Notísia foun


Hafoin lansa tiha muzika “Stand Up – I’m Timorese & I’m Proud” foin iha tempo itoan hodi “nonton” fali “novela politica” iha rai-laran. Oinsa ona? Instante reasaun,  “ups!, laiha buat foun ida”. Muron tiha de’it, maibe spanto mos ho news no status balun nebe la furak ida no la elegante liu. “Hmmm…”! Kili hau nia curiosidade mak  Assanami nia “bem disposto” iha diskursu, nebe ao mesmo tempo hatudu mos nia preocupações ho desafios futuros.

Interesante rona, e hau mos decide tecla hela notas balun konaba evento ne’e.

Masakre Santa Cruz acontece iha tinan 29 liu-ba, iha loron 12, fulan Novembru, tinan 1991. Historiku no heroiku. Ohin, dala ida-tan, ita presta homenagem ba jovem  aswain sira, no hein katak jerasaun ohin no aban sei kontinua ho forsa “kumu-liman” no “tuba-rai” metin. Tamba, ho sira nia “hakilar” mak fanun mundo husi dukur no  doko regime Suharto nia politika fo’er iha Timor-Leste.

Xanana laiha duvida ho kbi’it jovem patriota sira. Iha entrevista ida ho Majalah Tempo, 1998, jornalista husu konaba jovem sira nia partisipasaun iha luta, nune’e: “Bagaimana Anda mendorong anak-anak muda Timtim menerima ide Timor Leste Merdeka yang belum ketahuan bentuknya?”. Ho fiar Xanana  hatan: “Anda jangan menyangka  pemuda-pemuda Timtim itu seperti pemain sinetron. Mereka sudah biasa hidup susah. Mereka datang belajar ke Jawa dalam keadaan serba  kekurangan, tapi mereka bertahan.  Tahun 1990-1992 di Timtim ada semacam gerakan perjuangan di kalangan pemuda Timtim untuk melawan tentara Indonesia. Para pemuda  Timtim sudah berjuang sejak berada  dalam kandungan ibunya. Ketika ibu mereka menangis karena kekejaman tentara Indonesia, tangis itu menjadi national anthem bagi orang  Timtim.” (- Majalah Tempo 1998).

Sim senhor, hatan ho matenek. Iha ne’e, hau tutan, indonesia rasik haluha tiha katak invazaun sagrenta 7 Desember ’75 sei fresku hela iha memoria no acontecimento iha  rate Santa Cruz, 12 Novembru ’91 hafitar tiha ona iha foin-sa’e sira isin no klamar.  Neduni, laiha duvida ho jovem sira nia convicção ba URA (Ukun Rasik An)  metin  iha fuan no neon. Hanesan mos EM Tomodok hakerek iha nia livro “Hari-Hari Akhir Timor Portugis” konaba jovem Jose Ramos-Horta nia fe ba Timor nia luta: “Kemerdekaan  Timor-Timur selalu ada dipikiran Ramos-Horta”.

Se-tilun ba diskursu “excelência” sira, ba dala ida ne’e, hau “tertarik” ho Assanami nia intervensaun loron comemorativo “12 Novembru” em honra ba sira Loriku Aswain.

Como sempre ho jeito iha podium, Assanami sublime hahi’i folin historiku patrio-nasionalismo jovem maubere sira. Reafirma kbi’it, forsa no vontade foin-sa’e sira, de  mãos dadas hatudu iha 12 Novembru 1991. Kumu-liman, nokonu ho espirito  NASIONALISMO no metin ho conceito  UNIDADE NACIONAL. Sira halibur-malu no konsolida-an iha  mahun RESISTENCIA nian, nebe, iha loron ne’e “berkibarlah” bandeira FRETILIN, bandeira NASIONAL, bandeira UDT, no mos bandeira Portugal hodi hatudu ba indonesia no  mundo katak ami reziste hela no insiste hakarak Ukun-rasik-an – “resistir é vencer”. Iha livro RENETIL, Carlos Saky mos hakerek oinsa OJETIL, RENETIL no seluk-tan  “desenha” politika inclusão no Unidade Nasional ho pensamento ida “a união faz a força”. Jovem futu-lia ida de’it, nudar timoroan, ba Timor-Leste, ba Ukun-rasik-an.

Assanami fiar metin ba “soliditas” geração continuador no deposita nafatin espirito ne’e hada’et ba jerasaun milenia no vindoura sira. Ba URA, ba desenvolvimento,  PATRIA bolu ita dala ida tan “a luta continua” LIBERTA povu. Eis a chama da pátria e o nosso comprimisso!

Pidato eis lider RENETIL nian ne’en claro no prudente, hanoin ba passado, hare ba presente no hateke ba futuro. Reafirma juventude nia prontidão no totalidade, e,  oportunamente lansa mos dezafius balun, liliu, ba juventude sira, atu metin nafatin ho espirito Unidade Nasional, Sakrifisiu no Dedikasaun, ou seja, metin liu-tan iha  prinsipiu ho responsabilidade no determinasaun hodi hakat ba futuro liu husi dalan dezenvolvimentu. Hakuak futuru ho fe no esperansa!

Foi assim que aconteceu, jovem Loriku Aswain sira nia entrega-an ba funu ho de’it KBI’IT no DOMIN hasoru kilat rejime militar indonesia. Sim, hanesan Max Stahl nia  testemunho dehan: “Os jovens nesse dia mostraram uma coisa para mim nova na luta timorense, quer dizer, mostraram que os valores, a dignidade do povo timorense nao  dependiam de ter armas para puder derrotar o inimigo”. (The Max Stahl Audiovisual Archive Center of East-Timor)

Ohin, hau lembra hikas passado wainhira Masakre Santa Cruz “invade” komunikasaun sosial. Hau ki’ik maibe hare no rona ho matan-wen gritos da liberdade. Triste maibe  firme hodi nafatin hakilar ba libertacao da patria liu husi klibur TATAMAILAU.

Hau termina ho depoimento Xanana nia defeza iha julgamentu da’et ho masakre Santa Cruz, dehan nune’e: “A manifestação pacífica de 12 de Novembro o que é que pretendia?  Lembrar a Jakarta e lembrar ao mundo a necessidade do diálogo, lembrar ao mundo que há algo errado no caso de Timor-Leste.” (Doc. tinan 1993, pag. 309)

Em memoria ba loron historiku ne’e, hau dedika-ho knanuk NOVEMBRU “NAKARAS”, nudar honra ida ba funu-nain no aswain Loriku Maubere.

Viva 12 Novembro!

Viva Timor-Leste!

Dalia Kiakilir

Oxford, 12 Novembru 2020

Please follow and like us:

NOTÍSIA FOUN

Site Statistics

  • Users online: 0 
  • Visitors today : 204
  • Page views today : 236
  • Total visitors : 240,100
  • Total page view: 346,388