Notísia foun


Timor Post (02/09/2020)—Loron kuarta (02/09)  (9:00) Portavós Rezisténsia Nasionál Defende Justisa no Konstituisaun Repúblika Demokrátiku Timor-Leste, Angela Freitas ho nia ekipa hakat hikas ba Komandu Jerál Polísia Nasionál Timor-Leste hodi husu adia data asaun Pasífiku ne’ebé antes ne’e termina iha dia 4 Setembru.

Informasaun  hosi Portavós Komandu Jerál PNTL, Superintendente Xefe Polísia, Arnaldo Araújo hato’o ba jornalista hafoin remata enkontru ho Portavós RNDJ-KRDTL Angela ho grupu kansela sira nia manifestasaun iha sala reuniaun kuartél jerál PNTL Kaikoli, kuarta (02/09).

“Ohin marka tan prezensa señora Angela ho nia ekipa iha ne’e ko’alia kona-ba sira atu halo demonstrasaun iha dia 4 Setembru oin mai, maibé kestaun seguransa iha rai laran, ho ida ne’e sira rasik husu atu adia fali ba iha futuru, lahatene bainhira fila fali ba sira,” informa atuál Komandante Relasaun Públika iha Komandu Jerál PNTL iha kuartél jerál Kaikoli, kuarta,(02/09).

Arnaldo adianta Komandu PNTL hein de’it bainhira-bainhira atu halo asaun pasifika ne’e, sira RNDJ-KRDTL sei mai fali hasoru ho komandu PNTL para atu determina fali data fiksu asaun pasifika sira nian.

  Arnaldo akresenta  razaun Angela kansela asaun pasifika tanba manifestante sira maka seidauk prepara atu tun mai Dili para halo asaun pasifika ida ne’e.

 Angela Freitas hatete, ho intervensaun militár F-FDTL iha nia residencia  impede sira iha fatin preparasaun konsentrasaun massa iha Tasi-tolu no halo paníku povu.

  Nia rekoñese aktu ne’e hanesan sasukat ida ba RNDJ-KRDTL atu hakat ba oin labele ho emosaun nune’e povu labele sai vítima ho kilat nasaun ida ne’e nian.

Entretantu Angela fó sai ate a data rekolla ona asinante  purvolta  rihun 287 ne’ebé deskontente ho xefe Estadu ne’ebé viola ita nia konstituisaun.

“Ita hotu hatene katak Prezidente Repúblika povu maka hili, maibé naun  dizer que Prezidente Repúblika halo konforme tuir nia hakarak, halo konforme tuir nia gostu atu viola konstituisaun. Ita hotu iha konstituisaun nia okos, hosi kedas Prezidente Repúblika to’o Ai leba, ita hotu tenke kumpre konstituisaun tanba konstituisaun maka sai mata dalan atu orienta ita nia ukun na’in sira atu ukun rai ne’e. Sé de’it maka kontra konstituisaun, ne’e inimigu povu nian, se de’it maka ukun rai ne’e sem konstituisaun e traidór da pátria”, afirma Angela.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 776
  • Page views today : 941
  • Total visitors : 84,623
  • Total page view: 118,748

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur