Notísia foun


DILI—Loron daruak funu hadau malu kadeira Prezidente Parlamentu Nasionál, rejulta kadeira iha meza Parlamentu Nasionál nian dudu rahun husi deputadu sira no polísia halo ona intervensaun hodi hakalma situasaun.

Situasaun ne’e hahú mosu iha oras maizumenus tuku 9:00, Tersa (19/05/2020), bainhira Vise Prezidente Parlamentu Nasionál Maria Angelina kontinua hakat ba atu lidera plenária, maibé deputadu sira husi bankada CNRT nian la permite tanba konsidera ajenda ne’e viola rejimentu PN tanba Vise sira la hetan delegasaun kompeténsia husi Prezidente Parlamentu Nasionál Arão Noe.

Observasaun Timor Post haktuir, deputadu ida-idak mantein nia pozisaun hodi defende argumentu, hakilar malu ho sériu tebes, baku meza, no malu hodi halo meza ne’ebé Prezidente Parlamentu Nasionál túr ba monu no nakfera.

Polísia sira ne’eb’e fó seguransa iha Parlamentu Nasionál hola ona pozisaun iha área meza Parlamentu Nasionál hodi haruka deputadu sira tún hotu ba sala plenária ne’ebé deputadu sira túr ba, maibé deputadu sira kontinua hakilar malu ho sériu tebes.

Deputadu husi bankada CNRT, José Virgílio sempre fó viva ba Konstituisaun Repúlika Demokrátika Timor Leste. No Deputadu sira husi parte PLP mós defende rajaun katak saida mak sira halo la viola Konstituisaun.

Situasaun ne’e mosu hahú kedas bainhira deputadu sira husi Bankada FRETILIN, PLP ho KHUNTO aprejenta pedidu destituisaun (troka) Prezidente Parlamentu Nasionál Arão Noe ho rajaun abandona atividade Parlamentu Nasionál.

Entretantu molok situasaun ne’e mosu, Prezidente Parlamentu Nasionál Arão Noe, iha loron Segunda (18/05/2020), iha oras tuku 9:00 organiza kedas konferénsia ba imprensa hodi kondena maka’as tentativa hadau Prezidente Parlamentu nia Poder ne’ebé halo husi Vise Prezidente Parlamentu Deputada Maria Angelina Lopes Sarmento.

Aktu sira ne’ebe konsidera nudar tentativa hadau poder maka hanesan tuir mai ne’e:

  1. Iha loron 13 Maiu 2020 Bankada Fretilin, PLP, no Khunto dirije Rekerimentu Distituisaun Prezidente Parlamentu Nasional ba fali Vise Prezidente Parlamentu Nasional. Aktu ida ne’e Viola KRDTL Artigu 99 (3), Rejimentu Parlamentu Nasional Artigu 17 kona-ba Kompetensia Prezidente Parlamentu Nasional.
  2. Konstituisaun Artigu 99 (3) hateten momoos katak Parlamentu Nasional Reuni Ordinariamente tuir Konvokasaun Prezidente Parlamentu nian. Tanba ne’e Vise Prezidente Parlamentu Maria Angelina Lopes Sarmento nia aktu sira ne’e viola KRDTL, LOFAP, Kodigu Penal, no Rejimentu Parlamentu Nasional.
  3. Vise PPN Maria Angelina Lopes Sarmento Obriga Xefe Divizaun Apoiu Plenaria ka DIPLEN, Sr. Quintiliano Ase atu ajenda no prepara material ba plenária iha loron 18 Maiu 2020. Aktu ida ne’e viola Rejimentu Parlamentu Nasional Artigu 22 kona-ba kompetensia Vise Prezidente Parlamentu Nasional nian. Vise Prezidente Parlamentu Nasional so bele ezerse PPN nia funsaun bainhira hetan delegasaun kompetensia husi PPN tuir Rejimentu Artigu 22 nu. 3
  4. Tuir prosedimentu normal iha Parlamentu Nasional, Prezidente Parlamentu maka iha kompetensia atu konvoka Konferensia Lideres Bankada hodi aprova ajenda ba plenária.
  5. Bainhira Lideres Bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mos laiha.
  6. Xefe DIPLEN konsidera katak prosesu ne’ebe Vise Prezidente Parlamentu Nasional Maria Angelina Sarmento halo ne’e kontra aktu normal funsionamentu Parlamentu Nasional, nune’e devolve fila fali despaixu refere ba Gabinete Vise Prezidente nian.
  7. Tanba la konsege Obriga DIPLEN, Vise Prezidente Parlamentu Maria Angelina Lopes Sarmento halo despaixu ba Sekretariu Jeral atu ajenda Plenaria ba loron 18 Maiu 2020.
  8. Sekretariu Jeral Parlamentu Nasional Divolve Despaixu husi Vise Prezidente Parlamentu Nasional tanba Konsidera despaixu refere Kontra LOFAP Artigu 7.

LOFAP Artigu 7 hateten katak tenke iha delegasaun kompetensia husi Prezidente ba Vise Prezidente Parlamentu por eskrita antes Vise Prezidente bele toma funsaun Prezidente Parlamentu nian.

Aktu sira ne’e konsidera nudar hahalok hadau poder ne’ebe kontra Konstituisaun da Republika, Kodigu Penal, Rejimentu Parlamentu Nasional no Lei Organizasaun Funsionamentu Administrasaun Parlamentar.

Prezidente Parlamentu REAFIRMA katak Bazeia ba KRDTL Artigu 86 (f), Parlamentu Nasional hein DISOLUSAUN husi Prezidente da Republika. Prezidente Parlamentu Firme hodi defende KRDTL tuir Artigu 2 (2) katak Estadu Hakruuk ba Konstituisaun no Lei Oan sira. Prezidente Parlamentu husu ba ITA HOTU atu Hakruuk no Kumpre KRDTL.

Entretantu tuir observasaun Timor Post iha Uma Fukun Parlamentu Nasionál, seguransa kontroladu husi Polísia Nasionál Timor Leste. (cao)

Please follow and like us:

Site Statistics

  • Users online: 8 
  • Visitors today : 779
  • Page views today : 946
  • Total visitors : 84,626
  • Total page view: 118,753

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur