Notísia foun


Timor Post (24/09/2020)- Projetu 142 Governu selu ona 97 enkuantu 45 sei hein rezultadu investigasaun hosi Ministériu Públiku.

Bainhira Jornalista konfirma  iha audiénsia   públiku iha Parlamentu Nasionál (PN) Kinta (24/09)  Ministru Obras Publika (MOP) Salvador Pires hatete,  tuir lei aprovizionamentu projetu sira ne’ebé mak ho valor osan millaun ida ba leten, kompeténsia iha Konsellu Administrasaun Fundu Infraestrutura (KAFI).

“Liga ba projetu ne’e area kompeténsia ne’e ha’u nian, maibé se ita boot (jornalista) sira haree iha ita nia lei aprovizionamentu, um millaun ba leten ne’e iha Konsellu Administrasaun Fundu Infraestrutura (KAFI). Ita bo’ot sira haree projetu 142 nia montante ne’e um millaun to Cinco millaun, desizaun kona-ba finansiamentu tenke iha KAFI”, afirma Salvador.

Governante friza nia parte, se iha duni justifikasaun legal, para ita atu selu osan ne’e, nia la iha problema ba ida ne’e, tanba hanesan Ministru ida atu ezekuta osan públiku nian. Maibé,  tenke iha kontabilidade bazeia ba ita nia lei jestaun finanseira ne’ebé iha.

“Obrigasaun para orsamenta osan sira ne’ebé mak prevee ona iha kontratu sira en-kursu tanba lei hatete, nu entantu sira seluk ne’ebé seidauk iha kontratu, lei la prevee no la obriga ita atu orsamenta”, dehan governante ne’e.

Mosu lamentasaun hosi deputadu opozisaun iha audensia ho ministru katak governu bele troka, maibé planu ne’ebé mak governu ida uluk halo, tenke iha kontinuasaun, ida ne’e mak dehan ukun povu ida ne’e.

“Ba senor Ministru Obras Publika, iha loron liubá ha’u lee jornál no haree iha televizaun, katak KAFI deside tiha ona la selu projetu ne’ebé mak la iha kontratu. Sim, di’ak, tanba projetu barak ema estranjeiru mak kaer la’ós timoroan, ne’e ukun ida kapás. Senor Ministru ha’u fó ezemplu ida de’it, ahi (eletrisidade) ida iha Suai, ahi ne’e 100% tiha ona, hein de’it atu halo koneksaun, ida ne’e labele selu, ne’e ita ukun saida”, kestiona deputadu Bankada CNRT Marcos Xavier iha prosesu audiénsia.

Molok hakotu deputadu ne’e mós hein desizaun hosi prosesu investigasaun ne’ebé oras ne’e la’o iha Ministériu públiku.

“Projetu 142 ne’e iha 90 ital iha kontratu 40 ital la iha kontratu, maibé iha 2018 osan tau iha livru 3a,  maibé agora iha 2020, sira ne’ebé  mak la iha kontratu, la tau ona iha ne’ebá, ukun ne’e mak hanesan ne’e duni, tanba KAFI deside ona katak sira ne’ebé mak la iha kontratu, haruka ona ba iha Ministériu Públiku, ida ne’e mak ami hein, hanesan opozisaun ami hein katak prosesu ne’e tenke la’o, ketak prosesu ne’e lao, bele kona fali ita boot sira” dehan deputadu.(Jornalista : Julio Salinas Soares)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 351
  • Page views today : 408
  • Total visitors : 77,727
  • Total page view: 108,873

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur