Notísia foun


Timor Post (27/09/2020)-Eis Komandante Ein Xefe Kayrala Xanana Gusmao konsidera Premiadu Nobel da Paz Jose Manuel Ramos Horta maka sai matan no tilun ba povu Timor Leste iha funu laran, no agora mos kontinua hala’o misaun ida ne’e.

“Nia (Horta) mak uluk lori ita nia terus no susar ba mundu, hanesan mos agora,” Xanana sublina kestaun ne’e bainhira hasoru malu ho populasaun sira iha Suku Manehat, Postu Administrativu Natarbora, Munisipiu Manatuto, ho Misaun COVID no hala’o asaun karitativa.

Entretantu Horta haktuir, tinan lubuk nia iha rai liur tanba Nicolau Lobato mak haruka sira ba.

“Nicolau mak haruka ami ba liur. Liuliu iha Nova Yorke ba rai barak, dala ruma ha’u ba tuku ema nia odamatan ema la loke. Imi hatene Mandela. Ema lider boot ida iha Afrika Sul. Iha 1995, ha’u hakat an ba Afrika Sul, iha tempu ne’eba, Mandela laiha tempu. Liu tiha semana ida Mandela simu ha’u. Nia lori ha’u ba nia kuartu, nia toba tiha mak husu ha’u. Ha’u rona o lakohi atu sai husi Afrika kuandu la hasoru ha’u,” Horta haktuir.

Horta ko’alia ho Nelson Mandela nu’udar Prezidente dahuluk iha rai Afrika no husu Mandela ba Jakarta hasoru Xanana. Bainhira nia ba Jakarta, Mandela husu ba Suharto no konsege hasoru duni Xanana.

Hafoin hasoru Xanana, Mandela dehan, Xanana nu’udar lider impresivu no
Mandela admira tebes ho Xanana.

“Ha’u nunka haree Xefe Estadu ida ba vizita rai seluk ida i husu Prezidente ne’e hodi hasoru Prizioneiru Politiku ida,” Horta dehan.

Rona tiha Horta nia istoria, Xanana klarifika, iha momentu Mandela iha Jakarta, Suharto konsidera nia la’os prizioneiru politiku maibe prizioneiru kriminozu.

Xanana haktuir, Mandela dehan ba Suharto katak nia hakarak hasoru Xanana, maibe Suharto dehan Xanana prizioneiru kriminozu, maibe Mandela hatan katak, nia mos uluk ema konsidera hanesan ne’e maibe ema barak mos ba vizita nia iha prizaun. Ho ida nee, Xanana haktuir, Suharto mos ko’alia ladi’ak hodi permiti tiha Mandela ba hasoru nia. (cao)

 

Please follow and like us:

Site Statistics

  • Users online: 2 
  • Visitors today : 1,002
  • Page views today : 1,366
  • Total visitors : 143,459
  • Total page view: 205,459

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur