Notísia foun


Timor Post (18/06/2020)- Bankada Parlamentár Partidu Congresso Nacional da Reconstrução Timorense (CNRT), Kinta (18/6) kondena asaun deputada bankada parlamentár Khunto Olinda Guterres ne’ebé hasai liafuan ‘China Pirata’ hasoru deputada Fernanda Lay iha Parlamentu Nasionál Kuarta (17/6).
Tuir deklarasaun ne’ebé CNRT iha Konferénsia Imprensa konsidera deputada Olinda halo ameasa ba prinsípiu nasaun ne’ebé normas bazeadu pluralizmu.

“Lamentavel tebes tanba deputada Olinda hanesan reprezenta povu hatudu momoos lori hela perigu no halo ameasa ba ita nia nasaun ho nia prinsípiu normas bazeadu pluralizmu nian” deputada Maria Teresinha Viegas hosi konferénsia imprensa iha parlamentu nasionál, kinta (18/06).

CNRT esklarese deputada Fernanda Lay nu’udar sidadaun orijinária timorénsia tuir artigu 3 konstituisaun repúblika nune’e iha direitu tomak hanesan ho sidadaun timoroan sira seluk iha ita nia rai doben.

“Se khunto iha korajen hasai liafuan rasizmu china pirata hasoru deputada Marai Fernanda Lay, ami hakarak husu sá motivu mak enkoraja deputada Olinda Guterres hodi ofende ho insultus ne’ebé asalta estatutu deputada Maria Fernanda Lay hanesan timoroan”, kestiona Teresinha Viegas.

Teresinha konsidera Deputada Olinda Guterres fundadór partidu Khunto no prezidente bankada Khunto hasai liafuan ‘China Pirata’ nakonu ho intensaun atu diskrimina deputada CNRT hafoin halo intervensaun ho lian portugés iha prosesu audiénsia kona-ba levantamentu estraordináriu fundu petrolíferu.

“Konstituisaun repúblika artigu 13 katak, Repúblika Demokrátika Timor-Leste nia lian ofisial mak Tetun no Portugés konstituisaun la bandu ema atu ko’alia lian portugés maibé deputada Olinda uza oportunidade ida ne’e hodi halo mal trata hasoru deputada Maria Fernanda Lay ne’e insultu bo’ot ba povu tomak liu-liu ba partidu CNRT”, afirma Teresinha
Alende ne’e Iha artigu 16. 2 mós bandu sidadaun hothotu atu labele halo diskriminasaun ba ema ida tanba nia kulit, nia rasa, nia estadu sivíl, nia seksu, orijen étiku no mós nia lian. Maibé CNRT lamenta tanba deputada Olinda hanesan reprezenta povu hatudu momoos lori hela perigu no halo ameasa ba ita nia nasaun ho nia prinsípiu norma bazeadu pluralizmu.

Bankada CNRT mós rekorda katak Deputada Olinda Guterres haluhan tiha ona katak, dala barak iha plenária, halo deklarasaun no intervensaun polítika Bankada KHUNTO nian ho Lian Portugés. Laiha ema ruma bandu
“Tanba-ne’e, Bankada CNRT kondena makaas hahalok diskriminativu, la edukativu ne’ebé deputada KHUNTO halo hasoru Deputada CNRT iha Parlamentu Nasionál, liafuan no insultus ho personagem rasista tenke hapara kedas hahú agora. Timor-Leste tenke livre hosi hahalok át (diskriminasaun hasoru umanu), insultus no laiha fatin atu promove Rasismo iha ita-nia rai doben Timor-Leste ne’ebé mak harii ho sakrifísiu ema-lubun wain ba Ukun Rasik Án ida-ne’e”, deklara deputada Bankada CNRT.

Hatán ba kondenasaun ne’e Deputadu Olinda Guterres hatete nia la halo diskriminasaun hasoru Fernanda Lay
“La’ós halo diskriminasaun. Iha momentu ne’ebá ha’u ko’alia ne’e ba ministru sira la’ós katak kuandu iha intervensaun kuandu halo intervensaun diskusaun kona-ba osan povu ninia ho lian portugés povu la komprende saida mak ita ko’alia ne’e tanba povu mós akompaña direita hela hosi rádiu no televizaun nia oin atu komprende saida mak ita halo diskusaun iha ne’e” hatete linda iha entrevista ho Timor Post Online (TPO) iha Parlamentu nasional (18/06).
Olinda haktuir saida maka nia kolia deputada Fernanda Lay hosi sorin hateten fali, “kuandu o la hatene portugés iha parlamentu loke hela portugés nusa o la estuda”
“Ha’u ida ho idade 69 ona ha’u foin estuda fali portugés ho oras ida ne’e, ida ne’e mak ha’u hirus no ha’u hateten duni o China Pirata” deklara Olinda.

Maski nune’e deputada ne’e hatutan “ko’alia ne’e la’ós ho fuan ho laran lae, tanba ita nia rai ne’e biasa ita ko’alia ba malu dehan loromonu loro sa’e ne’e baibain ita ko’alia ba malu no dala ruma dehan firaku kaladi ne’e ita ko’alia ba malu baibain hela. Maibé ha’u tur tiha ha’u nia fatin senora Fernanda Lay kala sente labele entaun nia haksoit mai liu deputadu nain rua ka tolu mai to’o ha’u nia fatin, entaun ha’u bele ferik ba mós ha’u bele rakut tiha o lai ha’u nia forsa la to’o ba mós ha’u rakut tiha uitoan ba mak ha’u mate”, hateten Olinda.

Rona deklarasaun hosi CNRT katak nia promove fali rasizmu Olinda konsidera laloos tanba baibain sira ko’alia ba malu ona, no nia sei la husu deskulpa
“Ha’u sei la husu deskulpa se karik sira mak husu deskulpa, maibé di’ak liu Prezidente Parlamentu mak haruka muda tia ami nia fatin de’it”, sujere Olinda.

Jornalista: Jaime Pires

Editor: Mariano Martins

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,406
  • Page views today : 2,253
  • Total visitors : 71,412
  • Total page view: 98,747

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur