Notísia foun


Timor Post (25/08/2020)—Sekretáriu Jerál Partidu Demokrátiku (PD), António da Conceição alias KALOHAN akompaña Líder Nasionál Kayrala Xanana Gusmão iha Misaun COVID ne’ebé hala’o iha Suku Suniufe, Sub-Rejiaun Nitibe, Rejiaun Administrativu Espesial Oekusi Ambeno (RAEOA).

Misaun COVID nu’udar inisiativa Líder Nasionál Kayrala Xanana Gusmão ne’ebé hala’o tanba atake moras Corona (COVID-19) iha mundu no konsege hamate ona ema rihun ba rihun iha nasaun liu atus no moras ne’e bele alastra mai Timor Leste. Tanba ne’e, asaun ne’e nu’udar asaun prevensaun atu populasaun tomak tau atensaun liuliu iha área fronteira.

Ba Jornalista sira, KALOHAN dehan, asaun ne’ebé Xanana inisia ne’e hatudu nu’udar líder nasionál ne’ebé la kole defende nia povu ba moris di’ak.

Tanba ne’e, KALOHAN subliña, nia deside husi Dili ba Oekusi hodi fó apoiu total ba inisiativa líder nasionál nian hodi salva povu husi ameasa pesti corona iha Timor Leste.

Xanana ho misaun ne’e sei haleu timor laran tomak. COVID-19, konsideradu hanesan funu invezivel ne’ebé la hanesan ho funu durante tinan 24, tanba iha tempu liu ba funu ema ho ema lori arma funu nian, maibé moras ida ne’e daet ba ema ida ba seluk ho fasil tebes bainhira sidadaun sira la tau atensaun sériu.

Iha intervensaun, Xanana husu ba populasaun tomak atu labele halo movimentasaun tama sai fronteira ho Nusa Tenggara Timur (NTT)-Indonézia tanba iha nasaun viziñu ne’e ema mate barak ona tanba moras daet ne’e.

Xanana dehan, Timor Leste só iha moras ne’e bainhira tama husi rai liur. Maibé estadu aplika hela estadu emerjénsia no fiar katak liuliu iha fronteira taka odamatan metin ba movimentu ilegal sira.

Nia hatutan, aimoruk ba moras ne’e seidauk iha halo nasaun hotu iha mundu preokupadu. Nune’e, iha Timor Leste tenke halo antisipasaun atu nune’e ho lulik Timor no Maromak nia tulun la daet ba timoroan sira iha rai laran.

Iha Suku Suniufe, populasaun sira simu Xanana ho kultura rai ne’e nian.

Suku Suniufe nu’udar suku antigu ne’ebé dezde tempu okupasaun ho kedas naran ne’e no eziste ho aldeia hamutuk tolu inklui, Aldeia Cavana, Oeldanoe, Faobano.

Suku ne’e ho total xefe família hamutuk 569 no total ema tantu feto no mane hamutuk 2031. Komunidade sira iha suku ne’e depende ba agrikultura liuliu halo toos. Maske rai ne’e tetuk no luan tebes  maibé labele halo natar tanba bee laiha. (cao)

Please follow and like us:

NOTÍSIA FOUN

Site Statistics

  • Users online: 11 
  • Visitors today : 469
  • Page views today : 585
  • Total visitors : 79,721
  • Total page view: 111,666

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur