Notísia foun


Timor Post (17/07/2020)-Sekretáriu Estadu Juventude no Desportu no Abrão Saldanha, hatete realizasaun kongresu estraordináriu Liga Futeból Amadora (LFA) sei realiza iha fulan Agostu, enkuantu kontinuasaun liga sei halo iha tinan rohan.

“Ohin prezidente liga ho nia ekipa mai atualiza informasaun mai SEJD, entaun konkorda malu ona oinsá mak atu hahú reabertura liga ne’e,  no kongresu  órgaun liga ne’e rasik tanba mandatu estrutura liga nia ne’e remata ona iha tinan kotuk,  órgaun liga iha ona planu atu realiza kongresu ne’e iha fulan Agostu. Nune’e mós estadu agora moris hela iha osan dua désimu to’o agora, entaun to’o fulan Outubru ami hare oinsá mak tau osan hodi realiza fali liga ne’e iha fin do ano ” informa Sekretáriu Estadu iha enkontru dahuluk durante mandatu ho estrutura órgaun LFA.

Iha sorin seluk Prezidente Liga Futeból Amadora (LFA) Nilton Gusmão hatete, reuniaun ida ohin ne’e atualiza de’it informasaun liga nia durante ne’e ba sekretáriu estadu juventude no desportu foun, tanba liga futeból amadora ne’e hetan osan hosi estadu.

“Ami iha devér atu mai atualiza ami nia servisu sira ami halo iha pasadu no mós ba futuru nian SEJD mós nakloke tebes no mós iha planu ne’ebé di’ak atu oinsá dezenvolve desportu iha rai laran” hateten Nilton Gusmão.

Nain ba kampaña Esperansa Timor Oan (ETO+) hatutan liga amadora époka  ne’e seidauk realiza to’o agora  tanba hasoru moras covid-19, enkuantu  mandatu hotu tiha ona.

Gusmão haktuir, uluk hanoin atu halo kongresu ne’e iha fulan Marsu maibé tanba covid-19 entaun tenke adia, entretantu  planu ne’ebé mak ami iha sei realiza fali kongresu ne’e iha loron 15 fulan Agostu.

 “Informa ona ba sekretáriu estadu no nia mós konkorda ona ho loron ne’e hodi bele kontinua ona epoka (LFA) dalimak ne’e”, hateten Nilton.

Prezidente LFA ne’e afirma hanesan prezidente nia parte hakarak tenke realiza nafatin atividade liga époka dalimak iha tinan 2020 ne’e hodi atividade anuál ne’e labele failla, tanba nia sente jogadór no futebolista sira deskansa kleur liu ona, tanba ne’e liga tenke halo iha tinan ne’e. Maibé Nilton rekoñese   estadu moris hela ho rejime duadesimu entaun laiha buat hotu-hotu halo iha rejime duadesimu.

“Ami iha esperiénsia ida bainhira iha tinan 2016 estadu moris ho rejime duadesimu mós liga la’o hela, tanba ne’e mak ohin ami informa ba sekretáriu estadu entaun nia mós hare ba esperiénsia ida ne’e sei lori ajenda ida ne’e ba komité revizaun orsamentu atu diskute hodi hare oinsá mak liga ne’e tenke la’o nafatin” tenik Nilton.(Jornalista: Jaime Pires)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 189
  • Page views today : 260
  • Total visitors : 80,856
  • Total page view: 113,388

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur