Notísia foun


Timor Post (29/12/2020)—Prezidente Repúblika, Francisco Guterres Lú Olo, iha loron 28/12/2020, promulga ona Dekretu Parlamentu Nasionál númeru 26/V  Orsamentu Jerál Estadu (OJE) ba tinan 2021 ho montante biliaun $1,895.

OJE ba tinan 2021 nian hamosu alterasaun metodolójika balu neebé halo indikasaun kona-ba despeza sira tuir programa ida-idak nian, aleindé utiliza klasifikasaun orgánika (entidade neebé mak atu realiza despeza) no klasifikasaun ekonómika (tipu despeza neebé mak atu realiza).

OJE hamosu previzaun orsamentál ba órgaun no servisu sira  iha Setór Públiku Administrativu, kompostu hosi Orsamentu Administrasaun Sentrál, hosi Orsamentu Rejiaun Administrativa Espesiál Oe-Kusse Ambenu no hosi Orsamentu Seguransa Sosiál nian.

Orsamentu 2021 ho montante biliaun $1,895, foti hosi reseita fundu minarai biliaun $1,377 no reseita naun petrolíferu millaun $508.

Hosi totál reseita fundu minarai biliaun $1,377, millaun $547 foti bazeia Rendimentu Sustentável Estimadu (RSE) no transferénsia superiór liu RSE millaun $829.

Proposta-lei OJE 2021 kompostu hosi saláriu no vensimentu millaun $239,2, bens (sasán) no servisu millaun $421,49, transferénsia públika millaun $669,91, kapitál minór millaun $61,14 no kapitál dezenvolvimentu millaun $503,20.

Parlamentu Nasionál aprova Dekretu númeru 26/V  Orsamentu Jerál Estadu ba tinan 2021, ho votu a favór 44, laiha votu kontra no laiha abstensaun iha loron 12 fulan-dezembru 2020.

Entretantu Eis Primeiru Ministru atuál Sekretáriu Jerál FRETILIN, Marí Bim Amude Alkatiri konsidera desizaun Lú Olo nian ne’e hanesan notísia di’ak.

“Notísia furak. Notísia murak. Obrigadu wain nain Presidenti Lu. Ami promete atu servisu makaas atu hahú (H6) Hadia, Harii, Hametin, Haburas, Habelar no Hamos KKN,” Alkatiri hakerek iha nia pájina offisiál Facebook.

Alkatiri dehan, programa sesta báziku la’o dadaun. Tuir mai hahú prosesu estabilizasaun tuir dalan diversifikasaun ekonómika.

Ikus liu implementa politika nasional “economia social de mercado” atu hasai povu husi nakukun no kore povu husi mukit no kiak. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 802
  • Page views today : 927
  • Total visitors : 239,376
  • Total page view: 345,478