Notísia foun


Timor Post (30/06/2020)- Bankada Fretilín liuhosi deputadu Joaquim dos Santos, iha deklarasaun polítika iha Parlamentu Nasionál tersa (30/06) husu ba Ministériu Públiku (MP) atu investiga eis Primeiru Ministru Kayrala Xanana Gusmão no eis Komandante Jerál Polisia Nasional Timor-Leste Longuinhos Monteiro, relasiona ho desizaun liberta trafikante estranjeiru nain 5 ne’ebé lori droga tama Timor-Leste.

“Asuntu ida ne’e  ita presiza foti no fó atensaun maka iha tinan-2012, Ministériu Públiku hato’o akuzasaun ida hasoru PNTL nia Diretór Investigasaun Kriminál, Calisto Gonzaga, ne’ebé Ministériu Públiku akuza Calisto Gonzaga halo abuzu de podér tanba halo “detensaun illegal ba fujitivu droga Nain 4 husi Indonesia no Nain ida husi Africa du Súl”, hatete Joaquim liu hosi deklarasaun polítika iha plenária PN Tersa (30/06).

Dos Santos hatutan, MP akuza Calisto Gonzaga tanba fasilita sidadaun estranjeiru Nain 5 ne’e ses husi justisa Timor-Leste nia jurisdisaun. Sidadaun estranjeiru Nain 5 ne’e suspeitu sira ne’ebé lori droga ho todan 6.5 Kg.

Joaquim haktuir iha prosesu julgamentu nia rohan, iha fulan-Setembru tinan-2015, Tribunal Distritál Dili kondena Calisto Gonzaga ho pena prizaun tinan 8 fulan 6 tanba privadu komete krime abuzu de podér hodi fasilita hasai suspeitu trafikante droga nain 5 ses husi sistema justisa Timor-Leste nian maski sira lori droga ho montante boot tama mai Timor-Leste.

Hatutan tan, Calisto Gonzaga halo rekursu ba pena prizaun hasoru nia tanba áktu krime ne’ebé nia komete ne’e la’ós áktu ne’ebé nia halo ho inisiativa rasik.

Deputadu Fretilin ne’e dehan, hafoin konklui prosesu rekursu, iha loron-18 fulan-Fevereiru tinan-2020, Tribunal Rekursu kondena pena suspensaun tinan 3 ba Calisto Gonzaga no liberta tiha nia husi pena tinan 8 fulan 6 ne’ebé tribunal primeira instánsia fó tanba Calisto Gonzaga la’ós halo krime ne’e tanba ninia hakarak.

Santos dehan tan, iha ninia akordeaun final kona-ba kazu ida ne’e, Tribunal Rekursu deklara iha kuaze pájina hotu-hotu akordaun nian katak, husi audiénsia sira ne’ebé tribunal rekursu halo durante prosesu rekursu ba kazu ida hatudu provas klaru no inekuivokus ka laiha dúvidas ba tribunal hodi hatuur nu’udar faktu katak Calisto Gonzaga hetan orden husi Komandante PNTL Longinhos Monteiro no mós orden hanesan husi Primeiru Ministru Xanana Gusmão atu labele autoriza suspeitu sira presta depoimentu no fó informasaun ruma kona-ba kazu refere ba sistema judisiál Timor-Leste nian, ordem atu mantein suspeitu sira ne’e iha detensaun to’o entrega sira ba BNN Indonesia nian no ordem atu Calisto Gonzaga entrega suspeitu sira ne’e ba polisia Indonesia.

Deputadu fretilín kleur liu iha parlamentu ne’e subliña, ho faktu jurídiku sira ne’ebé tribunal rekursu rasik estabelese, Bankada FRETILIN hakarak husu, no públiku tomak tenke kestiona, tanba sa mak momentu ne’ebá komandante PNTL, Longinhos Monteiro ho Primeiru Ministru haruka Calisto Gonzaga halo detensaun illegal? No Tamba sa mak Longinhos Monteiro ho Xanana Gusmão fó orden atu subar suspeitu trafikante droga sira ne’e husi sistema judisiál Timor-Leste nian?

“Krime tráfiku droga ne’e krime boot iha mundu tomak no hahalok ida ne’e fo ameasa boot ba povu iha país hotu-hotu. Tanba krime ida ne’e krime boot, Bankada FRETILIN hakarak husu ba Ministériu Públiku atu hala’o prosesu investigasaun hasoru eis komandante jerál PNTL Longinhos Monteiro no eis Primeiru Ministru Xanana Gusmão atu estabelese faktu kona-ba tansá sira proteje trafikante droga sira ne’e momentu ne’ebá, no tanba sá mak trafikante droga Nain 5 ne’e importante los to’o komandante jerál polisia ida no Primeiru Ministru ida tenke fó orden ba PNTL atu proteje sira”, Joaquim konklui ninia deklarasaun ne’e iha plenáriu parlamentu nasionál.

Jornalista: Julio Salinas Soares

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,223
  • Page views today : 2,047
  • Total visitors : 74,155
  • Total page view: 103,305

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur