Diariutimorpost

Timor Post (30/07/2020)- Embaixador Austrália ba Timor-Leste,  Peter Robert ho Prezidente  Parlamentu Nasionál,  Aniceto Guterres,  hasoru malu iha loron Kinta (30/07/2020) hodi deskute kona-ba kooperasaun entre parlamentu Austrália  no Timor-Leste.

Hafoin sorumutu, ba Jornalista sira Peter hatete, nia parte sente kontente, bele hasoru malu ho Prezidente Parlamentu, tanba parlamentu Austrália  iha kometimentu atu serbisu  hamutuk ho Parlamentu Timor-Leste.

“Ha’u sente konte tebes, hasoru  malu ho Prezidente Parlamentu, tanba Austrália no Timor-Leste viziñu. Ha’u  iha kometimentu kontinua haforsa no hametin  kooperasaun no ligasaun  entre Parlamentu Timor nian no Parlamentu Austrália nian”, Peter informa.

Nia dehan, iha tinan  kotuk, iha interkambiu barak, deputadu husi Austrália vizita  parlamentu Timor-Leste, no deputadu husi  Timor-Leste,  vizita ba Austrália.

No tinan ida ne’e, difisil oituan ba Deputada  sira atu halo viajen, tanba Corona  Virus.

“Maibe, ha’u  fiar  katak, iha futuru bele hametin liu kooperasaun ne’e”, Peter  afirma.

Peter admite, iha sorumutu ne’e, parte rua koalia konaba programa balun Kona-ba serbisu  kontinuasaun entre  parlamentu  rai rua.

“Iha programa balu, entre parlamentu, hanesan  Deputada feto Timor  no Austrália nian, kria ligasaun foun atu suporta malu. No programa  ne’e  importante  duni, no mos iha programa  ida atu suporta Deputados Joven husi Austrália mai Timor-Leste no Timor-Leste ba Austrália, atu fahe esperensia, nune’e bele aprende ba malu. No bainhira  halo interkambiu hanesan ne’e, Timoroan bele komprende liu Kona-ba Austrália no Austrália  nia politika nain bele komprende liu Kona-ba  Timor-Leste. Ha’u  fiar  katak, ligasaun hanesan ne’e, importante duni, tanba  presiza serbisu hamutuk,” Peter sublina. (Jornalista Julio Salinas Soares)

Please follow and like us: