Notísia foun


TURISKAI—Don Boaventura, Francisco Xavier do Amaral ho Francisco Borja da Costa, nu’udar Manufahi-oan ne’ebé uluk liu oferese-an ba luta hasoru kolonia Portugués no invazaun Indonézia iha Timor Leste.

Don Boaventura hahú kedas kontra rejime Portugués ne’ebé halo timoroan sira sai atan. Nune’e mós Francisco Xavier ho Borja da Costa kontinua no konsege ho prinsípiu ho timoroan sira tomak fila Timor sai nasaun ne’ebé Ukun Rasik-an.

“Manufahi-oan na’in-tolu ne’ebé oferese ba rai ida ne’e mak hanesan Avo Don Boaventura, Francisco Xavier do Amaral no Francisco Borja,” Prezidente Autoridade Munisípiu Manufahi (PAMM), Arantes Isaac Sarmento subliña iha nia intervensaun iha okajiaun lansamentu livru Biografia Fracisco Xavier do Amaral ne’ebé hakerek husi Aniceto Guro Berteni Neves, iha Postu Administrativu Turiskai, Kinta (03/12/2020).

Líder másimu Munisípiu Manufahi ne’e husu ba jerasaun sira iha Timor liuliu jerasaun Manufahi tenki hatene istória ida ne’e. Ho istória ne’ebé hakerek-nain Aniceto Guro Berteni hakerek ne’e orgullu bo’ot ba Timor liuliu Manufahi-oan sira.

Entretantu Sentru Nasionál Chega (CNC-sigla portugés), iha loron 30/11/2020, lansa dahuluk livru biografia no istória moris saudozu Francisco Xavier do Amaral, ne’ebé hakerek husi eskritór Aniceto Guro Berteni Neves, ho hetan apoiu husi CNC ho pajina purvolta 500.

Livru ne’e hakerek kona-ba rekoñesimentu Estadu Timor-Leste ba Saudozu Francisco Xavier do Amaral, hanesan Prezidente Partidu Asosiasaun Democratico Timorense/ Frente Revolusionáriu Timor-Leste Independente (FRETILIN), proklamadór Independensia unilaterál no Prezidente RDTL dahuluk.

Iha lansamentu, Hakerek-nain Aniceto Guro Berteni Neves subliña, livru ne’ebé nia hakerek, la’ós fó de’it importansia ba Saudozu Francisco Xavier do Amaral, maibé ida ne’e faze inísiu tanba ne’e sei fó mós importansia ba lidér sira seluk.

“Importante ita hahú hakerek lider ida ninia istória moris la’ós atu koñese sira ne’e, la’ós de’it atu rekolla sira-nia memoria para atu sai hanesan memoria hodi enkuadra iha narativu istória nasionál nian, maibe importante liu maka ita hakerek istória ida ne’e atu sai materia formasaun ida ba lideransa joven sira ne’ebé foin mai no mós formasaun ba umanidade istoria no rekonsiliasaun iha Timor-Leste,” Aniceto hatete iha nia diskursu durante serimonia lansamentu livru ne’e iha CNC, eis komarka Balide Dili.

Memoria lubuk ida maka eskritór ne’e rekolla husi lideransa 75 sira ne’ebé fó rekoñesimentu ba Saudozu, hahú husi Eis Prezidente Repúblika, José Ramos Horta, hateten Francisco Xavier do Amaral nu’udar simbolu unidade povu Timor-Leste ninia aspirasaun ba independensia nasionál. (lcl)

Please follow and like us:

NOTÍSIA FOUN

Site Statistics

  • Users online: 8 
  • Visitors today : 408
  • Page views today : 506
  • Total visitors : 141,465
  • Total page view: 202,345

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur