Notísia foun


Timor Post (14/08/2020)—Komandu  Polísia Munisípiu Baukau servisu hamutuk ho Forsa Rejerva no Komponente Terrestre FALINTIL-Forsa Defeza Timor Leste (F-FDTL) kaptura ona suspeitu na’in-haat ba kazu sunu uma iha Nunira, Postu Administrativu Laga.

Autor hirak ne’e kapturadu iha fatin la hanesan iha área Baukau nian bainhira polísia no forsa sira duni tuir hafoin sunu no estraga uma no sasan komunidade sira nian iha Nunira iha loron Kinta dadersan nakukun (12/08/2020). Autór na’in-haat ne’e autoridade sira sulan ona iha sela detensaun Komandu Polísia Baukau hodi submete ba interogatóriu dahuluk iha Tribunál Munisipál Baukau.

Tuir dadus, uma hamutuk haat no baraka komunidade sira nian hamutuk sanulu resin mak hetan sunu no uma seluk hetan estragus total. Motor ida hetan sunu no karreta ida hetan estragu no konsege hakanek komunidade sira.

Komandante Polísia Munisípiu Baukau, Suprerintendente Xefe Armando Monteiru hatete, akontesimentu sunu no estranga ne’e akontese bainhira uma na’in sira sei toba hela.

“Ita hola medidas preventiva no medidas intervensaun ida ne’e ita kaptura autor na’in-haat agora dadauk iha sela detensaun no ita mós identifika autor balun ne’ebé mak agora dadauk sei iha komunikasaun no kordenasaun di’ak hela ho autoridade lokál, balun agora dadauk komunika ona  no atu voluntariamente entrega-an hodi responsablidade ba aktus sira ne’ebé mak sira halo,” Komandante Monteiro ba Timor Post, Sesta (14/8/2020) iha nia kna’ar fatin.

Komadante esplika motivu akontesementu ne’e iha relasaun ho problema pasadu. Iha momentu ne’eba mezmu autoridade lokal no seguransa  halo ona dialogu dala tolu ba problema refere hodi hetan solusaun maibé kontinua  mosu provokasaun hosi parte balun ikus mai rezulta uma komunidade hetan sunu no estraga.

“Problema ida ne’e tuir informasaun ne’ebé PNTL kolekta hanesan provokasaun hahú iha 2019 liu ba oinsá atu bele dominasaun iha area hahú husi merkadu Tiriloidae depois husi ida ne’e mosu komflitus entre ita nia suku tolu Libagua, Samalari tantu mós mai Nunira,” Monteiro haktuir.

Monteiro hatutan, loloos problema ne’e hetan ona solusaun maibé tanba ho mosu pesti corona (COVID-19) maka kontinuasaun ba hakotu problema ne’e paradu tiha. Nune’e mós tanba entre parte sira balunkontinua rai ódiu ba malu maka ikus mai mosu akontesimentu ne’e.

Entretantu, Jornalista Timor Post via telefone ho Xefe Suku Nunira, Nilton de Sousa Gama haktuir, vítima husi uma haat ne’ebé hetan sunu agora dadauk hela provizóriu iha família sira nia uma. No  hetan ona tulun emerjénsia husi governu liuhusi ministériu solidariedade sosiál no CVTL.

“Oras ne’e dadauk ha’u hamutuk ho sira husi MSS, CVTL fahe hela sasan emerjénsia ba sira atu augenta hodi hein azudu seluk, tanba dadaun ne’e sira sei hela provizória iha família sira nia uma,” Nilton haktuir.

Hafoin akontesimentu ne’e, Komandu Polísia Munisípiu Baukau estabelese kedas postu vizilánsia iha fatin akontesimentu atu garante paz no hakmatek. (gut)

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,633
  • Page views today : 2,394
  • Total visitors : 83,606
  • Total page view: 117,437

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur