Notísia foun


Timor Post (07/07/2020)—Mari Bin Amude Alkatiri, Tersa (07/07/2020)  ofisialmente hato’o keixa hasoru Komisaun Polítika Nasionál (CPN-sigla Portugés) Partidu Congreço Nacional da Reconstrução Timorense (CNRT) ba Ministériu Públiku.

Alkatiri hato’o keixa ba MP tanba sente hetan atake ba nia naran di’ak nu’udar sidadaun ida ne’ebé iha direitu ba dignidade nu’udar luta na’in-ida ba libertasaun nasionál.

Hafoin hato’o keixa, Alkatiri afirma ba Jornalista sira katak, sei prosesa mós sidadaun na’in-4 no instituisaun media balun ne’ebé nia rasik seidauk temi naran ba Ministériu Públiku (MP) hodi husu naran di’ak ba akuzasaun sira ne’ebé halo hasoru nia.

“Ha’u mai hanesan sidadaun la’ós mai hanesan lider nasionál’ la’ós hanesan sekretáriu jerál, para atu reklama ba estadu, direitu ba bom nome (naran di’ak) direitu ba dignidade, direitu atu labele nafatin atake ha’u bainhira la iha baze. Ha’u atu hakarak hatete de’it katak, ha’u tolera tinan 50 ona desde que ha’u komesa luta ba povu ida nee, maibé maluk timor oan barak balun, inveja karik komesa diskrimina ha’u oi-oin. Tolera tinan 50 nee la’ós uitoan. Agora como ha’u hare buat sira ne’e atu sai boot ba beibeik entaun ha’u hanoin too tempu ona atu hatudu ba maluk sira nee katak labele abuza demais ho hau nia toleránsia. Labele abuza demais ha’u nia lideransa tanba lei sei iha, tanba estadu tenke funsiona, justisa tenke funsiona”, hatete Alkatiri iha Edifísiu MP Kolmera-Dili, tersa.

Alkatiri hatutan katak ne’e primeira keixa kontra Komisaun Polítika Nasionál–CNRT nian, tuir mais sei keixa hasoru mós sidadaun na’in 4 no instituisaun media maibé la mensiona naran

“Ne’e primeira keixa kontra Komisaun Polítika Nasionál-CNRT nian, loron hira tan sei mai segunda keixa kontra bankada CNRT no mós keixa sei mai tan kontra sidadaun na’in 4, maibé nia la mensiona naran. Liu ida nee tan, sei mai (keixa) kontra media balun”, hatutan Alkatiri.

Atuál sekretáriu jerál partidu FRETILIN ne’e subliña keixa hirak ne’e sijilu katak tama ona iha investigasaun, labele fó sai ba públiku.

Maibe antes ne’e Alkatiri ameasa lori keixa ba MInisteriu públiku relasiona ho akuzasaun katak simu subornu hosi kampaña internasionál ConocoPhillips iha prosesu negosiasaun mina Tasi Timor iha tinan 2001.

Entretantu CPN-CNRT prepara dadauk surat ba Ministériu Públiku hodi bolu Sekretáriu Jerál FRETILIN, Marí Bim Amude Alkatiri atu fó justifikasaun ba alegasaun korrupsaun hasoru Prezidete CNRT, Kayrala Xanana Gusmão.

Liuhusi deklarasaun polítika bankada CNRT iha uma fukun Parlamentu Nasionál, Segunda (06/07/2020), lamenta tebes akuzasaun ne’ebé Alkatiri fó sai katak Xanana subar iha korrupsaun.

“Iha facebook, Marí Alkatiri dehan Xanana subar-án iha korrupsaun, nune’e CPN Partidu CNRT prepara dadauk surat ba Ministériu Públiku hodi bolu Mari Alkatiri atu fó sai korrupsaun Maun Boot Kay Rala Xanana Gusmão nian,” afirma Vise Xefe Bankada CNRT, Patrocínio Fernandes.

Deklarasaun ne’e fó sai liga mós ho deklarasaun polítika bankada FRETILIN nian iha loron Tersa (30/06/2020) ne’ebé rejeita keixa husi Oceanic Exploration ne’ebé sai ona polémika iha sosiedade nia laran kona-ba eskândalo subornu no korrupsaun ne’ebé komete hosi Sekretáriu-Jeral Partidu FRETILIN Mari Alkatiri. CNRT konsidera rejeisaun bankada FRETILIN ne’e mai ho akuzasaun balun ne’ebé la fundamenta ho dadus konkretu no ninia efeitus ne’ebé fó prejuízu ba prátika boa-governasaun nian.

Patrocínio fó lembra keixa husi Oceanic Exploration hatete, subornu ne’ebé ConocoPhillips fó ba Mari Alkatiri atu halo desizaun ne’ebé prevalese ba kompañia no hatún táxa ne’ebé ConocoPhillips tenke selu mai iha Governu Timor-Leste.

Realidade hatudu duni, Mari Alkatiri asina Acordo Marítima (CMATS) entre Timor-Leste ho Austrália iha tinan 2002 hodi suspende diskusaun no negosiasaun hotu-hotu sobre disputa Fronteira Marítima durante tinan 50 nia laran. Acordo CMATS konklui ho markasaun ba kampu Greater Sunrise ne’ebé hela de’it 18% mak tama iha área Konjunta entre Timor-Leste ho Austrália nian, enkuantu kampu Greater Sunrise  liu 80% tama iha territóriu administrasaun Austrália nian.

Graças a Deus! Timor-Leste iha nia ema ne’ebé hadomi rai ne’e, onestu, servisu maka’as no visionáriu hanesan Líder Kharismátiku Maun Boot Kay Rala Xanana Gusmão ho nia ekipa hodi nune’e Timor-Leste konsege mánan ninia soberania, no iha fulan-Julho de 2019 ratifika Tratadu Fronteira Marítima iha Parlamentu Nasional. Iha plenária ida-ne’e duni no Povu asiste, Fretilin vota kontra ratifikasaun Fronteira Marítima, maske Fronteira Marítima importante ba Timor-Leste hodi kompleta ninia soberania núdar Estadu.

Atu sés hosi escândalo ne’ebé Mari Alkatiri halo ona hodi benefísia ba án no Partidu Fretilin, Bankada Fretilin iha Parlamentu Nasional lori tán informasaun no dadus inventadus sobre prosesu aprovizionamentu ba Servisu Nasional Kadastral (SNC) ne’ebé ném sita iha relatóriu Câmara de Contas, inklui mós kazu Inspetór PNTL Calisto Gonzaga ne’ebé iha ona desizaun finál hosi Tribunal rasik.

Tanba ne’e, iha deklarasaun polítika CNRT nian afirma, prepara dadauk prosesu ba Ministériu Públiku.

(Jornalista : Jaime Pires no Júlio Salinas Soares)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,413
  • Page views today : 2,264
  • Total visitors : 71,419
  • Total page view: 98,758

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur