numeru estudante finalista sira hosi (ESJ no  ESTV), ne’ebé la admitidu ba esnsinu superior publiku liu hosi rejime jeral hamutuk 19.385.

Rejime espesial, hamutuk 4.483, na’in 3.998 mak tuir ezame, 485 mak la tuir ezame, no sira ne’ebé mak liu ka admitidu ba UNTL no IPB hamutuk 457, hosi numeru ne’e 422 mak ba UNTL no 35 mak ba IPB.

Nia dehan, kategoria veteranus no martires nia oan hamutuk 1.705, hosi numeru ne’e 1.591 mak tuir ezame no 114 mak la tuir ezame, sira ne’ebé mak admitidu ba UNTL no IPB hamutuk 681, hosi numeru ne’e 661 ba UNTL 20 mak ba IPB.

Kategoria kbi’it la’ek hamutuk 409, sira ne’ebé tuir ezame hamutuk 390, no la tuir ezame hamutuk 19, sira ne’ebé naran liu ka admitidu hamutuk 248, na’in 228 ba UNTL no 20 ba IPB.

Nia reforsa, kategoria sira seluk hosi rejime espesial hamutuk 252, no sira ne’ebé admitidu ka liu mak hamutuk 121, hosi numeru ne’e 106 mak ba UNTL 15 mak ba IPB.

“Nune’e numeru total kandidatu sira ne’ebé admitidu, hosi rejime rua ne’e mak 5.582”, dehan Nia.

Jornalista Jaime Pires

Editór Noémio Falcão

Please follow and like us:

NOTÍSIA FOUN

Site Statistics

  • Users online: 4 
  • Visitors today : 788
  • Page views today : 1,047
  • Total visitors : 194,260
  • Total page view: 280,801

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur