Notísia foun


Timor Post (23/01/2021)—Família nia planu haloot Saudozu Sabino Soares “Guntur” iha nia moris fatin Lelalai Postu Administrativu Kelikai, Munisípiu Baukau. Maske nune’e, depende mós ba desizaun husi estadu.

Reprezentante família Hernanio Agostinho Soares nu’udar aman maun alin nia oan, ba Jornalista sira bainhira akompañia Saudozu nia isin mate iha Mortuáriu HNGV, Dili, subliña, familia sei halo negosiasaun ho estadu tanba Saudozu Guntur mós nu’udar veteranu.

“Tuir familía nia planu atu haloot matebian iha nia uma  knua Kelikai Munisípiu Baukau, maibé ne’e desizaun ami familía  sei halo hela negosiasaun ho Estadu tanba nia mós fó kontribuisaun makas’a durante luta libertasaun nasionál no ba dezenvolvimentu durante Timor Leste ukun-an,” Agostinho subliña.

Deputadu Sabino Soares ” Guntur” hakotu iis iha sala ICU-HNGV, iha loron Sábadu (23/01/2021) madrugada.

Iha loron hirak liu ba Médiku iha HNGV, halo ampotasi ba matebian nia ain sorin karuk, tanba matebian sofre moras diabetes. Hafoin matebian nia ain sorin tesi matebian tama liu ba iha sala ICU liu loron balun matebian mós hetan akuzasaun pulmaun bubu ho moras ne’ebé nia hasoru médiku ho familía sira labele halo buat ida.

“Matebian durante nia moris nia hasoru moras komplikadu, tanba ne’e ami familía deside lori mai ospitál hodi halo tratamentu, too iha ospitál ami familía foti desizaun hodi halo ampotasi ka tesi  tiha nin sorin karuk tanba matebian hasoru moras diabetes ka ran midar, alende ne’e mós matebian hasoru moras pulmaun bubu too afeta nia mate,” Agostinho haktuir.

Sabino Soares Guntur hakotu iis husik hela nia oan na’in-lima kompostu husi feto ida, mane haat. Oan na’in-hirak ne’e sei idade ki’ik hotu.

“Ami hanesan familía husik buat hotu ba governu, tanba matebian  mós hanesan ema soberanu, entaun prosesu hotu entrega ba Estadu, tanba matebian mós fó ninia kontribuisaun lubuk ba rai ida ne’e,” Agostinho salienta.

Matebian hamutuk ho nia maun maun alin hitu, husi maun alin hirak ne’e feto ida mane nain neen.

Matebian nia istória naruk tebes durante nia joven nia dedika-an ba iha prosesu luta libertasaun nasionál nia hetan torturasaun iha okupasaun Indonézia no tama iha prizaun durante tinan tolu.

Matebian nu’udar ema atvista ba CPD RDTL, nia involve nia-an iha partidu (PLP), nia hetan konfiansa sai deputadu hahú iha tinan 2017.

Guntur lisensiatura Siência Governamentais (S1). Nia hanesan mós fundador ba PLP.

Matebian moris iha loron 08 Jullu  1975.

Tuir planu família nian, sei lori matebian sai husi Mortuariu HNGV ba vizita uma espoza iha Likisá hafoin lori mai Dili iha Aimutin hafoin prepara ba serimónia funeral.

Tuir observasaun Timor Post iha mortuáriu HNGV, nakonu ho família, Deputadu ho membru governu balun.

Jornalista Olga Soares

Editór Noémio Falcão

Please follow and like us:

NOTÍSIA FOUN

Site Statistics

  • Users online: 6 
  • Visitors today : 769
  • Page views today : 1,013
  • Total visitors : 194,241
  • Total page view: 280,767

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur