Notísia foun


Timor Post (16/09/2020)- Konsellu Ministru (KM) aprova ona Projetu Dekretu-Lei kona-ba rekuperasaun ekonómika hosi reuniaun iha Palasiu Governu kuarta (16/09).

“Ohin konsellu ministru aprova projetu dekretu lei ida ne’ebé aprezenta hosi Ministru Koordenadór Asuntu Ekonómiku Joaquim Amaral, ligadu ho apoiu atu rekupera no mantein atividade sira iha ámbitu rekuperasaun ekonómika”, informa Ministru Prezidensiál Konsellu Ministru Fidelis Magalhães iha Palasiu Governu hafoin reuniaun remata.

Governante ne’e esplika projetu dekretu lei ne’e objetivu atu estabelese apoiu oin rua ba entidade empregadora sira, inklui traballadór própria ne’ebé konsidera nesesária no adekuadu tebes ba rekuperasaun ekonómika.

Membru Oitavu Governu akresenta ho dekretu refere entidade hirak ne’ebé tama iha rejime kontribuitivu seguransa sosiál, inskreve tiha ona iha sistema fiskál, ne’ebé hato’o katak, sira lakon volume negósiu ka reseita no hakarak atu rekupera fali sira nia operasaun, iha direitu ba dispensa parsiál ka sorin balun hosi kontribuisaun mensal ba seguransa sosiál no atribuisaun montante pekuniariu mensal ida, ne’ebé hanaran subsídiu apoiu nian, atu rekupera ka mantein atividade ekonómika.

“Atu bele hetan asesu ba apoiu ida ne’e entidade empregador sira tenke tama ona iha seguransa sosiál to’o bainhira diploma ne’e tama iha vigor. Enkuantu emprezáriu individual sira, traballadór purkontra própria no traballadór doméstiku sira sei hetan asesu ba apoiu ne’e, mezmu foin inskreve bainhira diploma ne’e tama iha vigor, maibé tenke inskreve nafatin iha seguransa sosiál, mínimu liu fulan tolu hafoin simu apoiu ikus liu”, Ministru subliña.

Molok hakotu Ministru dehan atu bele simu apoiu ne’e, entidade sira iha obrigasaun atu halo nafatin sira nia servisu normal no loke nafatin ba públiku, no la inklui benefisiáriu hirak ne’ebé hetan impedimentu atu halo sira nia servisu normal, liu-liu kompañia aérea no ajénsia viajen sira.

“Apoiu ne’e sei simu fulan-fulan durante fulan haat tuir-tuir malu hafoin dekretu lei ne’e tama iha vigor” nia hakotu.(Jornalista” Jaime Pires)

Please follow and like us:

Site Statistics

  • Users online: 0 
  • Visitors today : 1,095
  • Page views today : 1,409
  • Total visitors : 84,942
  • Total page view: 119,216

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur