Notísia foun


Timor Post (16/06/2020)—Ministru Negósiu Estranjeiru no Kooperassun (MNEK), Dionisio Babo Soares kontinua hein desizaun ba ezonerasaun husi Prezidente Repúblika Francisco Guterres Lú Olo, hafoin nia hatama ona karta rejignasaun ba Primeiru Ministru  Taur Matan Ruak.

Dionísio hatama karta rejignasaun ba Primeiru Ministru Taur Matan Ruak iha loron 25/05/2020 tanba CNRT retira husi governu daualu. Nia kontinua hala’o kna’ar tanba tuir Konstituisaun  artigu 86 (h) haktuir Prezidente Repúblika mak foti, fó pose no hasai membru Governu nian, tuir proposta Primeiru-Ministru nian, iha termu no.2 Artigu 105.

“Ha’u hatama ona karta rejignasaun ba Primeiru Ministru Taur Matan Ruak. Ha’u hein hela ezonerasaun para hein membru governu foun mai entrega pasta ,” Dionísio ba Jornalista sira iha Edefísiu MNEK, Praia dos Coqueros,  Dili, Tersa (16/06/2020).

Dionísio simu posse iha loron 22/06/2018.

Dionísio dehan, durante nia hala’o kna’ar tuir programa governu daualu nian no iha fulan hirak nia laran hala’o servisu maka’as tebes kona-ba COVID-19, iha ne’ebé nia rasik halo kooperasaun internasional sira hodi hetan tulun aimoruk ba prevensaun pesti a’at ne’e.

Nia fi’ar katak membru governu foun ne’ebé sei troka nia bele servisu tuir mandatu no tuir programa governu foun ne’e ninia.

“Buat hotu-hotu la’o normal hela espera katak mantein de’it level, liu-liu nivel diplomasia sira kontinua mantein para ita nia vizibilidade iha mundu kontinua,” Prezidente CPN-CNRT ne’e subliña.

Entretantu tuir lista membru governu foun ne’ebé Timor Post asesu no atu simu posse iha semana ne’e nia rohan, Adalgiza Magno maka assume hikas pasta MNEK no atuál Sekretáriu Estadu Formasaun Profesionál no Empregu (SEFOPE), Julião da Silva mak assume pasta vise MNEK.

Membru governu husi Paartidu CNRT hamutuk na’in-7 iha governu daualu, na’in-6 mak hatama ona karta rejignasaun inklui Dionísio Babo Soares; Dulce de Jesus Soares nu’udar Ministra Edukasaun Juventude no Desportu (MEJD); Abílio José Caetano Vise Ministru Administrasaun Estatal; Nélio Isaac, Sekretáriu Estadu Juventude no Desportu; Arsenio Pereira, Sekretáriu Estadu Kooperativa; no Agio Pereira, Ministru Prezidénsia Konsellu Ministru lakohi tama kedas Palásiu tanba moe bainhira akontesimentu hadau malu kadeira iha Parlamentu Nasionál no hetan ona ezonerasaun husi Prezidente Repúblika Francisco Guterres Lú Olo. Inkuantu Teofilo Caldas nu’udar mós membru husi CNRT assume pasta Sekretáriu Estadu Arte no Kultura la kumpri desizaun partidu.

Jornalista: Jaime Pires

Please follow and like us:

NOTÍSIA FOUN

Site Statistics

  • Users online: 0 
  • Visitors today : 529
  • Page views today : 723
  • Total visitors : 79,040
  • Total page view: 110,790

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur