Notísia foun


Timor Post (24/11/2020)— Sekretária Jerál Parlamentu Nasionál Sesante, Cedelízia Faria dos Santos deklara sei lori Prezidente Parlamentu Nasionál (PN), Aniceto Guterres ba tribunál relasiona ho desizaun ezonera nia husi nia kargu la ho rajaun fundamental.

Cedelízia afirma, hanesan sidadaun nia iha direitu ba prosesu ida ne’e tanba konsidera rajaun sira ba ezonerasaun nakonu ho akujasaun oioin. No la simu ho prosesu ezonerasaun ne’ebé konsideradu la tuir prosesu normal.

“Ha’u sei hatama keixa, lia loos tenke ko’alia. Hanesan sidadaun ida ita nia lei inan mós fó dalan,” Cedelízia subliña ba Timor Post hafoin simu karta ezonerasaun husi Prezidente Parlamentu Nasionál, Aniceto Guterres, iha loron Tersa (24/11/2020).

Cedelízia dehan, nia sei tetu hela desizaun ba ezonerasaun ne’ebé inklui ho rajaun katak nia la fasilita plenária iha loron 18-19 Maiu 2020, iha ne’ebé mosu tensaun maka’as iha sala plenária to’o meza Prezidente Parlamentu Nasionál nian rahun. Nune’e mós rajaun sira ne’ebé nia sente hanesan akujasaun falsu hasoru nia kona-ba hamate ahi-eletrisidade bainhira plenária la’o hela.

Cedelízia haktuir, karta ezonerasaun ba nia asina husi Aniceto Guterres iha loron 24 no entrega kedas ba nia iha loron ne’e i haruka tenke sai kedas husi gabinete. “Ha’u foin simu karta iha 11 oras no karta nomeasaun foun mós ha’u simu ona, ha’u tenke sai ohin, entaun ha’u tenke hatama relatóriu, ha’u sente katak buat hanesan ne’e ladun justu,” Cedelízia hatete.

Nia dehan, hanesan sidadaun tenke tuir regra administrativu. “Tenke fó mós tempu ba ha’u atu halo ha’u nia hand over,” Cedelízia subliña.

Cedelízia hatutan, kargu ne’e provizóriu de’it, maibé labele foti desizaun tuir gostu hodi viola tiha regra sira iha funsaun públika.

“Ha’u tama mós liu rekrutamentu, parlamentu mak loke rekrutamentu, ha’u hatama ha’u nia CV, ha’u tuir prosesu hotu, pur méritu mak ha’u tama,” Cedelízia haktuir hodi hatutan nia nomeiasaun por lejislatura.

“Sé ha’u komete buat barak tenke hatudu faktus ruma,” Cedelízia dehan.

Iha oportunidade Cedelízia hatete, serví nasaun ba nia la’ós de’it lori kargu iha parlamentu. “ba ha’u iha fatin hotu bele,” nia salienta.

Entretantu Prezidente Parlamentu Nasionál, Aniceto Guterres iha loron ne’ebé ezonera Cedelízia, nomea fali Adelino Afonso de Jesus hodi asumi Sekretáriu Jerál (SekJer) Parlamentu Nasionál.

Cedelízia simu posse husi Prezidente Parlamentu Nasioná l (PN), Arão Noé de Jesus da Costa Amaral akompaña hosi Prezidente Komisaun Funsaun Públika (KFP), Faustino Cardoso, Sesta (13/09/2019), iha Uma Fukun Parlamentu Nasionál.

Cedelízia simu posse iha momentu ne’eba hodi troka eis Sekretáriu Jerál Adelino Afonso de Jesus.

Rekrutamentu ba Cedelízia bazeia ba Lei Organizasaun Funsionamentu Administrasaun Parlamentár (LOFAP) artigu 23 to’o 24 ne’ebé iha opsaun rua ba rekrutamentu ne’e. Opsaun rua ne’e mak nomeasaun hosi funsionáriu públiku ne’ebé asume kargu xefia aas liu iha PN no opsaun seluk mak loke konkursu públiku, ikus mai Cedelízia eleita ba Sekretária Jerál PN. (cao)

Please follow and like us:

NOTÍSIA FOUN

Site Statistics

  • Users online: 6 
  • Visitors today : 450
  • Page views today : 545
  • Total visitors : 193,922
  • Total page view: 280,299

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur