Notísia foun


Timor Post (17/12/2020)—Eis Prezidente Parlamentu Nasionál, Arão Noe lamenta tebes ho desizaun governu liuhusi Konsellu Ministru, Kuarta (16/12/2020) aprova aliterasaun dahuluk ba dekretu númeru 14/2020, loron 23 outubru, kona-ba ezekusaun Orsamentu Jerál Estadu tinan 2020 nian.

Atual deputadu husi Bankada CNRT ne’e subliña, sistema ezekusaun OJE 2020 nian taka ona iha loron 15 Dezembru, maibé governu halo alterasaun hodi prolonga sistema loke to’o loron 17 Dezembru ne’e grave tebes ba sistema ezekusaun OJE iha Timor Leste.

“Regra ida ne’e estabelese mai kedas kuandu aprova lei kona-ba jestaun orsamentu finanseira fixa kedas katak 15 de Dezembru kada tinan sistema tenke taka. Katak, konta sira hotu ne’ebé prosesu administrasaun sira ne’e to’o de’it loron 15, pagamentu sira ne’ebé aprova tiha ona bele halo pagamentu ba to’o iha 28 de Fevereiru tinan tuir mai, maibé, se governu halo aliterasaun ba lei ne’e rasik, ne’e hamosu problema ida fali katak, estadu ida ne’e estadu de direitu tiha, maibé lala’ok lor-loron nia la tuir regra ne’ebé estabelesidu. Ne’e grave tebes hanesan estadu de direitu,” Arão hato’o lamentasaun ne’e ba Jornalista sira iha Parlamentu Nasionál, Kinta (17/12/2020).

Bainhira konfirma ho Vise Prezidente Parlamentu Nasionál, Deputada Maria Angelina Sarmento, nu’udar membru bankada governu hosi PLP hatán nia seidauk hetan informasaun kona-ba desizaun governu nian ne’e.

“Ha’u seidauk iha informasaun kona-ba ida ne’e, maibé ha’u sei check lai membru governu sira kona-ba ida ne’e, maibé tuir loloos sistema ne’e taka iha 15 Dezembru,” dehan Angelina.

Entretantu Ministru Prezidénsia Konsellu Ministru, Fidelis Manuel Leite Magalhães, hateten diploma ne’ebé aprezenta hosi Ministru Finansa, Rui Augostu Gomes, kona-ba ezekusaun Orsamentu Jerál Estadu (OJE) 2020 ne’ebé fó biban atu estende loron ezekusaun.

“Ho alterasaun ne’e, permite sistema bele loke to’o iha loron 17 dezembru 2020 tanba ita iha serbisu barak mak tenke rezolve hanesan Kustu Produtu Vendidu (CPV) tenke rezolve atubele jere sasán ho forma organizadu no fasilita ezekusaun ne’ebé di’ak liu,” Ministru Fidelis informa hafoin reuniaun KM iha Palásiu Governu, kuarta ne’e.

Jornalista: Julio Salinas Soares

Editór: Noémio Falcão

Please follow and like us:

NOTÍSIA FOUN

Site Statistics

  • Users online: 10 
  • Visitors today : 764
  • Page views today : 1,066
  • Total visitors : 198,815
  • Total page view: 287,399

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur