Notísia foun


Timor Post (26/10/2020) — Diretór Jerál Ministériu Negósiu Estranjeiru ba Asuntu Consulates Protokolár no Media, Juvêncio de Jesus Martins hatete, sidadaun sira ne’ebé mak sábadu ne’e la konsege ba Inglaterra, kuarta (28/10) agora arranka ona.

Ba Jornalista sira iha Edefísiu MNEK, Praia dos Coqueros, Dili, Juvêncio subliña,

Juvêncio dehan, nia parte halo ona koordenasaun ho parte MTK no autoridade sira iha aeroportu nu’udar esforsu ida governu halo ba timoroan sira ba servisu iha rai liur. Nia rekoñese timoroan sira iha rai liur hatama ona mai rai laran boot tebes.

“Tanba ne’e ami trata buat hotu-hotu kompletu husu lisensa ba Ministra no Ministra MNEK aseita, ami halo karta ba ACTL, ANTL no mós hato’o karta ba gabinete MTK nia,” Juvêncio subliña.

Nia hatutan, iha semana kotuk mosu duni persepsaun la hanesan iha parte sira iha governu laran, maibé importante liu maka timoroan sira ne’e labele sai vítima.

“Ami buka Ministru MTK to’o nia uma hodi ko’alia ho nia maibé nia desizaun mak atu adia hodi ajusta buat balun no ami rona ona katak iha ona konkordánsia entre kompañia no Ajénsia ida trata ne’e katak atu adia fali ba loron kuarta (28/10) dadeer maibé seidauk klaru, maibé sira tenke ba” Juvêncio salienta.

“Sira ba duni maibé ha’u sente triste uitoan tanba sira ba hein tiha Aeroportu balun mai hosi foho hasai osan aluga aviaun no hasai osan halo teste ba Covid-19 maibé la konsege ba, maibé sei trata hodi sira ba, tanba agora sira tenke hasai osan tan hodi ba halo fali tan teste Covid-19 ne’e atu kuarta agora bele ba, tanba teste uluk labele ona,” Juvêncio hatete.

Enkuantu Diretór Ajénsia Cammer PC, Rui Pires hatete, billete ne’e kada ema ida ho total osan $1,350 ital ne’e atu asegura sira hodi sai hosi Timor-Leste ba tama to’o iha Europa ne’ebá.

“Kona-ba presu ne’e hanesan ne’e, aviaun ne’e laiha presu, maibé atu asegura sira ne’e mak ema ida $1,350, maibé presu loloos ne’e karun liu maibé ida ne’e ami atu asegura ba sira nia viajen de’it hosi Dili tama to’o Europa ne’ebá,” dehan Nia ba Timor Post via Telefone, Segunda (26/10).

“Nebe kuarta agora sira ba ona, tanba billete aviaun ne’e booking ona ne’ebé labele dehan la ba tenke dehan ba tanba sira hakarak ba duni hodi servisu, tanba ida ne’e la’ós bisnis, tanba ida ne’e ita atu ajuda ba tanba loron (31/12) ne’e Inglaterra sai ona hosi Uniaun Europeia tanba ne’e mak ha’u esforsu ajuda ona maluk sira ne’e tama uluk ona molok Inglaterra sai hosi Uniaun Europeia” dehan Nia.

Ne’ebé ida ne’e la’ós kompetisaun hodi halo fali bisnis ba maluk sira ne’e laloos, tanba sira mós deve osan balun fa’an animal balun fa’an motor karreta hodi sira hakarak ba ne’e.

“Se ida ne’e mak estadu impede nafatin ida ne’e, ne’e estadu iha neon ka la’e serake sira la husu estadu nia osan, aviaun ne’e mós sira mak aluga laloos ha’u mak aluga, ha’u ne’e hanesan organiza de’it nudar ajénsia, agora ida ne’e sira uza sira nia kosar been mós estadu impede hotu ne’e hanusa” nia termina.

Entrretantu iha loron Sábadu (24/10), pasajeirus timoroan hamutuk 161 ne’ebé atu hala’o viajen ba Inglaterra, durante loron tomak hein aviaun iha Aeroportu Internasaional Nicolau Lobato, Komoro, Dili, maibé governu liuhusi MTK kansela tiha aviaun mai Dili.

Governu liuhusi Ministériu Transporte no Komunikasaun (MTK) foti desizaun ba kanselamentu ne’e tanba Timor Leste aplika hela estadu emerjénsia.

Ministru José Agostinho subliña, governu seidauk autoriza voo komersiál. Atualmente permite de’it voo ho karater emerjénsia. Tanba ne’e, desizaun ne’ebé nia parte foti bazeia ba konsisténsia governu nian ba aplikasaun estadu emerjénsia iha Timor Leste.

Entretantu husi parte Ajénsia Cammer PC ne’ebé organiza voo husi Aviaun Citylink, halo esforsu hotu ho koordenasaun ho Ministériu Negósiu Estranjeiru no Kooperasaun (MNEK), maibé Aviaun labele tama mai Timor tanba laiha koñesimentu voo husi MTK.

Diretór Ajénsia Cammer PC, Rui Pires ba Jornalista sira hatete, nia parte triste ho kanselamentu husi parte governu finanseiramente implika tebes ba ajénsia no viajen timoroan sira ne’ebé atu ba servisu iha Inglaterra. Nia hein katak, governu foti desizaun atu permite voo.

Nia haktuir, pasajeirus hamutuk 161 ne’e kada pasajeirus hola tiket ho folin $1.500. pasajeirus sira mesak timoroan ne’ebé uza pasaporte Portugal servisu iha Inglaterra. Sira hala’o viajen mai Timor seidauk akontese moras daet Corona (COVID-19), no sira deside fila fali ba servisu tanba tempu ferias liu ona.

Durante pasajeiru sira hein Aviaun iha Aeroportu Komoro, obrigau ajénsia tenke responsabiliza ba aihan tanba pasajeiru sira hein aviaun husi dader to’o lorokraik.

Tuir observasaun Timor Post iha Aeroportu Komoro iha tuku lima lorokraik pasajeiru sira ida-idak fila ona ba uma tanba laiha informasaun husi parte governu liuliu MTK. (Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 133
  • Page views today : 177
  • Total visitors : 78,139
  • Total page view: 109,488

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur