Notísia foun


Timor Post(22/09/2020)— Ministru Finansas, Fernando Hanjam, deklara, governu ninia prezensa iha uma fukun Parlamentu Nasionál, nu’udar obrigasaun polítiku no konstitusionál, atu aprezenta no esplika ba distintu deputadu sira nu’udar reprezentante povu nian kona-ba DOT durante períodu vijénsia rejime duodecimal no ezekusaun fundu COVID iha tinan finanseiru 2020.

Total alokasaun Dotasaun Orsamentu Temporaria (DOT) ba períodu entre loron 1 fulan Janeiru to loron 31 fulan Agostu tinan 2020 ho valor 954. 5 millaun.

Ministru dehan iha ámbitu ezekusaun Dotasaun Orsamentu Temporaria, hanesan distintu deputa sira hatene ona katak, bainhira orsamentu jerál seidauk tama iha vigor, iha inisia tinan finanseiru ida, governu iha obrigasaun polítika no legal, rekorre ba dotasaun orsamentu temporaria hodi asegura funsionamentu instituisaun estadu nian.

Governante hatutan dezde kada Dotasaun Orsamentál ba despeza finansiamentu ka menus husi fulan ida no pagamentu respetiva despeza labele ultrapasa um doze anos hosi tetu orsamentu tinan anterior nian, konforme prevee iha artigu 31, lei orsamentu no jestaun finanseiru nian.
Governante subliña, ho baze ba enkuadramentu ida ne’e no hola referénsia ba Orsamentu Jerál Estadu 2019 nian, governu kada fulan fixa montante duodecimo ho valor iguál ka menus hosi 123, 5 millaun, hodi asegura pagamentu ba despeza sira, rezulta hosi obligasaun legal no kontratuál sira ne’ebé estadu assume durante períodu duodecimal.

Ho ida nee, total alokasaun Dotasaun Orsamentu Temporaria (DOT) ba períodu entre loron 1 fulan Janeiru to loron 31 fulan Agostu tinan 2020 ho valor 954. 5 millaun, ne’ebé mak distribui ba serbisu sein-autonomia administrative finanseira ka liña ministerial sira, órgaun autónomu sein-reseita própriu no serbisu fundu autonomia sira.

Ministru relata katak hosi alokasaun ida nee, instituisaun estadu hirak ne’e ezekuta ona valor 479. 3 millaun, ho kategoria orsamentál sira hanesan tuir mai;
“123. 6 millaun ba saláriu no vensimentu, 151. 3 millaun ba bens no serbisu, 2.2 millaun ba kapitál menór, 70.5 millaun ba transferénsia públiku, 120. 8 millaun ba kapitál dezenvolvimentu, no despeza sira urjénsia entrevistu ne’ebé rezulta hosi fundu rezerva kontinjénsia ho valor 10.6 millaun”, informa Hanjam ba deputadu liuhosi plenária.

Hosi despeza sira refere nia hatutan finansiamentu hosi reseita doméstika ho valor 117. 4 millaun, Parlamentu Nasionál autoriza governu halo transferénsia estraordináriu hosi fundu petróleu ho valor 316. 8 millaun no utilizasaun saldo tezouru ho valor 274. 2 millaun. Ho nune’e despeza atuál hosi períodu Janeiru to Agostu 2020, ho valor 479. 3 millaun, no reseitas total ka finansiamentu ba respetiva despeza ho valor 648. 4 millaun, durante respetivu períodu duodecimal.

Entretantu, deputada komisaun C Fernanda Lay, nia parte haree katak dokumentu ne’ebé mak komisaun C konsege strai, akumulada ate 17 Setembru 2020 governu so ezekuta de’it 49,1%, hosi montante 1.2 millaun ne’ebé deskreve.

“Agora se for 1.2 millaun, ita boot sira bele ezekuta de’it 49%, ita sira mai husu tan iha fin do ano ke falta fulan rua de’it ezekusaun kuaze 1.5 biliaun, presiza justifikasaun”, preokupa Fernanda.
Deputada CNRT deklara, hahú hosi Janeiru to’o 17 Setembru 2020, osan ba kapitál menór governu ezekuta ona 44,6%, kapitál dezenvolvimentu 21%, transferénsia 63, 1%, despeza kontinjénsia 44, 2%, tanba nee nia parte konsidera la konside ho númeru ne’ebé mak hato’o hosi Ministru Finansas. (Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,072
  • Page views today : 1,529
  • Total visitors : 80,324
  • Total page view: 112,610

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur