Notísia foun


Timor Post (18/11/2020)—Xefe Negosiadór Prinsipál Fronteira Marírima Timor Leste, Kayrala Xanana Gusmão manda tiha ona karta ba Prezidente eleitu ba Estadus Unidus Amérika (EUA).

Iha karta ne’ebé uza logo RDTL ne’e, Xanana hato’o nia kongratulasaun ba Joe Biden ho nia vise Kamala Harris nu’udar jerasaun metan ne’ebé hetan votus barak liu Prezidente sesante Donald Trum iha eleisaun semana liu ba.

“Ho ha’u nia laran tomak, hato’o kongratulasaun ba saida mak ita boot hetan iha eleisaun ne’ebé susesu hodi sai prezidente ba Estadus Unidus Amérika. Durante iha ita boot nia moris ita boot servé atu hetan ida ne’e ba ita boot nia nasaun ho dedikasaun tomak ho dignidade no umilidade atu hasa’e ema Amérika nia moris,” Xanana subliña iha karta ne’ebé hakerek ho lian Ingles.

Ho esperansa Xanana hatutan, eleisaun iha Amérika sei lori promesas no esperansa ba EUA no ba mundu tomak.

Eis Prezidente RDTL ne’e mós dehan, Joe Biden nia vise husi jerasaun ne’ebé kór kulit la hanesan marka mós istória ne’ebé merese ba selebrasaun mós.

“Hanesan ita boot hatene, mundu agora kompleksu tebes, nakonu ho obstákulu inklui mudansa klimátika no COVID-19 no konflitu entre ema husi nivel oioin no ki’ak,” Xanana subliña iha karta ne’e.

Maske nune’e, Xanana dehan, ho Joe Biden ho Kamala nia esperiensia iha nivel mundiál liuliu relasaun ho estranjeiru sira, ho konfiansa katak dame buras liu tan iha mundu.

Xanana mós hakerek iha karta ne’e kona-ba EUA nia atensaun ba nasaun sira frajil ne’ebé involve iha grupu g7+ inklui Timor Leste.

“Timor Leste iha valor ne’ebé aas tebes, iha relasaun di’ak tebes ho líder polítiku sira iha Amérika ne’ebé maka suporta ami nia determinasaun no ajuda i asegura ami nia independénsia. Nasoens Unidas nu’udar parseiru  importante ida iha prosesu dezenvolvimentu Timor Leste, no konsolida prosesu demokratizasaun,” Xanana subliña.

Entretantu, hafoin manda karta kongratulasaun ba Joe Biden, Xanana semo ho aviaun Jet privadu husi Indonézia ba Jakarta hodi halo kontrolu ba nia saúde (check up ).

“Maun boot ba check up iha Jakarta sei fila fali mai Dili iha semana oin,” haktuir fonte ida ne’ebé lakohi temi nia identidade ba Timor Post hafoin akompaña Xanana ba Aeroportu Nicolau Lobato, Komoro, Dili, Kuarta (18/11/2020). (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 1,065
  • Page views today : 1,361
  • Total visitors : 84,912
  • Total page view: 119,168

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur