Notísia foun


Timor Post (12/07/2020)—Vise Ministru Saúde, Bonifácio Maucoli dos Reis, hatete taxa mate (mortalidade) inan no oan iha Timor-Leste (TL) kada tinan kontinua rejista as.

“Taxa mortalidade sei kontinua as iha Timor-Leste, ita hatene katak iha tinan 2016, tuir peskiza husi Demography Health Survey (DHS), sei hatudu nafatin númeru as, ne’ebé mak ita hare katak 195/100 ne’ebé mak taxa mate. Ida nee signifika katak loroloron sempre akontese nafatin inan ne’ebé mak mate tanba partu. Depois 41/100 husi labarik sira tinan lima mai kraik taxa mate.

Timor-Lesteiha nasaun sudueste aziátiku, inan no oan taxa mate nee sei as liu”, Bonifácio informa ba jornalista sira, hafoin partisipa iha kolókiu nasionál kona-ba vijilánsia no resposta mortalidade inan no oan, ne’ebé mak hala’o iha otél Novo Turizmu, sesta (10/07).

Bonifácio hatete, númeru nee kontinua as kauza tanba inan sira ladún hakbesik an ba fasilidade hodi halo kontrolu durante gravidés.

“Kauza tanba la prevene, tuir loloos nee, bainhira kuandu isin rua, presiza mai halo kontrolu, hodi hetan atendimentu husi parteira sira, para atu bele deteta sedu, karik iha komplikasaun ruma.

Nune’e mós partu, dala barak mak sira ne’ebé mak iha area rural, sira la mai partu iha fasilidade saúde ne’ebé mak iha, entaun ida nee mós kontribui ba inan sira mate. No ba bebé sira mós hanesan, Durante sira partu, dala ruma sira la fó atensaun, entaun ida nee kontribui mós ba mate. Maibé ha’u hanoin ho kolókiu ida nee, hotu-hotu tau hamutuk hanoin, oinsá atu halo estratéjia foun, para atu bele prevene liuliu ba saúde inan ho oan”, akresenta Vice Ministru.

Iha fatin hanesan, Adjuntu Reprezentativu UNICEF iha Timor-Leste, Scott Whoolery, hatete UNICEF, UNFPA no WHO, komprometidu atu kontinua servisu besik liután ho Ministériu Saúde ho parseiru sira seluk, objetivu atu redús mortalidade materna, kosok oan foin moris no labarik ne’ebé bele prevene, no mós importante liu mak meloramentu asesu ba kualidade servisu saúde ba inan no labarik sira.

“Ita hotu tau esforsu hamutuk, ita bele redús mortalidade materna, kosok oan foin moris no infantíl. Hadi’a kualidade serbisu sira ba inan no labarik sira, no mós prevene propagasaun COVID-19 iha Timor-Leste” Scott akresenta iha ninia diskursu.

Entretantu, marka prezensa iha kolókiu nee, kompostu husi reprezentante Organizasaun Mundial Saúde, reprezentante husi UNDP, reprezentante husi UNFPA, reprezentante Diretora Jerál Prestasaun Saúde, Diretór Ezekutivu Serbisu Autónomu, Diretór Ezekutivu Ospitál Referral, Diretór Nasionál, Diretór Saúde Munisipál, Xefe Departamentu inklui partisipante sira seluk.(Jornalista Julio Salinas Soares)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 984
  • Page views today : 1,389
  • Total visitors : 80,236
  • Total page view: 112,470

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur