Notísia foun


Timor Post (23/09/2020)-Sistema teste ne’ebé Sekretáriu Estadu Polítika Formasaun Professional no Empregu (SEPFOPE) aplika ba kandidatu Seasonal Worker Program (SWP) sai preokupasaun reprezentante povu iha uma fukun parlamentu nasionál.

Antes ne’e Prezidente Partidu Demokrátiku deputadu Mariano Sabino ‘Asanami’ kestiona sistema teste refere, tanba idéntiku ho militár no la merese atu aplika ba timoroan nune’e la kondís natureza servisu hanesan ortikultura.

Enkuantu Xefe Bankada Parlamentár CNRT deputadu Duarte Nunes, husu ba Inspesaun Jerál Estadu (IJE) atu halo avaliasaun ba SEPFOPE no observa katak Komisaun Funsaun Publika (KFP) mós ikus ne’e ladún funsiona.

                “Foin lalais iha loron hirak liu ba ne’e ha’u haree problema iha SEFOPE kona ba rekrutamentu ema atu ba serbisu iha rai li’ur, maibé nia polémika ne’e kleur ona, ha’u hanoin presiza inspesaun jerál estadu tenke halo avaliasaun ba situasaun ne’e, depois buka sistema foun  para ema hotu bele sente konfortavel, sente katak iha instituisaun estadu ida tenke kria mekanizmu ida hodi atende povu tomak,”  Duarte rekomenda liuhosi diskusaun hafoin IJE halo audiénsia ho komisaun A no C iha Parlamentu Nasionál Kuarta (23/09).

Parte seluk Duarte observa ikus-ikus ne’e CNRT nia haree komisaun funsaun públiku mós la funsiona. Duarte hato’o kestaun ne’e relasiona ho atuál Governu hahú halo ‘limpeza’ ba servisu kontratadu sira.

“Dalaruma atu muda sistema karik maibé  enkuantu sira (KFP) sei iha tenke iha responsabilidade tanba hetan finansia estadu nian. Governu atuál halo limpeza serbisu kontratadu maibé   rekrutamentu ba ministériu sira responsabilidade komisaun funsaun publika nian, tan ne’e karik bele inspesaun jerál bele haree mós ba buat sira ne’e hotu”, tenik Duarte.

Hatán ba rekomendasaun  Inspetór Jerál Estadu, Francisco Carvalho, informa  ekipa konjuntu ida hosi inspesaun jerál estadu, Komisaun Anti Korrupsaun, PDHJ no KFP halo inspesaun konjuntu surpreza ba iha SEFOPE liuliu ba iha area ne’ebé mak halo rekrutamentu.

“Ita haree foin lalais ne’e halo prosesu foun ida fali hosi SEFOPE ita haree halo ba sira ne’ebé  atu ba serbisu iha Australia ne’ebé ninia mekanizmu ne’e muda uitoan ne’ebé ita hahú asiste komesa hahú hosi Sentru Formasaun Akademia Polisia iha Komoro mak involve fali prosesu sira ne’e, ” nia esplika.

Kona bá rekrutamentu iha kada ministériu ka  jestaun rekursu umanu ne’e iha KFP nian, ne’ebé ne’e kompeténsia liu ba iha KFP.

Alende ne’e nia mós dehan to’o ohin loron parte IJE seidauk hetan pedidu ka reklamasaun balu atu haree kona ba rekrutamentu iha problema balun.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 6 
  • Visitors today : 727
  • Page views today : 1,088
  • Total visitors : 73,659
  • Total page view: 102,346

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur