Notísia foun


Martinho G. da Silva Gusmão

Coordenador Nacional ba
Movimento do Patriotismo Constitucional (MPC)

Bisu-bisu dehan PPN Dr. Aniceto Guterres hakarak halo “ritual” foti hikas Mesa Presidente Parlamento Nacional (MPN) iha 30 de Agosto, loron simbólico ba consulta popular. Hare katak sei mosu confusão, “ritual” dada fali ba 4 de Setembro – mos loron simbólico ba resultado referendo nian. Fou-foun dehan atu lori ba Igreja Catedral atu fo bênção, maibe Bispo sira la hatan. Nune’e, PPN hamutuk ho SEAC sei bolu Lia-Na’in 6 atu mai hamulak hodi kasu Deputado/a sira husi Fretilin, PLP no KHUNTO nia sala; wainhira CNRT, PUDD, UDT no FM seidauk dehan buat ruma.

Liu husi discussão balun, Movimento do Patriotismo Constitucional (MPC) hanoin katak, PN no Governo halo “ritual” hanesan hola dalan extra-consticuional atu buka “bode expiatório” (kambing hitam). Probelma nebe ita hasoru, laos religiosidade ka espiritualidade, maibe inconstitucionalidade. Saida mak mosu iha PN ne’e la’os ona pecado nebe ita halo hasoru Maromak nia Ukun-Fuan ka Igreja nia doutrina, ka sala hasoru Uma-Lisan, maibe crime hasoru Estado, golpe de Estado ante-constituição.

Tanba saida mak PPN Dr. Aniceto Guterres no Deputado/a sira husi Fretilin, PLP ho KHUNTO hakarak halo “ritual” Foti Meja PN nian nebe monu rahun ne’e? Tanba saida mak VIII Governo la foti sira nia “pakar ritual” hanesan Naimori Bukar atu foti Meja PN nian ba Ramelau, maibe lori fali Representante Lia Na’in husi “ema desconhecido” balun nebe SEAC hili tuir ninia hakarak rasik? Timor-Leste ne’e hodi bainhira mak hatene “Representante Lia Na’in”, no liu husi dalan saida mak Lia Na’in ida ba representa fali “lisan” ida nebe la’os ninian rasik?

Iha Instituto Superior de Filosofia e de Teologia (ISFIT) Dom Jaime Garcia Goulart, hau halo seminar konaba René Girard (1923-2015) nia livro “O Bode Expiatório” (orginal – Le bouc émissaire”, 1982). Iha Indonesia, G. Sindhunata SJ hakerek livro “Kambing Hitam: Teoria René Girard” (2006). Girard dehan nune’e,

“Graças ao mecanismo persecutório, a angústia e as frustrações colectiva encontram uma satisfação vicária sobre vítimas que facilmente provocam a união contra elas … A vítima é um bode expiatório. […] Bode expiatório designa simultaneamente a inocência das vítimas a polarização colectiva que se efetua contra elas […] Os perseguidores fecham na ‘lógica’ da representação persecutória e não podem mais dela sair […] sem dúvida propriamente jamais participou de violência colectivas, mas ele desposa a representação persecutória que alimenta essas violências e em troca se alimenta delas; ele participa do efeito coletivo de bode expiatório. A polarização exerce tal opressão sobre os polarizados que é para as vitimas se justificar” (p. 55).

Oinsa mak teoria “Bibi-Metan” ne’e bele hakait ba halo Ritual Foti Meja Parlamento Nacional nian?

Meja Monu – “… a angústia e frustrações colectivas”

Meja monu tanba Deputado PLP ho KHUNTO mak dudu monu, depois Fretilin mak hadau poder! Ida ne’e facto inegável (kenyataan yang tidak terbantahkan). Fou-foun ne’e Partido Fretilin hananu kedas “a vitoria é certa”. Maibe, loron ba loron partido 3 ne’e hahu laran taridu no fuan fekit maka’as. Rene Girard dehan, “a angústia e frustrações colectivas” (rasa tersiksa dan frustrasi kolektif). Ida ne’e mak halo VIII Governo de facto e de jure, inconstitucional moris iha mistério doloroso nia laran.

Mistério doloroso ida uluk (1), ita sei hanoin katak General Taur Matan Ruak dehan VIII Governo ne’e CNRT baku mate, KHUNTO tanis mate, PLP mak “fo dala ida, hakoi tiha kedas”. Maibe, hare didiak afinal Partido Fretilin mak baku mate tiha VIII Governo (CNRT, PLP, KHUNTO). OGE2020 chumba, laos tan CNRT mak “vota mate”, maibe Partido Fretilin mak foti kartau mean. CNRT “abstain” ba OGE 2020. Deputada Angelita husi Partido Fretilin to’o hateten tan PM General Taur Matan Ruak “bosok-ten”. Tan ne’e Fretilin vota contra OGE2020. Ho ida ne’e, AMP mos namtate hotu.

Mistério doloroso daruak (2), ita sei hanoin PR bolu “líder nacional” atu halo “mesa redonda” hodi fo opção tolu konaba eleição antecipada; partido sira halibur malu atu hakat liu impasse; no TMR kaer nafatin PM too forma governo foun. Husi ne’e, mosu AMP IX nebe harii husi CNRT ho KHUNTO hodi bolu tan PD, PUDD, FM no UDT. Simu tiha ida ne’e, PR estuda loron kalan, ikus mai nonok de’it la hatan ba “exame de consciência”. Hare katak Partido Fretilin “parkir” hela iha liur, PR koko atu oinsa mak “uso” ho “abuso” ba nia poder atu hakawe Fretilin ho PLP hodi hamaus tan KHUNTO atu sobu AMP IX. Iha ne’e PR Lu-Olo habosok AMP IX atu halo “congresso”, maibe prepara ninia Partido Fretilin atu halo golpe de Estado.

Mistério doloroso datoluk (3), PLP no KHUNTO sai ai-tonka kulapru maibe biban duni dudu halo monu Meja Parlamento Nacional. Tuir mai, sira lori sae Dr. Aniceto Guterres ba Presidente PN. Nune’e, PLP ho KHUNTO hamutuk ho Fretilin halo “agressão física” ba Estado Timor-Leste nia soberania. PPN foun ne’e, tuir Nicolau Lobato nia liafuan karik halo hela “vergonhosa ocupação”. Tuir Constituição no Estatuto karik, Deputado/a sira ne’e funciona iha “Plenária”; PPN ne’e ninia estatuto nudar “órgão singular” hanesan hatur ona iha CRDTL artigos 84º (no. 1, 2, 3), 90º (no. 2 alinea b]), 99º (no. 3) ho 102º (no. 2). La hatene oinsa mak Constituição ho Estatuto dehan buat ida, derepente iha Regimento hatama liafuan “destituição”. Nune’e mos, la iha “justificação” lolos, teki-teki PLP, KHUNTO ho Fretilin halo “invasão” ba Meja PPN. Aat liu tan, Dr. Aniceto Guterres ba tur iha kadeira PPN nian la liu husi dalan “democraticamente eleitas” (Preâmbulo CRDTL). Halo moe liu tan wainhira TR la fo dalan ba “contestação”, tuir regra democracia pluralista (Preâmbulo CRDTL). Ida ne’e significa, Tribunal mos preparado ona atu fo liman ba golpe de Estado. Ninia resultado ita hare momos, Jornal da República dehan resultado votação 36, afinal realidade iha televisão ema hare katak 40 votos. PLP no KHUNTO hamutuk ho Fretilin no Tribunal la hanoin kona katak PD mos tau kanuru tohar iha processo golpe ida ne’e. Diak ka aat, PD ninia votos halo atu ema hotu hare katak golpe ne’e fracasso.

Mistério doloroso dahaat (4), Dr. Francisco Guterres Lu-Olo nebe uluk nudar Presidente de Assembleia Constituinte sai “fundador” ba CRDTL hatama iha vigor 20.05.2002, figura ida hanesan mak nudar Presidente da Republica sai “furador” ba CRDTL iha 20.05.2020 hodi hatama ba rai kuak laran. Discurso PR nian iha loron ne’e legitima Golpe. Hau sente “kanek”, tan PR hakruk ba General Taur Matan Ruak no liu-liu halo ninia dignidade nudar “Magistratura mais alta” atu tane metin liu fali Dr. Mari Alkatiri no Dom Naimori Bukar hodi hatun Kay Rala Xanana Gusmão. Se iha 20.05.2002 Maun Lu-Olo hakerek historia ho tinta murak-mean, iha fali 20.05.2020 Dr. Francisco Guterres hakerek ho tinta metan moruk hodi halo burado historia Timor-Leste independente ida ne’e. Loron ida ne’e mak Presidente da Republica defini kedas ona katak duet Dr. Lu-Olo ho Dr. Mari Alkatiri definitivamente mai nudar “fundador” ba liu kedas “furador”.

Mistério doloroso dalima (5), PR Dr. Lu-Olo viabiliza VIII Governo de facto de jure inconstitucional. Liu tiha loron balun, PR fo posse ba Vice-Primeiro Ministro no Ministro sira seluk. Maibe, Partido Fretilin, PLP no KHUNTO nunca “indigita” PM no PR seidauk nomeia PM, sa tan fo posse ba PM (CRDTL artigo 85º alínea d]). Liafuan “viabiliza” ne’e la existe. Iha deit liafuan “Aliança Maioria” (CRDTL artigo 85º alínea d]; ho 102º). Tanba saida mak PR tauk los?

Ho situação doloroso ida ne’e, VIII Governo de facto de jure inconstitucional hahu lakon sira nia fiar. Loron ba loron liafuan “inconfundível consciência nacional” (Nicolau Lobato) hahu kebit no kamat sira nia fuan, sira nia néon. Iha Discurso 20 de Maio de 1978, besik loron nia atu mate Presidente da República Nicolau Lobato dehan, “20 de Maio, dia de anos da FRETILIN, dia de anos do Povo Timor … um Povo que surge do desumano sistema colonial; um Povo que renasce das cinzas do esquecimento; um Povo que retoma a consciência de si mesmo; um Povo que luta sem trégua contra o expansionismo colonial indonésio e o imperialismo”.

Iha fali 20 de Maio de 2020, Presidente da República Dr. Francisco Guterres Lu-Olo halo discurso no decisivamente nia hakoi geração FRETILIN nia espirito ho alma iha tragedia golpe de Estado ida. Los duni, “golpe” internal FRETILIN nian halo PR Nicolau Lobato mate. Maibe, ohin loron golpe Fretilin2000 nian sei halo geração foun hahu ninia dalan … hau hanoin, “20 de Maio de 2020, dia de anos nova geração … uma geração sofredora que retoma a nova consciência de ser um Povo, de ser uma Pátria … Timor-Leste ukun rasik-an”.

Lia-Nain ho Ritual: “mecanismo persecutório”

Interessante saida mak Rene Girard dehan: “Os perseguidores fecham na ‘lógica’ da representação persecutória e não podem mais dela sair […]”. Atu dehan, PLP ho KHUNTO hamutuk ho Fretilin sai hanesan “perseguidores”, ka sukit tuir ema nia salan iha processo democracia. Sira taka metin an iha “logica” katak sira nia hahalok mak los liu no diak liu. Maibe, sira nia liafuan no hahalok hanesan bobar fali sira nia moris. Nune’e ba oin mos la diak ona, fila mai kotuk mos la hetan ona.

Dalan atu sai husi “rasa tersiksa dan frustrasi kolektif” ne’e mak halo sira buka “mecanismo persecutória” (mekanisme penyiksaan). Ida ne’e mak hanaran “o bode expiatório” (kambing hitam). Tuir hau nia observação, órgão de soberania (PR, PPN foun, PM no PTR) halo uluk Kay Rala Xanana Gusmão nudar “bode expiatório”. Fou-foun hau hanoin katak la fo posse ba Ministro 9 ne’e buat los (moralmente), maibe hare fali katak PR laos Padre nune’e hau hanoin katak constitucionalmente, nia halo foer ona ninia “soberania” nudar Magistratura mais alta iha Timor-Leste. Tuir dalan, PR haruka ona carta ba PM atu “pondera”, nune’e wainhira Taur Matan Ruak hatudu nafatin ninia membro ba VIII Governo, la iha dalan seluk tan … PR tenki fo posse. Maibe, tan sa mak liafuan “hatama gaveta” ne’e mosu? Xanana hirus boot! Ida ne’e mak sai “kambing hitam” (scapegoat) dahuluk. Hodi liafuan seluk, PR ninia knar mak hametin “independência nacional, da unidade do Estado e do regular funcionamento das instituições democráticas” (CRDTL artigo 74º, no. 1). Maibe, buat hotu nebe nia halo somente atu garante deit Dr. Mari Alkatiri no ninia partido Fretilin2000. Espirito heroísmo FRETILIN nian lakon tiha.

Tuir mai, mecanismo persecutório hahu fali liu husi “mesa redondo” (Maun Lu-Olo, Taur Matan Ruak no Lere Anan Timor, hamutuk ho Mari Alkatiri, Ramos Horta no Roque Rodrigues). Kay Rala Xanana Gusmão sai nafatin “bode expiatório” tan de’it nia la participa iha sorumotu alto nível ne’e. Maski la tur hamutuk iha neba, maibe Xanana simu hotu kedas resultado hodi lakohi ona husu “eleição antecipada”. Posição Xanana nian (no CNRT) mak eleição foun. PR Lu-Olo mak tauk! Nune’e PR formula opções 3 nudar “mecanismo” foun nebe, infelizmente, atu buka de’it “bode expiatório”. Xanana Gusmão koko duni atu hari’i AMP IX! Maibe, PR Lu-Olo nonok de’it; lohi mata-matak tan Xanana atu halo “congresso” hodi hetan legalidade ba AMP IX. Maibe, liu husi “estuda lai”, ikus mai PR lori documento sira ne’e “hatama gaveta”.

PR Lu-Olo halo nafatin “mecanismo persecutório” hodi koko hikas Taur Matan Ruak ba hamutuk ho Mari Alkatiri liu husi “nota de entendimento Hotel Timor”. La kleur de’it, Mari Alkatiri bele selok sai Naimori Bukar husi AMP IX hodi fila ba VIII Governo. Maibe, Xanana sai nafatin hanesan “bode expiatório”. Tanba saida? Tanba Naimori Bukar dehan CNRT ba ameaça nia, tan ne’e nia tenki ba hamutuk ho Taur Matan Ruak no Mari Alkatiri. Nune’e iha “impasse politica” ne’e sira hotu halo sala — Mari Alkatiri, Xanana, Taur Matan Ruak no liu-liu Lu-Olo! Maibe, ida mak sai “kambing hitam” — Kay Rala Xanana Gusmão. Mari Alkatiri sai tiha “menino bonito” hodi hamnasa hare Lu-Olo ho Taur Matan Ruak halo jogo foer ba Xanana.

Tanba saida mak la “viabiliza” IX Governo, maibe VIII Governo fali? Tanba Mari Alkatiri hakarak Fretilin mak ukun liu husi saida mak Niccolò Machiavelli dehan ho lian Italiano “libido dominandi ad ogni costo” katak nafsu berkuasa dengan segala cara. Ka, baibain dehan “o fim justifica meios” — tujuan menghalalkan cara. Nia hatene ona katak, Partido Fretilin mesak sei la ukun. Alkatiri hatene katak iha historia mundo nian, único Fretilin mak sai hanesan Partido revolucionário nebe ukun tinan 4 de’it. Partido revolucionário barak mak ukun tinan 50 ba leten, Fretilin mak mehi too tinan 50. Husi eleição ida ba eleição seluk, Alkatiri no Lu-Olo hetan hela de’it “mais votado” maibe nunca sai “maioria”. Dalan ida de’it — halo golpe de Estado. Aproveita ai-tonka kulapru hanesan PLP ho KHUNTO, Mari Alkatiri hakarak han-isin, susu bokur, xupa ruin … mohu. VIII Governo hela naran de’it. Taur Matan Ruak bok aan ladiak. Lu-Olo ko’alia mak la diak.

Halo nusa ba mos, too ikus, Lu-Olo ho Alkatiri labele ona lori Fretilin atu choque Xanana. Xanana la’os ona “bode expiatório”. Loron ba loron Xanana fila ba Povo, identifica nia-an ho Povo. Ema hahu hare katak Fretilin mos sai ona “vitima”. Ema hatene momos ona katak Xanana labele ona sai “kambing hitam” ba Fretilin nia fracasso. Tan ne’e mak René Girard dehan, mosu “anomal, … é, ao mesmo tempo, nobre e maldado, sacer [= sagrado]”. Ne’e katak Alkatiri ho Lu-Olo halo Fretilin kudeuk (handicapped). Buka atu fo sala ba Xanana, maibe la hetan ona!

Hakarak ka lakohi, tenki buka solução. Tan labele ona fila ba dalan constitucional, PPN ho SEAC koko dalan extra-constitucional. Dalan nebe di’ak liu mak liu husi Igreja Católica. Hodi husu ba Bispo sira atu fo bênção ba Mesa Parlamento Nacional, Deputado/a no liu-liu sira nia Presidente de facto, bele resolve inconstitucionalidade nebe bobar no bebeur hela sira nia consciência nacional. Maibe, Bispo sira hamutuk ho Padre barak hare katak solução nebe PPN Dr. Aniceto Guterres foti ne’e hanesan “mecanismo persecutório”. Igreja la’os “bode expiatório”. La’os dehan katak Igreja contra Estado ka la gosta makaer-ukun sira. Lae! Saida mak Bispo sira hatudu – mak Igreja lakohi hakruk ba Partido politico sira nebe sobu soberania Estado no hatun dignidade Nação nian. Igreja hakarak hatudu katak “[…] o mais importante da Lei: a justiça, a misericórdia e a fidelidade” (Mateus 23, 23). Movimento Patriotismo Constitucional (MPC) sai hanesan acção concreto nebe Igreja Católica halo atu salva Constituição no hametin fali Estado. La hamonu!

Nune’e, desesperadamente PPN no VIII Governo de facto de jure inconstitucional lori hikas ba Lia-Na’in sira. Ida ne’e mos hanesan mecanismo persecutório hodi halo “bode expiatório”. Tuir lisan lolos nian, Lia-Na’in ne’e ko’alia iha sira nia Uma Lisan rasik, sira nia Uma Lulik laran. La iha Lia-Na’in ida mak hamulak no harohan iha fatin seluk. Nune’e mos, Lia-Na’in la harohan ba “ema liur”. Lia-Na’in husi Macassae la harohan ba ema Fataluku; nune’e mos Lia-Na’in husi Fataluk la ba halo adat iha Mambae; Lia-Na’in husi Mambae la ba harohan tuir lisan Kemak ka Bunak, Bunak ho Kemak sei la halo lisan tuir Baikeno nian.

Saida mak PPN no SEAC atu halo ne’e tuir matenek na’in Friedrich Nietzsche nia liafuan karik dehan, “Umwertung aller werte” ka reavaliação ba valores tomak. Buat nebe diak no furak, riba tun fali ba aat no foer; buat nebe kmanek no kmook, sai fali rahun no dodok. Ho ida ne’e hau hakarak dehan katak PPN/ SEAC baku rahun hotu lisan Timor nian hodi halo fali lisan foun nebe Timor-oan sira la hatene tuir ona. Hau hanoin, dalan los lia los mak Deputado/a sira fila ba ida-idak nia Uma-Lisan no Uma-Lulik hodi rona sira nia Lia-Nain atu kasu tiha sira nia salan tomak, liu-liu hahalok aat nebe hamonu tiha ona “Mesa Na’ilulik, Ran Liurai, Nação Santa, Povo nebe Maromak rasik mak halo sira Ukun Rasik-an”. Hare tuir tiha sira nia Lisan ida-idak mak sira fila mai hodi kaer ukun. Wainhira la halo tuir sira nia lisan rasik, babeur sei la husik sira.

Tanba saida? Matenek nain seluk naran Paul Ricouer ko’alia konaba “núcleo ético mítico” – ka, valor ho norma kdasar, sasukat nebe hametin comunidade ida. Uma-Lisan no Uma-Lulik ne’e simbolo no valor comunidade ida-idak. Ema husi Lorosae nebe tur iha PN, sira fila hotu ba sira nia Uma-Lisan no Uma Lulik iha Lospalos, Baucau no Viqueque; sira husi Loroklaran, fila ba Manatuto, Same, Ainaro, Aileu no Dili; sira husi Loro-monu fila ba Ermera, Liquiça, Suai, Bobonaro no Oe-Cusse. Kasu hotu sira nia salan, ho fuan mos no laran mos fila mai tur iha Parlamento Nacional no Governo, inclui PR no PTR.

Lori Lia-Na’in mai atu halo ritual, hamulak no harohan iha PN … hanesan de’it halo palhaçada política (lelucon politik; badut-badut politik). Tan saida mak Lia-Na’in sira ko’alia sei halo hamnasa deit ema nebe lisan la hanesan. Ida ne’e hanesan saida mak René Girard dehan, “ele desposa a representação persecutória que alimenta essas violências e em troca se alimenta delas; ele participa do efeito coletivo de bode expiatório. A polarização exerce tal opressão sobre os polarizados que é para as vitimas se justificar”.

Conclusão

MPC hakarak fo hanoin katak, Povo Timor tenki foti lian no loke néon matenek hodi hatur hikas Constituição RDTL nian iha nia fatin lolos. Povo Timor labele tan ona simu Makaer-Ukun sira nebe hatene de’it halo problema no la hatene resolve problema. Movimento sira seluk hakarak hatun Estado, ne’e la’os MPC ninia visão no missão.

Bispo sira iha Conferencia Episcopal Timorense (CET) fo knar ba MPC. Movimento ida ne’e ninia nível mak halo “educação cívica”, tuir Gaudium et spes: 75. La los wainhira ema balun ba bosok mata-matak iha publico, katak MPC serviço ho sira atu hatun Estado. La los hotu, se MPC halao seminário ka conferencia iha fatin oi-oin atu hatun Governo. La iha nada!

Liu husi ninia actividade, MPC hakarak prepara Povo atu hanoin pontos hirak tuir mai:

1) MPC sei la aceita “eleição antecipada”. PR hili dalan ida de’it – “reeleição” ka “novas eleições”. Ne’e katak, tinan 2021 PR convoca eleição la’os ba PN deit maibe mos PR. Razão – povo bele ba halo eleição tinan-tinan, maibe wainhira PR Lu-Olo nia partido Fretilin la ukun, maka nia hamutuk ho Mari Alkatiri sei halo “barulho” la hotu rai. Depois sira na’in rua tur hanesan “menino bonito”, goza iha ema nia matan wen no terus halerik nia leten. Maibe, wainhira PR hanoin katak labele halo eleição foun, ne’e MPC sei hakruk. MPC sei la halo demonstração.

2) Fila ba dalan constitucional atu resolve “patina politica”. Dalan mak halo ka hari’i Aliança Maioria Parlamentar – Fretilin, PLP ho KHUNTO liu husi “congresso partido” no la’os “nota entendimento” de’it. AMP foun (Fretilin-PLP-KHUNTO) hamutuk “indigita” PM (husi Partido mais votado Fretilin) “ou” husi Aliança; hotu tiha hato’o ba PR atu “nomeia” no ikus mai fo “posse”. Labele ona “viabiliza” tiha VIII Governo, maibe to’o agora PR seidauk nomeia PM no fo posse; liu-liu partido Fretilin-PLP-KHUNTO seidauk indigita Taur Matan Ruak atu sai PM.

3) PPN Dr. Aniceto Guterres no Vice PPN Luis Roberto ho Angelina Sarmento tenki hola “posse” no halo juramento atu ukun PN. Laos ba halo cerimonia extra-constitucional juramento Ramelau fali! Lae!

4) Hadi’ak tiha Jornal da Republica atu hodi tau resultado votação la’os 36, maibe 40 votos; hatur mos acta apuramento eleição PPN foun, anexa mos processo “contestação”. PTR Dr. Deolindo dos Santo ne’e eis-comissario iha CNE (hamutuk ho hau), nia hatene oinsa mak aplica regra internacional konaba “free and fair election”. Se lae, publicidade dos atos (CRDTL artigo 73º) ne’e inconstitucional. Tan, sura mos votos husi PD nian.

Claro, PR ho PPN hamutuk ho PM no PTR sei la aceita MPC nia hanoin. Se nune’e duni, MPC hanoin nafatin katak VIII Governo ida be “viabilizado” ne’e, de facto e de jure inconstitucional. Liu husi ritual Lia-Na’in, ka liu husi Estado ninia “profeta falso” Naimori Bukar, ita sei la resolve Mesa Parlamento Nacional. Basá, problema la’os Igreja mak halo, la’os Povo mak halo. Estado monu, tan força politica sira halo golpe hasoru Estado rasik. Agora, hatudu momos ona – Kay Rala Xanana Gusmão sai de’it “bode expiatório” ba brutalismo no vandalismo politico Fretilin, PLP no KHUNTO ninian. Dalan ida de’it – soru motu ba dame, néon ida de’it. PR, PN, Governo no Tribunal labele tan ona halo “mecanismo persecutório”.

Please follow and like us:

NOTÍSIA FOUN

Site Statistics

  • Users online: 3 
  • Visitors today : 965
  • Page views today : 1,363
  • Total visitors : 80,217
  • Total page view: 112,444

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur