Notísia foun


Timor Post (23/09/2020)—Eis Komandante Ein Xefe Forsa Armada Libertasaun Timor Leste (FALINTIL), Kayrala Xanana Gusmão hatete, serku husi inimigu iha Aldeia Binani, Suku Mindelo, Postu Administrativu Turiskai, Munisípiu Manufahi, tanba lakon iha estratejia militar.

“Ita sala boot. Loos duni katak, ita atu tiru mos ita nia kilat musan laiha ona. Maibé tuir militár nia haree, sala boot ne’e ita tama mota laran. Ami halo analiza ba faillansu sira ne’e hotu,” Xanana subliña bainhira hamutuk ho Premiadu Nobel da Paz, José Ramos Horta hala’o vizita ba Suku Mindelo, Kuarta (23/09/2020).

Xanana dehan, hafoin baze de apoiu rahun no Nicolau mate, povu barak maka rende ba inimigu.

“Hafoin harahun tiha Matebian maka inimigu mai iha ne’e buka tuir Nicolau. Ho ida ne’e maka ita lakon tiha baze de apoiu. Imi hotu tenke rende, iha Mindelu ba hotu iha Turiskai. Kleur tiha maka imi sira iha Suku Mindelu fila fali,” Xanana haktuir.

Nia dehan, Nicolau mate duni iha Binani tanba inimigu serku metin no duni to’o sai fatin laiha.

Nune’e, Xanana salienta, bainhira Nicolau mate, Sahe, Carverino, tanba iha operasaun Skylight, maka povu sira rende ho forsa sira rasik ho fasilidade funu nian balun.

Entretantu Xanana dehan, prosesu luta ba libertasaun nasional hahu duni iha tempu hirak ne’eba, timoroan sira rejiste duni ho forsa maske fasilidade funu nian limitadu, maibé ikus mai povu no rai ne’e atinji duni mehi ba ukun rasik a’an liuhusi referendum iha tinan 1999.

Tanba ne’e, Xanana rekoñese ferik katuas sira iha momentu ne’eba terus no susar tebtebs, maibé kontinua brani hodi kontinua defende libertasaun. Nune’e, nia husu ba foinsa’e sira apriende istória. Nia husu atu foinsa’e sira hakbesik-an ba ferik no katuas sira atu husu sira konta istória, no hakerek nune’e sai hanesan rikusoin ida ba jerasaun tuir mai.

Xanana husu ba Xefe Suku Mindelo atu organiza foinsa’e sira atu hala’o misaun ida ne’e. (cao)

Please follow and like us:

NOTÍSIA FOUN

Site Statistics

  • Users online: 3 
  • Visitors today : 810
  • Page views today : 984
  • Total visitors : 84,657
  • Total page view: 118,791

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur