Notísia foun


Timor Post (12/09/2020)—Arsebispu Arkedioseze Metropolita Dili, Don Virgílio do Carmo da Silva, SDB inaugura estátua Saudozu DR. Lucas da Costa “Rama Metan” ne’ebé ho naruk metru tolu (3), harii iha Universidade da Paz (UNPAZ), loron Sábadu (12/09/2020).

Rama Metan nu’udar Fundador no Reitór UNPAZ, fila hikas ona ba Aman Maromak Nia Kadunan Santu iha loron 05/09/2019 tanba sofre moras kankru.

Reitór UNPAZ atuál, Adolmando Soares Amaral, haktuir, nia parte harii estátua Saudozu Rama Metan iha Universidade ne’e, iha kedas fatin ne’ebé Saudozu sei moris hatudu hela ba sira katak bainhira nia mate haloot iha ne’eba.

Adolmando dehan, loloos Saudozu nia isin mate haloot duni iha fatin ne’e, maibé iha momentu ne’eba mosu pro no kontra no tuir mós estadu nia desizaun ba haloot iha Jardin Eroi Metinaro. Nune’e, sira harii fali estátua Saudozu nian hodi kumpri saida mak Saudozu sei moris ko’alia hela.

“Ami sira ne’ebé hamutuk ho saudozu ba tempu naruk dehan la buat ida, nia isin mate bele lori ba haloot iha Metinaro, maibé hosi parte universidade tenke halo monumentu ida iha universidade, depois husu fali família bolu fali nia klamar tanba nia sei moris hakarak iha fatin ida ne’e,” Adolmando hatete ba Jornalista sira iha okajiaun inaugurasaun Estátua Saudozu Rama Metan.

Iha serimónia ne’e, Adolmando haktuir, universidade ho família nia koordenasaun di’ak tebes, maibé Saudozu nia oan sira mak la hola parte.

“Dezenvolvimentu la’o hafoin saudozu  husik hela ami, ami mai ho komitementu ida katak ami tenke halo reforma ba kualidade hadi’a sistema hotu, depois armoniza ami nia kurikulum para garante kualidade,” Adolmando subliña.

Reprezentante família Raimundo Goncalves, hatete, iha momentu Saudozu atu haloot, família hotu halo akordu ida katak bele lori saudozu nia isin mate ba halo’t iha semiteriu Metinaru hodi manan naran ida saudozu ho eroi ne’e, maibé iha tempu ida kuandu iha oportunidade sei lori fali nia fatuk tuir kultura Timor nian liuliu parte Atsabe nian lori mai entrega ba iha universidade nune’e hodi hein to’os.

Entertantu orsamentu ba iha konstrusaun hamutuk ho montante U$ 32.058,30. Kustu ba dezeñu no BOQ ba grupu 3 ho montante U$ 5.000,00, kustu mão de obra ho montante U$ 5.000,00 no kustu ba halo estatua ho montante orsamentu U$ 7.000,00. Total hotu hamutuk U$ 49.058,30.

BIOGRAFIA

Saudozu, Lucas da Costa, ho naran funu 4, Colimau, Lahe Mau, Asa-Bere no Rama Metan. Nia kuinesidu liu ho naran Rama Metan.

Rama Metan, oan mane ba dahuluk hosi maun-alin nain 5, mane 3 no feto 2. Oan mane 3 mak Lucas da Costa, Raimundo Gonçalves no Lahe-Mau. Oan feto 2 mak Sose-Mali no Bui-Rai. Rama Metan moris iha dia 11 de Janeiro de 1952, iha Atsabe, Ermera.

Nia Aman Aça Bere, hosi Uma Lisan Ai-Leco no Inan Olo Leço, hosi Uma Lisan Lako Ubu. Sira rua hotu hosi Atsabe.

Saudozu Rama Metan, hosik hela faluk na’in 3, oan na’in 7, feto 1 no mane 6 ho bei-oan sira hamutuk na’in 12. Faluk na’in 3 ne’e mak Maria Filomena da Cruz Costa, Fatima Filomena Rosa Lay da Costa no Yahyuk Veronica Rahayu, ho oan sira mak Nani Rolanda Paula da Cruz e Costa (Manoca), Jose Nilton Gomes da Costa (Toze), Leão Maususar da Costa, Ivo Colimau Lay Costa, João Bosco Lay da Costa, Miguel Lucas Lay da Costa no Liberto Geramar Maria da Costa.

ABILITASAUN LITERARIA

  1. Saudozo hahu eskola Primaria iha Colegio Infante Sagres Maliana.
  2. Saudozu eskola iha  Colegio São Francisco Xavier Dare 1961-1962.
  3. Saudozo kontinua eskola iha Seminario Nossa Senhora de Fatima, Dare, Dili, hosi 1962-1964. Sei ho otas ki’ik, saudozu Rama Metan sai ona profesor Eskola Primaria iha Atsabe, Hatolia no Bobonaro.
  4. Iha 1968 to’o 1972, Saudozo kontinua kursu de Enfermajen Jeral iha Lahane Dili ho primeiru klasifikadu.
  5. Iha 1987, Rama Metan hasai ninia Lisensiatura iha Ekonomia, hosi Universidade Pendidikan Nasional (UNDIKNAS), Denpasar, Bali. Nia hasai nia kursu iha tinan 3 resin nia laran ho  predikat Summa Cum Laude;
  6. Iha 1993 saudozu Rama Metan hasai Mestrado iha Gestão Estrategica, Faculdade de Economia, hosi Universidade Airlangga (UNAIR), Surabaya, Indonezia, ho predikat Cum Laude.
  7. Iha 1993, tanba nia konklui ninia mestradu ho Cum Laude, Universidade Airlangga rasik fo oportunidade ba nia hodi foti doutoramento. Tinan ida ho balu, hafoin nia halo hotu ona parte teoria nian, Vice Governador Timor Timur,  Yohanes Haribowo, visita ba Surabaya, dehan ba Universidade katak Lucas da Costa so bele kontinua nia estudus iha Strata 3, tenki hetan rekomendasaun hosi Governu Lokal Timor ou Instituto Superior ruma hosi Timor. Rama Metan hatene sira deskonfia nia involve iha atividade klandestina no hakarak atu impede ninia estudus, ne’eduni nia rasik lahusu rekomendasaun ba Timor. Sira hapara tiha nia hosi Universidade Airlangga durante fulan balun, Ikus mai, Universidade Wija Kusuma, Universidade nebe Rama Metan hanorin ba iha Surabaya mak fo fali rekomendasaun. Biar Universidade Airlangga admite ona hodi nia kontinua hikas ninia estudos, maibé nia tenki halo inskrisaun foun hanesan estudante foun nebe foin tama universidade. Felizmente, biar halo inskrisaun foun, Universidade Airlangga kontinua simu no rekuinese disiplinas sira nebe nia halo hotu ona. Ho nune’e, iha 1998, saudozu konklui ninia kursu doutoramentu iha area Micro Economia ho predikat Cum Laude.

KAREIRA PROFISIONAL

  1. Saudozu Rama Metan sai husi seminariu Nossa Senhora de Fatima, Dare, Dili, sai profesor no ba hanorin iha eskolas primarias iha Eskola Primaria iha Atsabe, Hatolia no Bobonaro.
  2. Iha 1974, saudozu Rama Metan nudar Enfermeiru no sai Diretor Hospital Manufahi, iha Same.
  3. Durante tempo okupasaun, hosi 1993, saudozu sai Dosente iha Universidade sira Indonezia nian, iha Surabaya hanesan Airlangga, Widya Mandala, Wijaya Kusuma, no Universitas Surabaya (UBAYA).
  4. Iha 1999/2000 saudozu Rama Metan eleitu ba Prezidente Associação dos Economistas de Timor-Leste (ASETIL).
  5. Hafoin Referendum iha 1999, saudozu fila mai Timor harii Institutu Superior de Ekonomia e Jestaun (ISEG), iha Dili, no nia sai Reitor rasik ba ISEG. Hosi ISEG, hamutuk ho Timor oan sira seluk,  tranforma ISEG no harii UNDIL, nia mak sai Reitor ba UNDIL.
  6. Iha 2000, nia harii no sai Diretor ba Centro de Gestão das Pequenas Empresas de Timor-Leste (CEGEPTIL).
  7. Iha 2004, nia fahe malu ho UNDIL tanba problema internu balun. Nia hamutuk ho ninia Companheiros sira seluk, sira harii Universidade da Paz (UNPAZ) no nia sai Reitor to’o hakotu iis.
  8. Iha 2007 to’o 2011, saudozu Rama Metan eleitu nudar Presidente Federasaun Taekwondo Timor-Leste.
  9. Iha 1998, saudozu Rama-Metan hamutuk ho ninia Companheiros sira harii Fundasaun Haburas.

INVOLVIMENTU IHA LUTA LIBERTASAUN TIMOR-LESTE

  1. Iha 1974 to’o 1975, saudozu Rama Metan sai Delegadu no Presidente do Comite Regional da ASDT/FRETILIN, iha Manufahi.
  2. Iha 1975, iha dia 15 de Agosto de 1975, saudozu hamutuk ho Timor oan na’in 42, Proklama no subscreve Inssureisaun Jeral Armada iha Aisirimou, Aileu. FALINTIL moris hosi Proklamasaun Inssureisaun Jeral Armada ida ne’e.
  3. Iha dia 17 de Agosto 1975, saudozu rasik, hamutuk ho Nicolau Lobato, Alarico Fernandes, Abel Larisina, ho seluk-seluk tan, assalta no hadau Kompainia militar Portugues nian iha Aileu.
  4. Iha 1975, saudozu Rama Metan, hetan fiar hosi FRETILIN hodi sai Responsavel Prinsipal ba Komisaun de Inquerito do Comite Central da FRETILIN (CCF) iha Aileu.
  5. Iha Fulan Setembru 1975, Rama Metan deskola hamutuk ho FALINTIL ba Atsabe hodi hala’o knar hanesan enfermeiru nomos hanorin kursus enfermajen ba Timor oan.
  6. Iha fulan Outubro de 1975, Rama Metan harii Eskola Infarmaria, primeira eskola ne’ebé Timor-Oan rasik mak harii no jere.
  7. Iha Novembro de 1975, wainhira FRETILIN forma Primeiru Governu, saudozu Nicolau Lobato, konvida Rama Metan atu sai Vise Ministru de Saúde, maibé nia rekuza. Maski nia rekuza atu sai Vice-Ministro de Saude, maibé CCF bolu nia hodi hamutuk ho Ministru Guido Valadares, dezenvolve sistema saude iha Primeiru Governu FRETILIN ne’e.
  8. Iha 6 de Dezembru 1975, bainhira forsa Indonesia tama iha Atsabe, saudozo Rama Metan muda ba Hatulia no Fatubesi hodi kontinua resiste.
  9. Iha dia 8 de Dezembro de 1975, Rama Metan hasoru malu ho Vise Prezidente no Primeiro-Ministro RDTL, Nicolau Lobato, iha Balibar, hodi husu nia fila fali ba Atsabe. Iha Atsabe, Rama Metan komanda Grupu ida hodi tiru malu hasoru forsa Indonesia nian to’o kilat musan hotu iha combate. Tuir mai nia lidera grupu ida ho naran “Antenas da Resistencia” ka “Grupu Analiza Polítika” iha Fatubesi. Rama Metan ninia knaar mak halo rezumu no halo analize politika no militar, bazeia ba notisia sira nebe Grupo ne’e halibur, hosi radiu internacionais sira hosi dalen indonesia, francês, ingles, espanhol no português.
  10. Iha inisiu 1976, liu husi radiograma, Nicolau Lobato nomeia Rama Metan ba Diretór da Cruz Vermelha  de Timor-Leste.
  11. Iha meados 1976, Nicolau Lobato haruka saudozu Rama Metan ba Sentru-Leste. Iha Waimori, Komisáriu Polítika Sentru Leste, Vicente dos Reis SAHE, fó fiar ba Rama Metan hodi lidera peskiza Fitoterapia ida hodi halo ai-moruk tradisional. Ai-moruk halo husi ai-kulit, ai-abut no ai-tahan sira. Iha Waimori mos nia harii ÓSPITAL hodi halo esperimentasaun ba ai-moruk sira. Nia halo ai-moruk musan (comprimidos) no ai-moruk been, likidus, hodi halo injeksaun ka sona ema moras sira.
  12. Iha 1977, Rama Metan mos lidera Ekipa de Cirurgião ida, hodi halo operasaun ba membro FALINTIL ida naran Marçal Monteiro, ema Ossu, nebe hetan tiru iha combate. Marçal Monteiro hetan tiru iha ninia kosteletas no borus iha hirus matan, ninia pulmaun to’o tabele sai. Ho esperiensia ne’ebé natoon, Rama Metan, lidera operasaun ne’e, suku matak de’it, no consegue salva duni pasiente nebe kanek todan no moris to’o ohin loron.
  13. Iha 1978, Rama Metan, ho komisáriu Polítiku Abel Larisina, harii kompañia ida ne’ebé lidera husi Saudozu Mau-Kalo no Abel Larisina.
  14. Iha 1978, Rama Metan lidera kompania 1 ho membrus na’in 11, hetan assaltu hosi forsa Indonesia nian. Iha assaltu ne’e, Rama Metan hetan tiru iha kabas liman los, kabun no kelen, maibé nia konsege eskapa. Tanba kanek no ninia kondisaun saúde aat tebes ona, mosu ular hosi nia kanek sira, no susar la’o.  Ho kondisaun ida nune’e, HANSIP sira hetan no kaer nia. Sira lori nia ba detein iha Barike, depois ba tutan Natarbora, no hela iha neba durante tinan 2.
  15. Iha 20 de Junho de 1988, nia uza naran Lahe-Mau,  hamutuk ho estudantes na’in 9 sira seluk, sira harii Resistência Nacional dos Estudantes de Timor-Leste (RENETIL), iha Denpasar, Bali, hodi organiza no mobiliza estudantes Timor oan sira hodi luta no reziste hasoru okupasaun Indonesia nian iha Timor-Leste. Nia la’os fundador de’it, maibé mos hanesan mestre no konseptor ba planos no estratejias sira RENETIL nian. Nia mak prepara no hakerek rasik Proclamação da Inssureição Política dos Estudante de Timor-Leste, proklamasaun ida nebe inspira hosi Proclamação da Inssureição Geral Armada iha Aileu, iha 1975.
  16. Iha 1989, Rama Metan sai Primeiru Chefe de Redasaun no Editor ba Boletin Neon Metin, primeiro Boletin Klandestina nian. Iha Boletin ne’e, nia uza naran Asa-Bere.
  17. 1990 to’o 1992, nia sai Presidente do Conselho Curador da RENETIL, orgaun ida nebe halo acompanhamento no supervizaun ba serbisu sira executivos nian.
  18. Iha 1992 to’o 1999, hafoin de militar Indonesia sira kaer saudozu La Sama ho estudante sira seluk iha Novembro 1991, Rama Metan sai Koordenador ba Prezidium da RENETIL, orgaun ida nebe hamosu hamutuk ho Comite Permanente do Conselho Central da RENETIL, hodi halo reoganizasaun no reestruturasaun ba RENETIL hafoin organizasaun ne’e hetan desmantelamentu iha 1991.
  19. Iha fulan Dezembro 1997, deskonfia Rama Metan nudar kakutak ba aktividades clandestinas sira nebe halo iha Indonezia, forsas especiais Indonezia nian, KOPASSUS, halo sequestro ka penculikan ba Rama Metan iha Surabaya. Kaer nia iha dalan, bainhira nia sai hosi uma ba universidade. Hosi Surabaya, sira lori nia ba Kuartel KOPASSUS iha Cijantung, iha Jakarta. Tahan nia durante semana 3 iha neba. KOPASSUS sira lahalo lakon nia no hosik hikas tanba lahetan evidencia forte nune’e mos tanba Indonesia hetan presaun maka’as hosi comunidade internasional. Sira lori nia ba soe hela iha aeropoto Husein Sastranegara, iha Bandung, Jawa Ocidental, depois nia fila ba Surabaya.
  20. Iha 1998 to’o 2000, Rama Metan eleito ba membru Comissão Politica Nacional (CPN) no Responsavel ba Departamentu Juventude hosi Conselho Nacional da Resistencia Timorense (CNRT). Eleito iha Konvensaun Nacional Timor oan sira nian iha Peniche, Portugal.
  21. Iha 1999, bainhira atu tama iha referendum, Rama Metan hetan fiar hosi Comissão de Planeamento e Coordenação da Campanha (CPCC) do Conselho Nacional da Resistencia Timorense, nebe lidera hosi Comandante Xanana Gusmão, hodi sai Responsavel ba Departamento de Relasaun Inter-Rejional.
  22. Iha 1999, Rama Metan nudar Timor oan ida nebe hetan fiar hodi halo parte iha Ekipa Joint Assessment Mission, nebe lidera hosi Banco Mundial. Joint Assessment Mission kompostu hosi Timor oan no internacionais sira, hodi halo planos ba Rekonstrusaun Estado Timor-Leste.
  23. Iha 2001, saudozu Rama Metan, hamutuk ho ninia Companheiros sira, harii Partido Democrático (PD). Nia sai Primeiro Presidente do Conselho Politico Nacional (CPN). Rama Metan rasik mak prepara no elabora Manifesto Politico Partido Democrático nian.
  24. Iha 2003, Rama Metan hamutuk ho ninia maluk Ermera oan sira, sira harii Fundação LAHER (Letefoho, Atsabe, Hatolia, Ermera, Railaco) nebe hamahon East Timor Coffee Academy (ETICA), agora sai East Timor Coffee Institute (ETCI).
  25. Alein de Reitor UNPAZ, iha 2007 to’o 2012, nia eleitu nudar Deputadu Parlamento Nacional hosi Partido Democrático (PD).
  26. Iha 2012, nia kandidata-an ba Presidente da Republika, tanba nia hakarak halo rekonfigurasaun ba Estado Timor-Leste. Maibé nia lakonsegue ninia mehi.

 

(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 262
  • Page views today : 372
  • Total visitors : 78,268
  • Total page view: 109,683

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur