Notísia foun


DILI—Vise Prezidente Parlamentu Nasionál (VPPN) Maria Angelina duni sai husi deputadu sira CNRT nian husi sala plenária Parlamentu Nasionál tanba tenta okupa kadeira Prezidente Parlamentu Nasionál Arão Noe nian hodi lidera sesaun kona-ba pedidu destituisaun (troka) Prezidente Parlamentu Nasionál.

Observasaun Timor Post haktuir, deputadu no deputada sira husi CNRT haruka obrigatóriu deputada Angelina sai husi meza Parlamentu Nasionál nian no dudu malu to’o odamatan ba parte loromonu nian.

Haree ba asaun ne’e, deputadu sira husi FRETILIN, PLP no KHUNTO nian ba sata netik maibé deputada Angelina konege dudu sai husi odamatan ba liur no tama fila fali ba sala laran hodi kontinua dudu malu.

Membru polísia  sira fó seguransa iha sala plenária haree de’it situasaun ne’e ho rajaun imunidade deputadu sira nian, maibé kontinuna matein atu ema seluk labele tama iha klaran hodi estraga liu tan situasaun no hamonu krime.

Liu minutu hirak nia laran situassaun ne’e hahú hakmatek hikas tanba deputadu sira ida-idak fahe malu, balu sai ba liur, seluk kontinua mantein iha sala plenária no deputadu CNRT, José Virgílio Rodrigues Ferreira kontinua asegura kadeira Prezidente Parlamentu Nasionál atu Vise Prezidente Maria Angelina ho Luis Roberto labele ba okupa.

Situasaun ne’e marka istória dahuluk liu iha Timor Leste, iha Parlamentu Nasionál funu entre reprejentante povu sira ba poder polítiku maka’as tebes.

Tensaun hahú mosu bainhira deputadu sira husi bankada FRETILIN, PLP ho KHUNTO aprejenta pedidu destituisaun (troka) Prezidente Parlamentu Nasionál Arão Noe, maibé hetan rejeisaun tanba konsidera rajaun ne’ebé proponente sira hato’o laiha fundamentu tanba akuja Prezidente Parlamentu Nasionál abandona atividade iha Parlamentu Nasionál.

Entretantu molok situasaun ne’e mosu, Prezidente Parlamentu Nasionál Arão Noe, iha loron ne’e, iha oras tuku 9:00 organiza kedas konferénsia ba imprensa hodi kondena maka’as tentativa hadau Prezidente Parlamentu nia Poder ne’ebé halo husi Vise Prezidente Parlamentu Deputada Maria Angelina Lopes Sarmento.

Aktu sira ne’ebe konsidera nudar tentativa hadau poder maka hanesan tuir mai ne’e:

  1. Iha loron 13 Maiu 2020 Bankada Fretilin, PLP, no Khunto dirije Rekerimentu Distituisaun Prezidente Parlamentu Nasional ba fali Vise Prezidente Parlamentu Nasional. Aktu ida ne’e Viola KRDTL Artigu 99 (3), Rejimentu Parlamentu Nasional Artigu 17 kona-ba Kompetensia Prezidente Parlamentu Nasional.
  2. Konstituisaun Artigu 99 (3) hateten momoos katak Parlamentu Nasional Reuni Ordinariamente tuir Konvokasaun Prezidente Parlamentu nian. Tanba ne’e Vise Prezidente Parlamentu Maria Angelina Lopes Sarmento nia aktu sira ne’e viola KRDTL, LOFAP, Kodigu Penal, no Rejimentu Parlamentu Nasional.
  3. Vise PPN Maria Angelina Lopes Sarmento Obriga Xefe Divizaun Apoiu Plenaria ka DIPLEN, Sr. Quintiliano Ase atu ajenda no prepara material ba plenária iha loron 18 Maiu 2020. Aktu ida ne’e viola Rejimentu Parlamentu Nasional Artigu 22 kona-ba kompetensia Vise Prezidente Parlamentu Nasional nian. Vise Prezidente Parlamentu Nasional so bele ezerse PPN nia funsaun bainhira hetan delegasaun kompetensia husi PPN tuir Rejimentu Artigu 22 nu. 3
  4. Tuir prosedimentu normal iha Parlamentu Nasional, Prezidente Parlamentu maka iha kompetensia atu konvoka Konferensia Lideres Bankada hodi aprova ajenda ba plenária.
  5. Bainhira Lideres Bankada sira aprova ona ajenda maka Prezidente halo despaixu ba DIPLEN prepara ajenda ba plenária, se laiha reuniaun líder bankada maka plenária mos laiha.
  6. Xefe DIPLEN konsidera katak prosesu ne’ebe Vise Prezidente Parlamentu Nasional Maria Angelina Sarmento halo ne’e kontra aktu normal funsionamentu Parlamentu Nasional, nune’e devolve fila fali despaixu refere ba Gabinete Vise Prezidente nian.
  7. Tanba la konsege Obriga DIPLEN, Vise Prezidente Parlamentu Maria Angelina Lopes Sarmento halo despaixu ba Sekretariu Jeral atu ajenda Plenaria ba loron 18 Maiu 2020.
  8. Sekretariu Jeral Parlamentu Nasional Divolve Despaixu husi Vise Prezidente Parlamentu Nasional tanba Konsidera despaixu refere Kontra LOFAP Artigu 7.

LOFAP Artigu 7 hateten katak tenke iha delegasaun kompetensia husi Prezidente ba Vise Prezidente Parlamentu por eskrita antes Vise Prezidente bele toma funsaun Prezidente Parlamentu nian.

Aktu sira ne’e konsidera nudar hahalok hadau poder ne’ebe kontra Konstituisaun da Republika, Kodigu Penal, Rejimentu Parlamentu Nasional no Lei Organizasaun Funsionamentu Administrasaun Parlamentar.

Prezidente Parlamentu REAFIRMA katak Bazeia ba KRDTL Artigu 86 (f), Parlamentu Nasional hein DISOLUSAUN husi Prezidente da Republika. Prezidente Parlamentu Firme hodi defende KRDTL tuir Artigu 2 (2) katak Estadu Hakruuk ba Konstituisaun no Lei Oan sira. Prezidente Parlamentu husu ba ITA HOTU atu Hakruuk no Kumpre KRDTL.

Entretantu tuir observasaun Timor Post iha Uma Fukun Parlamentu Nasionál, seguransa kontroladu husi Polísia Nasionál Timor Leste. (cao)

Please follow and like us:

NOTÍSIA FOUN

Site Statistics

  • Users online: 5 
  • Visitors today : 1,223
  • Page views today : 1,837
  • Total visitors : 71,229
  • Total page view: 98,331

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur