Notísia foun


Timor Post (07/09/2020)- Ministru Prezidensiál Konsellu Ministru Fidelis Magalhães hatete, sidadaun sira ne’ebé mak simu subsídiu $200 iha fulan hirak liu ba la tuir kritériu ka dupla, ba oin sei simu medida koeziva sira ne’ebé sei monu ba sira.

“Ha’u hakarak apela públiku liu-liu ba hirak ne’ebé la tuir forma loloos benefísiu hosi apoiu umanitáriu ne’ebé governu fó iha tempu hirak liu ba sei iha tempu hosi bele devolve fila fali ba iha MSSI tanba apelu hirak ne’e Primeiru Ministru fó sai ona iha Parlamentu Nasionál, no Komisaun Anti Korrupsaun, providoria direitus humanus hosi inspetór jerál estadu rasik halo ona apelu ida ne’e. Ho ida ne’e ha’u lori governu nia naran atu apela ba sidadaun sira ne’ebé mak sente la ho forma loloos ka sira la merese maibé sira simu subsídiu $200 ne’ebé mak sira hetan tiha ona, nune’e mós ba sira ne’ebé simu dala rua ka dupla, ka sira ne’ebé saláriu liu $500 dolar maibé kontinua hetan tan subsídiu $200, favor ida bele fó fila fali ba iha MSSI atu nune’e labele iha medida kuersiva ba sira” hatete Fidelis ba jornalista sira iha Palasiu Governu, segunda (07/09).

Fidelis akresenta kuandu la kumpre ba apelu ne’ebé mak governu fó, ba oin sei iha medida koesiva sira ne’ebé mak sei monu ba sira indivíduu iha tempu tuir mai. Governante subliña simu subsídiu la tuir kritériu konsidera halo abuzu ba apoiu hirak ne’ebé mak governu fó  iha estadu emerjénsia.

Fidelis deklara, tanba objetivu ba apoiu ne’ebé mak governu fó tanba hasoru situasaun ho pandemia ne’ebé mak akontese maibé hanesan nasaun sempre fó solidariedade ba malu. Maibé  dala ruma ita abuza apoiu ho inisiativa sira hanesan ne’e ita rasik hadau oportunidade ba sidadaun sira seluk” Tenik Nia.

Fó hanoin fali katak, subsídiu $200 ne’ebé mak governu apoiu ba sidadaun iha timor laran tomak iha fulan hirak liu ba ne’e, bandu sidadaun ne’ebé saláriu liu $500 dolar atu simu, maibé realidade hatudu barak mak saláriu $500 ba leten sai mós benefisiáriu nune’e mós joven ne’ebé sidauk harii uma kain mós barak simu ba subsídiu $200 nune’e balun simu dalas rua ka simu dupla.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,252
  • Page views today : 2,100
  • Total visitors : 74,184
  • Total page view: 103,358

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur