Notísia foun


Timor Post (08/07/2020)-Iha  semana daruak fulan Jullu 2020 sai momentu ba autór polítika sira keixa malu ba Ministériu públiku. Tersa (07/07) Sekretáriu Jerál Mari Bin Amude Alkatiri keixa bankada CPN-CNRT, Kuarta (08/07) Xefe Bankada KHUNTO deputada Olinda Guterres keixa  adversáriu polítika Nain rua, deputada Fernanda Lay no Virginia Ana Belo hosi bankada CNRT.

 Alkatiri keixa tanba la simu akuzasaun hosi CPN-CNRT ba nia simu subornu, Olinda keixa ba agresaun fízika simple ne’ebé halo hosi deputada na’in rua iha diskusaun tanba lian portugés.

“Ohin loron Kuarta (08/07) liu hosi ha’u nia advogadu privadu hatama ona prosesu keixa ba iha ministériu públiku, tanba iha momentu ne’ebá loron 16-17 Juñu 2020 sira na’in-rua Deputada Fernanda Lay ho Deputada Virginia Ana Belo mai halo agresaun fíziku hasoru ha’u iha Parlamentu Nasionál,” informa Olinda ba jornalista sira iha PN, kuarta (08/07).

Atuál Prezidente Bankada parlamentár KHUNTO nian dehan, keixa ne’ebé nia halo la’ós nu’udar indivíduu maibé nu’udar deputada, tanba hala’o hela knar maka hetan atake hosi nia adversáriu polítika iha loron 16-17 fulan Juñu liubá.

“Ha’u nia advogadu hatama ona prosesu ne’e ba iha ministériu públiku nu’udar hanesan xefe Bankada KHUNTO, ne’e la’ós indivíduu, nu’udar deputada hala’o hela knar”, hatutan lider bankada ne’e.

 Kazu ne’e mosu kuandu deputada khunto nian hasai liafuan kritika hasoru deputada hosi CNRT atu uza lian portugés iha debate ida ho   vice-ministra da Solidariedade Social e Inclusão, Signi Chandrawati Verdial iha loron 17 fulan Juñu iha sala plenária parlamentu nasionál.

Diskusaun ne’e manas  tiha no mosu kontra agresaun entre deputada Fernanda Lay ho Olinda tanba  tanba deputada Olinda hasai liafuan ‘pirata’ iha momentu ne’ebá. Maibé, iha deklarasaun Kuarta (08/07) Olinda esplika pirata la’ós liafuan aat.

“Buat ida Pirata ne’e ho ami nia lia fuan Makasae dehan Pi ne’e ita, Rata ne’e dehan liurai, ita liu rai ba ami nia lian Makasae hanesan ne’e. iha parte ida ha’u respeitu tebes ba Deputada Fernanda Lay tanba  ema Baukau ko’alia Makasae, dala ruma ami na’in rua ko’alia Makasae ba malu, tanba sá mak Pirata ne’e sia fali lia fuan boot, karik iha momentu ne’ebá ha’u ko’alia sala lia fuan Pirata ba Fernanda Lay  nia labele hakat mai, nia tuur iha fatin hodi hatete de’it Karik ha’u sala, ha’u bele dada fali ha’u nia lia fuan Karik ha’u sala. Maibé  Deputada Fernanda Lay ho nervozu mai tuku los ha’u. Iha momentu ne’e ha’u la’ós ho fuan ho laran kedas ko’alia lae, ha’u komu nervozu loos, hasai nia nanál dala tolu, ne’e  mak ha’u sente ba la di’ak ha’u hatete lia fuan Pirata” rekoñese Olinda.

Hatán  ba ne’e tuir Deputada Virginia Ana Belo, dehan nia prontu atu ba hatán iha kualkér tempu karik Ministériu  fó notifikasaun.

Seija feita a vossa vontade be, ha’u preparadu kualkér momentu, kualkér tempu bainhira mak ministériu públiku notifika. Ba ha’u prontu, ha’u hanoin ami na’in rua Deputada Fernanda Lay ko’alia ona iha Bankada ami prontu kualkér hora kualkér tempu”, dehan Virginia.

Deputada ne’e fó hanoin Ministériu Públiku halo lalais liu di’ak liután, maibé husu Ministériu refere  hare  uluk lai kazu sira seluk ne’ebé CNRT ezije budu hela iha MP.

Jornalista: Julio Salinas Soares

Please follow and like us:

NOTÍSIA FOUN

Site Statistics

  • Users online: 0 
  • Visitors today : 170
  • Page views today : 222
  • Total visitors : 78,176
  • Total page view: 109,533

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur