Notísia foun


Timor Post (28/12/2020)—Komandu Munisípiu Dili, Superintendente Xefe Polísia Henrique da Costa relata, durante selebra festa Natal tinan 2020 nia parte rejista insidente hamutk 47. Kazu hirak ne’e rejista hotu iha eskuadra Don Aleixo. Entretantu iha Baukau situasaun hakmatek.

“Eskuadra Don Aleixo de’it tuir relatóriu ne’ebé mak iha 47 insidente”, hatete ba Jornalista iha Komandu Kaikoli, segunda (28/12).

Númeru ne’e inklui kazu tuda malu, ne’ebé konsidera hanesan insidente maibé la identifika loos ema na’in hira mak sira (PNTL eskuadra Don Aleixo) kaptura tanba seidauk simu dadus kompletu hosi eskuadra sira.

Komandu jerál kategoriza katak eskuadra Don Aleixo mak rejistu insidente barak liu kompara eskuadra sira seluk ne’ebé rejista insidente menus hosi sanulu, exetu eskuadra Hera no Metinaru laiha insidente ruma mak akontese.

Maske nune’e, Komandante Henrique hatete, situasaun jeral iha Dili hakmatek durante selebrasaun natal 2020.

“Durante selebrasaun natal iha kapitál Dili hahú loron 24 kalan misa to’o loron 25 dadeer misa parte seguransa komandu PNTL munisípiu Dili asegura fatin tantu igreja, kapela, no igreja protestante sira hotu no laiha insidente ruma mak mosu” relata Superintendente  Xefe, Armando da Costa,  iha Kaikoli, segunda (28/12).

Nia hatutan problema mosu fali depois de misa, maibé la iha impaktu boot tanba polisia atua sedu. “ depois misa hotu, iha bairu-bairu sira mosu problema lubuk ida mai hosi joven sira lanu maibé parte PNTL responde kedas ho lalais, la fó impaktu hanesan ema lakon vida ne’e laiha”, haktuir Armando.

Entretantu durante Natal PNTL Komandu Dili hetan apoiu hosi komandu jerál, sentru formasaun polisia, unidade espesiál polisia, unidade espesiál fronteira, unidade polisia maritima no mós polisia militár.

Kona bá komunidade sira ba halo pasa feira ho família sira iha Tasi ibun, Xefe Henrique dehan, laiha problema ruma no (tasi) halo ema mate ka lakon vida hanesan tinan hirak ba kotuk.

“Natal tinan 2020 ne’e mosu de’it mak insidente iha bairru area Don Aleixo nian maibé laiha problema ne’ebé mak boot hodi rezulta ema mate,” hakotu Henrique.

Entretantu Komadante Munisípiu Baukau, Armando Monteiro hatete, selebrasaun festa Natal tinan 2020 situasaun la’o hakmatek iha Baukau.

Nia dehan lia hirak ne’e ba Timor Post liu hosi viatelefone, Domingu (27/12) dadeer ne’e hafoin konfirma situasaun jeral iha munsípiu Baukau tomak.

“Natal tinan ida ne’e iha munisípiu Baukau, buat hotu-hotu la’o hakmatek, laiha insidente no asidente,” Nia dehan.

Nia subliña, ne’ebé durante misa iha loron 24 kalan komunidade sira la’o ba mai ba misa situasaun la’o hakmatek, to’o agora.

Nia dehan, iha munispiu Baukau, hamutuk postu administrativu (6), maibé laiha buat ruma mak akontese hodi halo populasaun sira la’o sente tauk no trauma, buat hotu-hotu hakmatek.

Nia hatutan, komandu munsípiu Baukau kontinua servisu maka’as hamutuk ho entidade sira hotu-hotu hodi garantia situasaun hakmatek to’o simu tinan foun 2021.

Fó hanoin fali katak, munisípiu Baukau antes ne’e sempre mosu problema oi-oin, hanesan ataka malu, sunu uma, oho malu, no baku malu liu-liu iha Postu Administrativu Rua hanesan Laga ho Baukau, maibé tinan ida ne’e situasaun la’o hakmatek.

Jornalista: Jaime Pires

Editor: Mariano Martins

Please follow and like us:

NOTÍSIA FOUN

Site Statistics

  • Users online: 7 
  • Visitors today : 141
  • Page views today : 158
  • Total visitors : 141,198
  • Total page view: 201,997

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur