Notísia foun


DILI—Reprejentante povu husi bankada CNRT iha Parlamentu Nasionál deside marka hikas prezensa iha plenária hafoin deklara ho nia aliadu sira (UDT/FM ho PUDD) la rekoñese Aniceto Guterres nu’udar prezidente ba órgaun daruak ne’e tanba eleitu husi dalan konsideradu hadau poder.

Liuhusi deklarasaun polítika iha plenária iha loron 02/06/2020, Prezidente Bankada CNRT, Duarte Nunes afirma, CNRT ho lideransa Kayrala Xanana Gusmão, hatur metin no defende Estadu Direitu Demokrátiku katak, kualker asaun polítika sira tenke bazeia ba Konstituisaun no Lei odinária sira no CNRT sei hamarik no tuba iha primeira liña hodi la-admite no latolera kualker aktu polítika sira ne’ebé hakarak legitima koportamentu polítika sira ne’ebé realiza ho forma tácito no expresa hodi viola normas konstitusional.

Tuir mai deklarasaun kompletu:

Hamutuk ita Hametin Estadu de Direitu Demokrátiku, Hamutuk defende Konstituisaun RDTL!

Iha loron 18-19 Maiu 2020, deputadu sira husi bankada Fretilin, PLP, no KHUNTO publikamente hatudu komportamentu agresivu no organizadu realiza plenária hodi destitui Senhor Prezidente Parlamentu Nasional, Deputado Arão Noe de Jesus. CNRT fiar no iha konviksaun katak, asaun arbitraria ida-ne’e hatudu momoos ba Povu Timor-Leste além lisaun ida lad’iak ba Povu Timor-Leste maibé mos revela istoria metan iha prosesu desenvolvimentu Estadu Direitu no CNRT konsidera asaun ida-ne’e nudar “Asaltu Poder ba Meza Parlamentu Nasional”.

Asaun Asalta Poder ida-ne’e hatudu violasaun klara no grave ba normas konstitusionais, liu-liu artigu 99 (3) Konstituisaun RDTL katak, Parlamentu halo Reuniuan Ordinária ho konvokasaun husi  Prezidente Parlamentu Nasional.

Infelizmente, vise-prezidente Maria Angelina Sarmento usurpa no hadau kompeténsia Prezidente Parlamentu nian hodi konvoka no realiza plenária no aktu destituisaun ilegal ne’e hatudu momoos violasaun grave ba Rejimentu Parlamentu Nasional Artigu 17 no Artigu 22.

Hafoin halo Asaltu Poder ba iha meza Parlamentu Nasional, Bankada Fretilin sai tiha anju no buka atu fo kulpa ba Bankada CNRT, ne’ebé halo esforsu tomak atu evita Estadu RDTL monu ba Golpe do Estadu, maibé bancada Fretelin haluha lalais tiha sira nia pozisaun polítika iha plenária hodi vota kontra programa do VIII governo Konstitusinal no orsamentu geral estado 2020 no agora hatudu liman ba CNRT, lamentavel tebes tanba laiha konsisténsia no usa oportunidade hodi kria impase polítika.

Povu doben Timor-Leste, na’in ba Demokrasia,

CNRT ho lideransa Maun Bot Kay Rala Xanana Gusmãoo, hatur metin no defende Estadu de Direitu Demokrátiku katak, kualker asaun polítika sira tenke bazeia ba Konstituisaun no Lei odinária sira no CNRT sei hamarik no tuba iha primeira liña hodi la-admite no latolera kualker aktu polítika sira ne’ebé hakarak legitima koportamentu polítika sira ne’ebé realiza ho forma tácito no expresa hodi viola normas konstitusional.

Laós retórica, Bankada CNRT hatudu duni nia maturidade no konsiénsia polítika iha Parlamentu Nasional durante ne’e. Ita hotu sei lembra no sei fresca hela iha ita hotu nia memoria institusional Parlamentu Nasional. Iha tinan 2017, Prezidente Parlamentu Nasional Ilegál atuál, Deputadu Aniceto Guterres halo BLOKEIA TOTAL iha Parlamentu Nasionál,  mézmuke CNRT ho nia koligasaun sira iha maioria ho kadeira 35, maibé CNRT respeita Konstituisaun no Rejimentu Parlamentu Nasional, tanba-ne’e maka Deputadu CNRT, PLP, no KHUNTO, iha momentu ne’ebá ho sira-nia konviksaun tomak LA-HALO ka la-realiza asaun usurpa no Asaltu Poder ba iha Meza Parlamentu Nasional nian.

Bankada CNRT hakfodak no lamenta tebes ho Bankada PLP no KHUNTO ne’ebé uluk iha tinan 2017, respeita no kaer metin regras konstitusionais, legais, no rejimentais, iha loron 18-19 Maiu 2020, nakfilak-án ho hahalok inkonstitusional no ilegal iha povu  nia matan laran tanba hakarak alkansa poder polítiku.

Ida-ne’e hatudu katak, bainhira ita hamutuk ho ema di’ak maka ita sei hatudu hahalok di’ak, maibé bainhira ita hamutuk ho ema ladi’ak maka ita sei hatudu hahalok la-diak.

Povu Timor-Leste, na’in ba justisa no lia los,

Dala ida tan CNRT hakarak reitera no kontinua hatudu ba públiku maturidade no regra konduta sira hodi resolve situasaun impase polítik. Iha loron 18-19 Maiu 2020, CNRT la halo blokeiu ba Parlamentu Nasional, pelu kontráriu, CNRT halo esforsu tomak hodi evita Bankada Fretilin, PLP, no KHUNTO hetan poder liuhosi dalan ILEGAL.

Maski bankada tolu ne’e la-rekoñese asaun Asaltu Poder ne’ebé sira komete, maibé povu tomak sai sasin ba hahalok át ida-ne’e. Povu Timor-Leste hakfodak ho hahalok hadau poder ne’ebé bankada tolu ne’e hatudu iha Parlamentu Nasional. Maibé bancada CNRT bele komprende katak ida ne mak kapasidade husi bancada tolu ne tan ho meios seluk sira sei la konsege.

CNRT iha serteza absoluta katak, dalan ne’ebé bankada tolu ne’e hili, sei loke presedénsia la-diak ba futuru prosesu demokrátiku no kumprimentu ba konstituisaun no lei ordináriu sira iha ita-nia rai doben Timor-Leste. Hahalok Asaltu Poder ida-ne’e hatún imajen Nasaun Timor-Leste nian iha mundu, no tau Timor-Leste hanesan mós ho nasaun anti demokrasia seluk iha Ázia no Áfrika.

Povu Timor-Leste, na’in ba Justisa,

Bankada CNRT la-nonook no la husik liu de’it asaun Asaltu Poder idane’e, tanba-ne’e maka Bankada CNRT kontesta asaun ilegal hirak husi Bankada tolu ne’e ba Tribunal kompetente.

Infelizmente,     Tribunal                Rekursu               sempre                deside Indeferimentu Liminar ba asaun inkonstitusionalidade ne’ebé Bankada CNRT apresente tanba laós aktu legislativo no regulamentares maibé, aktu polítiku. Inderferimentu Liminar ne’e katak, Tribunal Rekusu rekuza atu halo apresiasaun ba substánsia de matéria husi rekursu ne’ebé CNRT hato’o ba tribunal ne’e rasik.

 

Timor-oan tomak na’in ba justisa,

Bankada CNRT tuir loloos sei la tuir plenária ida-ne’e hodi hein desizaun ba rekursu ikus liu ne’ebé Bankada submete ona ba Tribunal Rekursu iha loron 29 Maiu 2020. CNRT kontinua depozita konfiansa ba Tribunal hanesan órgaun as liu atu foti desizaun, maske Tribunal hatudu ona atu lakohi foti papél tuir nia kompeténsia atu hakotu disputa legal ba implementasaun Konstituisaun-da-Republika no lei oan sira. Tanba-ne’e CNRT tenke foti papél atu mai luta iha plenária ida-ne’e.

Partidu CNRT ho fuan bót simu no respeita nafatin desizaun Tribunal nian tuir Konstituisaun haruka katak, Tribunal nia desizaun mak ás liu iha País de Direito Democrático mésmuke desizaun Tribunal nian ne’e lamentável tebes, tanba Tribunal tenta atu hases án hodi deside materia de facto no apenas deside indeferimentu liminar.

Tanba-ne’e, Bankada CNRT hakarak halo afirmasaun hanesan tuir mai:

  1. Tribunal Rekursu indefere petisaun deputadu CNRT no aliadu sira nian hodi nafatin lakohi tama ba substánsia husi keixa no husu atu hato de’it rekursu iha plenária Parlamentu Nasional.

 

Prosesu eleisaun no destituisaun ba Prezidente Parlamentu Nasional la’os de’it aktus polítiku, maibé kestaun konstitusionál, lei organizasaun funsionamentu parlamentu, no rejimentu parlamentu nasionál. No fundo, kualker aktu adminitrativo (mesmu regimento internu parlamentu nasional) atu hetan existénsia, validade no eficacia jurídico tenke reune elementu esensial ne’ebé hatur iha regimentu internu parlamentu nasional no fara mais kontra konstituisaun. Tribunal Rekursu fundamenta no deside katak, kualkér aktus polítiku la sujeitu ba kontrolu jurisdisional no konstitusionalidade, ne’e argumentu ne’ebé laiha fundamentu no sala, tanba Konstituisaun da RDTL hateten momoos katak, aktus do estadu tomak tenke subordina ba

Konstituisaun no lei sira, artigo 2 n.o 2 no 3 KRDTL.

 

  1. Kualker aktus polítiku loloos tenke sujeita ba kontrolu jurisdisional, hodi respeitu prinsípiu check and balance entre órgaun soberania sira. Ami nota momoos katak, Tribunal hanesan lós pilatos nebe fase liman hodi deside aktus hotu-hotu iha Parlamentu Nasional hanesan razaun polítika de’it, nune’e, ami bele dehan katak povu mos bele foti meza Parlamentu Nasional bainhira sira sente katak reprezenta ona maioria povu tomak, tanba Tribunal konsidera katak aktu HADAU PODER iha Parlamentu Nasional ne’e puramente aktu polítiku, laiha efeitu jurídiku tuir ita nia Konstituisaun no Lei sira haruka.

Ami konsidera dalan sei naruk atu hetan justisa bainhira mosu disputa legalidade, presedente ne’e hafoer ona ita-nia integridade núdar Paíz Demokrático. Bancada CNRT preokupa tebes ho aktus Asalta Poder. Ne’e hatudu katak ita-nia nasaun  monu ona ba sistema ditadura, hadau ukun ne’e bele deit no ukun bele ho liman besi tanba sei admite hosi Tribunal.

Maluk Timor-oan sira, Nain ba Demokrasia,

Foin dadaun ne’e ita-hotu asiste tomada-de-posse ba membru governu foun iha ámbitu VIII Governu no sei iha tan posse tuir mai ne’ebé Prezidente-da-Repúblika Francisco Guterrres Lú Olo halo tanba inklui mos husi Fretilin. Ami hare’e, Prezidente Lú Olo hatudu ninia afiliasaun malorek ba povu tomak, Prezidente-da-Repúblika laós ba ema hotu, tanba bainhira la involve Fretilin iha ukun, nia sei la fó-posse. Ne’e persegisaun polítika, tanba Prezidente Lú Olo lakohi fó-posse ba membru governu CNRT, husik nonók membru indijitadu sira, ne’e hotu tanba Fretilin lakon iha Eleisaun Antesipada ne’ebé nia rasik dekreta. Hahalok ida-ne’e mak dada ita ba impase polítika tinan-tolu nia laran.

Impase hetok laiha solusaun to’o OJE 2020 chumba iha PN, nune’e Prezidente-da-Repúblika konvoka diálogu iha fulan-fevereiru 2020 ho entidades hotu-hotu, inklui Amo Bispo nain 3 ho líder nasionais ho intesaun atu hakotu impase polítika. Maibé ami hare’e Prezidenteda-Repúblika la seriú atu resolve problema ne’ebé nia rasik mak halo. Kuitado los ba Amo Bispo na’in 3, tán sira nia hanoin diak sira ne’e la konsidera no la hetan respeita. Buat sira hotu akontese tanba deit Fretilin la konsege forma koligasaun, Prezidente-da-Repúblika dada tempu hodi estuda no ikus mai membru koligasaun foun ne’ebé lídera hosi CNRT balun haksoit sai. PR Lú Olo la presiza lori tempu naruk hodi estuda. Rapidamente foti lalais kedas desizaun atu hatama nia partidu Fretilin ba iha VIII Governu. Mésmuke VIII Governu ne’ebé nia Programa no Orsamentu, bankada Fretilin vota kontra, maibé agora sira aproveita furak los hodi hatama ministru lubuk ida hosi Fretilin. Que vergonha!!!!

Maluk Timor-oan tomak, na’in ba demokrasia

Ita-nia rai doben Timor Lorosa’e agora iha situasaun perigozu, Prezidente Fretilin hanesan mós Prezidente-da-Repúblika hatudu dadaun lisaun polítika inkumprimenta Konstituisaun, harahun dadaun prinsípius bazikas demorakrasia ni’an, lakon etika polítika, mais pior lakon moral polítika atu dezenvolve nasaun tuir dalan Estado de Direito Democrático.

Prezidente-da-Repúblika, Tribunal, Parlamentu Nasional no Governu hamutuk kontra ita-nia Konstituisaun, halo persegisaun organizadu no sistimatiku hodi hasoru sira-nia adversáriu, no husik lisaun asalta poder núdar prátika demokrasia foun iha Paíz Democrático.

Deputadu CNRT aguarda hela pedidu fiskalizasaun abstrata e susesiva constitusionslidade ba TR liga ho artigo 15, no. 2 e artigo 16- B RPN  mesmo ami pesimista ho keixa ne’ebé ami hato’o ba Tribunal Rekursu. Ami hein katak, dala ida-ne’e Tribunal Rekursu sei tama dunik ba substánsia de matéria husi rekursu atu pronúnsia sira-nia obrigasaun tuir Konstituisaun no lei haruka.

Atu hakotu, Bancada CNRT iha Parlamentu Nasional afirma, no foti pozisaun firmi hodi kontinua luta hasoru sé deit mak ignora no lakohi atu kumpri Konstituisaun da RDTL, ami sei halo esforsu tomak hodi harii hikas sosiedade demcrático, sosiedade ida-ne’ebé halo tuir deit mak Konstituisaun no Lei sira, sosiedade ida-ne’ebé iha esperansa ba knaar justisa nian, no sosiedade ida-ne’ebé mak orgulho núdar Povo ba Repúblika Demokrátiku de Timor-Leste. (cao)

Please follow and like us:

NOTÍSIA FOUN

Site Statistics

  • Users online: 4 
  • Visitors today : 1,238
  • Page views today : 1,802
  • Total visitors : 81,905
  • Total page view: 114,930

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur