Notísia foun


Timor Post (20/08/2020)—Vise Xefe Bankada CNRT, Patrocínio Fernandes, hatete halo uma ba deputadu la nesesáriu ba CNRT tanba la tuir kompromisu eleitora partidu CNRT.

Patrocino, rekoñese planu atu hari edifísiu foun Parlamentu Nasionál nian ne’e kleur tebes ona maibé kona-ba atu halo uma ba deputadu sira, CNRT konsidera la iha nesesidade.

“Iha kompromisu eleitorál partidu CNRT nian iha Timor laran tomak nunka kolia kona-ba atu halo uma deputadu sira, tanba nee ba partidu CNRT agora la iha nesesidade atu halo uma ba deputadu sira. CNRT ninia kompromisu eleitorál nee mak estrada rural sira, bee moos, eletrisidade, edukasaun no saúde ba povu sira. No kompromisu sira nee hatuur iha programa oitavu governu”, Patrocínio friza ba jornalista sira iha PN, kuarta (19/08).

Nia hatutan se hakarak atu halo uma, nusa la halo uluk uma ba profesores iha eskola sira, para profesores sira bele hela besik, nune’e hamenus distánsia, para sira bele hanorin ho di’ak hodi prepara ita nia kualidade rekursu umanu.

Nune’e mós halo uma ba iha Ospitál sira, para pesoál saúde sira bele hela besik hodi halo atendimentu ho di’ak.

Antes ne’e iha sala konferénsia Parlamentu Nasionál (PN), Prezidente Parlamentu Aniceto Guterres, hatete idea ka planu atu halo edifísiu foun PN nee, la’ós nia parte mak inisia, maibé hahú kedas iha primeiru lejizlatura Prezidente Parlamentu Nasionál Francisco Guterres “Lu Olo” no Segunda lejizlatura Prezidente Parlamentu Nasionál saudozu Fernando Lasama, konaba ba uma ba deputadu ne’e mehi ida.

“Hanesan mehi ida, iha kompleksu nia laran nee bele mós harii rezidénsia ba deputadu sira, ate hanoin mós atu krese ba funsionáriu no deputadu/a sira nian oan bele instala hotu, inklui klínika Parlamentu Nasionál nian, restaurante no mini sentru komersiál sira, ne’ebé mak sai kompleksu boot ida. Buat sira nee hotu vizaun de’it,” dehan Aniceto.

Aniceto tenik, hanesan Prezidente Parlamentu hato’o deit vizaun kona-ba edifísiu Parlamentu nian, maibé desizaun ikus Parlamentu tomak mak halo desizaun, tanba Prezidente Parlamentu iha votu ida de’it.

“Ha’u hanesan Prezidente Parlamentu hato’o de’it vizaun, orasida iha realizasaun nee klaru la’o tuir ninia prioridade. Mais hanesan mehi ida ita tenke prevee mós ba oin, to momentu ida se ita hakarak halo buat hotu iha kompleksu ida nee mais integradu, entaun ita tenke prevee kedan mós espasu,” Aniceto afirma.(Jornalista: Julio Salinas Soares)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 289
  • Page views today : 414
  • Total visitors : 78,295
  • Total page view: 109,725

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur