Notísia foun


Timor Post (28/06/2020)—Tinan ne’e governu liuhosi Ministériu Defeze (MD) seidauk bele anunsia rezultadu kandidatu ba membru FALINTIL-Forsa Defeza Timor Leste (F-FDTL), maibé sei fó sai iha fulan janeiru tinan 2021.

Razaun tinan ne’e labele anunsia rezultadu, tanba governu laiha orsamentu.

“2021 ita tau ona preoridade, tinan ne’e ita labele fó sai, tanba fulan rua de’it ita atu halo saida, ita la suspende, ita osan mak laiha duni. Só 2021 ita sei fó sai rezultadu kandidatu F-FDTL ne’ebé iha tinan kotuk prinse ona vaga,” Ministru Defeza, Filomeno Paixão ba Timor Post, iha Ministériu Finansas, Aitarak Laran, Sábadu (27/06/2020).

“Ita nia preoridade, ita hotu rona rasik husi Primeiru Ministru ko’alia ona katak, polísia mós tenke halo rekrutamentu no F-FDTL mós rekrutamentu,  maibé preoridade uluk ba F-FDTL foun hatan ba polísia,” Filomeno salienta.

Paixão haktuir, rekrutamentu tenke preoridade nune’e instituisaun rua ne’e iha hanoin ida de’it labele husik sira na’in tiru malu hanesan uluk.

“Ita sei iha hanoin ba sira nune’e sai husi fatin ida, balun ba polísia no balun ba F-FDTL inklui balun ba funsionáriu públiku,” tenik Nia.

Antes ne’e Xefe Estadu Maior Jeneral FALINTIL Forsa Defeza Timor Leste (F-FDTL) Maijor Jeneral Lere Anan Timur afirma ninia pozisaun hodi kontinua mantein prioridade rekrutamentu ba membru foun F-FDTL ba veteranu nia oan.

Tuir Maijor Jeneral ne’e, prioridade ida ne’e tenke foti tanba haree ba kestaun onra no dignidade Timor Leste ninian.

“Se ita hanesan de’it entaun haruka Sekretariu Estadu (Veteranus) Gil ba taka tiha Komisaun de Verifikasaun ne’e, verifika ne’e para identifika o ne’e klandestina nia ema, rezisténsia nia ema,” Lere hatutan.

“Timor-oan ne’e ba ita Timor-oan hotu maibé kestaun de dignidade, kestaun de onra ita la hanesan, prioridade ba  veteranu nia oan ne’e nafatin maibé tenke priense kritériu,” Lere afirma.

Entertantu tuir planu Governu nian, sei halo rekrutamentu F-FDTL ba joven timoroan na’in atus 600.

Jornalista: Jaime Pires

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,277
  • Page views today : 2,145
  • Total visitors : 74,209
  • Total page view: 103,403

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur