Notísia foun


Timor Post (20/10/2020)—Vise Prezidente Parlamentu Nasionál, Luis Roberto da Silva, hatete, governu seidauk iha planu loloos hodi fó resposta ba problema ekonomia iha rai laran iha periodu COVID-19.

“Ha’u hakarak dehan rekoperasaun ekonómia iha Timor-Leste ne’e dezde inísiu kedas ate a data ita seidauk iha planu ne’ebé di’ak tantu governu ne’ebé de’it. Governu anterior ate a data ne’e seidauk iha planu fiksu ida atu hatuur ekonómia loloos mak ida ne’ebé, ita atu rekupera mak ida ne’ebé,” Luis Roberto afirma iha debate ho membru governu iha aprezentasaun planu rekuperasaun ekonómia iha Parlamentu Nasionál, Tersa (20/10/2020).

Nia dehan, haree ba iha estadu emerjénsia ne’e governu responde osan uitoan ba komunidade iha teritóriu nasionál ne’e la’ós rekuperasaun ekonómia, maibé ida ne’e atendimentu emerjénsia atu prevene ba moras COVID-19.

“Tanba ita haree ba hanesan estadu emerjénsia ne’e ita responde ai-han ka fo osan uitoan ba ita nia komunidade ne’e la’ós rekuperasaun ekonómia, ida ne’e atendimentu emerjénsia ba atu prevene moras hadaet ida ne’e tanba ita evita tiha sira nia  movimentu. Tanba ne’e responsabilidade moral nu’udar estadu mo governu ita fo ai-han no orsamentu ba sira,” Deputadu husi Bankada KHUNTO ne’e salienta.

Nune’e, nia hatete, agora dehan rekuperasaun ekonomia ba futuru ne’e mak saida, atu hadi’a mak ida ne’ebé, setór prinsipal liu ida ne’ebé mak atu hadi’a.

Timor-Leste ne’e ate adata seidauk iha fábrika ida atu  bele produz buat ruma, halai liu ba iha setór agrikutura, atu rekupera sosiedade sira  iha vida agrikultura ne’e atu produz produtu lokal ne’ebé di’ak.

Deputadu Luis mos preokupa natar iha Vemase Munisípiu Baukau ne’ebé luan maibé populasaun sira halo tiha uma iha natar laran, ne’ebé governu nia planu saida kuandu ko’alia kona-ba rekuperasaun ekonómia.

“Governu nia planu saida kuandu ita ko’alia kona ba brekuperasaun ekonómia, natar sira ne’e bee laiha depois ita nia komunidade halo tiha uma iha natar laran, entaun atu rekupera ekonómia liuliu ba iha setór agrikultura ne’e mak hanesan ne’ebé,” nia dehan.

Nia subliña, ekonómia Timor-Leste tuun ba iha pursentu 6, bele tuun tan to’o zero pursentu bele akontese kuandu la hadi’a diak ba futuru.

“Ha’u dezavia nafatin VIII governu konstituisional ida ne’e halo nusa ba futuru bainhira kuandu OJE 2020 nian bele hodi responde ona ba tusan sira ne’e no bainhira 2021 nian mai  parlamentu aprova karik mai tenke ho planu ida ne’ebé feitu atu dezenvolve no atu hadi’a ekonómia iha rai laran,” Luis tenik.

Nia dehan, governu labele konsidera katak distribui osan uitoan no hahan ba komunidade ne’e katak rekuperasaun ekonómia ne’e Khunto la aseita, tanba ne’e laiha garantia ida ba longgu prazu ho kultu prazu.

Bainhirabestadu emerjénsia to’o ninia ninia rohan karik ne’e hotu ona, maibé hakarak ne’e governu tenke kria kondisaun ne’ebé di’ak, kria fabrika iha rai laran  para bele produz buat ruma, hodi fo semangat ba produtor agrikultor sira.

“Kuandu sira kuda ai fuan karik iha to’os laran kuu fuan karik mos atu lori ba iha ne’ebé planu tenke maka’as, marketing ne’e hanesan ne’ebé se lae ha’u kompara hanesan governu anterior hasai lia fuan ida katak povu kuda governu sosa, povu kuda governu sosa mos dala ruma ai han sira ne’e sira tau iha sira nia armajen to’o dosok de’it tanba laiha ema ida atu sosa ne’ebé presiza hadi’a mos  ida ne’e maibé ha’u fiar katak governu ida ne’e  ba futuru bele hanoin kona mos ida ne’e,” nia hakotu. (Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 498
  • Page views today : 646
  • Total visitors : 77,874
  • Total page view: 109,111

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur