Notísia foun


Timor Post (26/10/2020)—Parlamentu Nasional (PN) realiza plenária extraordinária hodi tetu hikas desizaun Prezidente Repúblika Francisco Guterres Lú Olo veta lei Protesaun Sivíl, molok órgaun daruak ne’e halo votus konfirmasaun.

Plenária extraordinária deside liu-hosi reuniaun lider bankada parlamentar sira,  hodi hala’o iha loron Segunda (26/10/2020).

Sekretaria Meza Parlamentu Nasional, Lidia Norberta esplika, tuir lei bainhira Prezidente Repúblika veta lei ruma, haruka fila ba Parlamentu Nasionál hodi hala’o votus konfirmasaun.

“Entaun Parlamentu Nasional iha solusaun rua mak tenke foti, ida konfirma  no  ida fali buka atu akomoda mós preokupasaun Prezidente Republika nian, hodi bele ajusta para hadia fila-fali lei nee hodi submete fali ba,” Deputada Lídia haktuir ba Jornalista sira.

Lidia hatete,  lei protesaun sivil mai ho forma ida proposta lei, laós projetu lei, entaun nain ba proposta lei nee mak Governu laós komisaun B.

Iha fatin hanesan,  liu-hosi entrevista, Prezidente Komisaun B, José Agostinho Siquira, alias “Somotxo” hatete tuir loloos lei protesaun sivil nee hetan ona promulgasaun  hosi Prezidente, maibé tanba iha linguajen juridika balu hanesan kalamidade neebé mak daet ba Estadu Sitiu no Estadu Emerjensia.

“Tuir komisaun nia interpretasaun kona-ba situasaun kalamidade nee regonal, maibé atu halo deklarasaun ba Estadu Sitiu no Emergensia rekezitu ida mak kalamidade, tan ida nee mak interpretasaun hanesan daet fali ba artigu 25 Konstituisaun neebé kompetensia Prezidente Republika nian”, Somotxo informa.

Somotxo dehan, nia parte hatete ona ba asesor legal sira atu buka liafuan seluk hosi kalamidade nee, para labele halo konfuzaun ho artigu 25 konstituisaun nian.

“Ami laós atu haruka fila-fali deit hanesan votu konfirmasaun, maibé tanba daet ba Estadu Sitiu ho Estadu Emergensia, hau nia opiniaun neebé hau hatoo ona ba jurista katak ami tenke buka liafuan juridiku seluk para labele halo konfuzaun ho artigu 25 konstituisaun nian neebé fó kompetensia ba Prezidente Republika ho Parlamentu atu halo deklarasaun ba Estadu Sitiu ho Estadu Emergensia”.  Somotxo afirma.

Somotxo admite, bainhira atu muda liafuan  kalamidade nee tenke liu-hosi plenaria hodi deskute, hafoin nee deputadu sira sei vota fila-fali, kuandu liu sei haruka fila ba Prezidente Republika. (azu)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 77
  • Page views today : 88
  • Total visitors : 73,009
  • Total page view: 101,346

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur