Notísia foun


Timor Post (12/06/2020)- Prezidente empossadu Rejiaun Administrativu Espesiál Oe-kusse Ambeno (RAEOA), Arsénio Paixao Bano, hatete ninia mandatu depende ba atuál Primeiru Ministru Taur Matan Ruak ninian. Tuir nia katak  mandatu TMR  nian  remata nia mós mandatu remata.

“Kuandu oitavu governu sei iha, Primeiru Ministru ne’e sei iha, ha’u nia mandatu mós sei metin, primeiru ministru nia mandatu bainhira mak remata ha’u mós remata” hatete eis Sekretáriu Rejionál RAEAO ne’e iha primeiru dada lia ho Jornalista hafoin simu pose ba Prezidente RAEOA iha Palasiu do Governu  sesta (12/06).

Maski nune’e membru partidu Fretilin ne’e konsidera mandatu politik la’os importante, maibe oinsá maka Oecuse tenke ba oin.

“Sai prezidente autoridade iha situasaun ida agora ne’e la fasil, maibé importante mak Oe-Cusse labele izoladu ona hanesan tinan hirak liu ba” dehan Paixao Bano.

Alende  rekoñese liafuan barak iha públiku balun dehan tendénsia liu ba partidu, família no balun dehan liafuan oioin maibé Arsenio repete  Oe-Cusse tenke sai hosi izolamentu,  kontinua hanoin ne’ebé  Mari Alkatiri rai hela no kontinua misaun Timor-Leste atu liberta povu

“Se de’it mak dehan ha’u ba grupu ida, ba grupu ida, ha’u simu de’it no ha’u hakarak rona ema ko’alia maibé importante mak ba atu halo saida ba Oe-Cusse, no ita tenke halo estrada ba komunidade sira no aumenta tan eskola iha Oe-Cusse, be moos ita bele halo ka la’e, importante mak Oe-Cusse labele izola tan tinan neen liu ba no labele izoladu ona” hatutan Arsenio.

Nia planu mós dehan, sei forma ekipa ida ba sekretáriu rejiaun urjente no semana oin sei aprezenta ba primeiru ministru atu bele iha ona autoridade, labele iha prezidente ida laiha sekretáriu rejiaun.

“Ami sei prioridade nafatin, ohin primeiru ministru mós dehan ona, no eis prezidente autoridade Mari Alkatiri hanorin ami barak ona no ideia barak atu halo servisu loloos, katak infraestrutura tenke kombina ho edukasaun saúde tenke la’o maka’as” tenik tan.

Eis Ministru Solidariedade Sosiál ne’e  promete sei kontinua servisu maka’as hodi rezolve problema sira ne’ebé mak akontese iha Mari Alkatiri nia mandatu no seluk tan, hanesan mós Ro Haksolok.

“La’ós problema rua de’it problema barak tebes, Ki’ak, Mal Nutrisaun, asesu ba Eskola no bee moos ne’e hanesan problema hotu-hotu, no Hotel Oe-Uku ita tenke kontinua halo hotu  ka sei finaliza, tanba agora sei uza ba kuarentena, maibé sei finaliza tanba hotel ne’e tenke halo hodi atrai ema hotu tanba ida ne’e ohin primeiru ministru dehan ona sei servisu governu sentrál ninian.

Kona-ba Ró Haksolok ha’u rona ona orientasaun hosi Primeiru Ministru no Primeiru Ministru dehan, Governu Sentrál sei toma konta hotu ho apoiu Mari Alkatiri nian, tanba ne’e governu sentrál hakarak avansa to’o Haksolok mai”, Arsénio hakotu.

Jornalista: Jaime Pires

Editor: Mariano Martins

Please follow and like us:

NOTÍSIA FOUN

Site Statistics

  • Users online: 6 
  • Visitors today : 1,656
  • Page views today : 2,428
  • Total visitors : 83,629
  • Total page view: 117,471

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur