Notísia foun

Imajen ne’e hatudu situasaun Kuarentena iha Kovalima. Foto TATOLI

Timor Post (18/10/2020)—José Cardoso, ne’ebé tama kuarentena bainhira komunidade sira hetan tama klandestinamente husi Indonézia iha Kovalima, iha loron Sábadu (14/10/2020) halai sai hodi ba futu tiha manu iha Merkadu.

Komunidade iha bairru  Sukabi Laran,  Aldeia Ai-Oan, Suku Lalawa, Postu Administrativu Tilomar, Munisípiu Kovalima, kaptura hikas José iha loron 17/10/2020 hodi halo kontaktu kedas ba polísia no entrega kedas ba parte saúde tanba nia seidauk kumpri hotu prazu kuarentena hodi prevene propagasaun moras daet COVID-19.

Xefe Aldeia Ai-Oan Manuel Amaral, ba Timor Post via telefone haktuir, komunidade sira hetan José bainhira fila husi manu futu, hiit ho manu mate ida no kous manu moris ida lori tama iha nia (José) nia avo nia uma, mak nia tian balun mak telefone ba parte seguransa no iha oras tuku 3:30 lorokraik polísia to’o  kedas fatin hodi halo kapturasaun.

Xefe Aldeia dehan, José nu’udar nia reinu duni maibé nia ba-mai Alas Antambua Indonézia no hela kleur ona iha ne’eba. Liu ona tinan, maibé tanba nia problema iha Alas mak nia halai fila mai Timor liu husi dalan ilegal.

“Problema iha Alas ne’eba, nia monu ho motor hamutuk ho ema nia feton, iha ne’eba ema nia feton ne’e baixa hela iha ospitál, ema nia família buka nia ne’e mak nia halai mai fali iha ne’e liu hosi dalan ilegal,”  Xefe Aldeia haktuir.

Komandante Polísia Operasaun Munisípiu Kovalima, Gaspar Mendonça da Costa, hatete, iha tinan 2018 mós nia parte rejista José nia naran tanba sempre halo problema no tama sai fronteira klandestinamente.

“Komunidade mak Kaptura iha Salele, Sukabi Laran, depois Komunidade sira hato’o kedas ba polísia UPF no  Pesoal Saúde sira mos ba kedas iha fatin refere,” Komandante Gaspar haktuir.

Fofoun komunidade sira iha Salele Sukabi Laran kaptura José no informa ba polísia no pesoal saúde halo desifektan iha Kuarentena Bairo Costa Suai depois lori José ba Sulan iha Sela Polísia Munisípiu Kovalima nune’e hodi bele halo investigasaun, no kontinua hetan kontrolu husi Parte Saude relasiona ho Prevensaun Covid-19, maibé ikus mai José halai sai tiha. (Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,264
  • Page views today : 1,811
  • Total visitors : 80,516
  • Total page view: 112,892

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur