Notísia foun


DILI—Sekretáriu Estadu Juventude no Desportu (SEJD), Nélio Isaac Sarmento kumpri desizaun nia partidu CNRT ne’ebé deklara ofisialmente sai husi governu daualu.

Nélio hatete, nia parte la komenta kona-ba desizaun ne’ebé fó sai ona husi Konsellu Polítika Nasionál (CPN sigla Portugués), iha loron Segunda (11/05/2020), iha Sede Nasionál Partidu CNRT, Bairro dos Grilhos, Dili.

Ba Timor Post, Nélio hatete, respeita nafatin Taur Matan Ruak nu’udar Primeiru Ministru ba governu daulu maibé mós la husik monu ba rai desizaun nia partidu nian.

“Atu ko’alia saida hotu ona, ohin desizaun partidu fó sai ona no ko’alia tia ona ba ita boot sira entaun loos ona, hotu ona” Nélio hatutan. “Ha’u fó ezemplu ki’ik de’it ba ita boot hanesan ne’e, ha’u mak komadante ita boot ha’u nia anakbuah entaun komadante foti desizaun hanesan ne’e entaun ita mós tuir hotu,” Nélio subliña.

Entretantu CPN-CNRT, fó opsaun rua ba nia membru sira iha governu daualu lideradu Primeiru Ministru Taur Matan Ruak. Opsaun rua ne’e mak hanesan, rejigna ou mantein automátikamente la pretense ona ba partidu.

Opsaun rua ne’e fó sai liuhusi konferénsia ba imprensa, Segunda (11/05/2020), iha Sede Nasionál Partidu CNRT, iha Bairro dos Grilhos, Dili, ne’ebé lidera husi Vise Prezidente CNRT, Virgílio Smith ho Adjuntu Sekretáriu Jerál, Jacinto Rigoberto.

CNRT foti desizaun ne’e tanba konsidera iha manobra polítiku hahú kedas husi formasaun governudaualu ne’ebé Prezidente Repúblika Francisco Guterres Lú Olo la fó posse ba membru governu na’in-7 husi CNRT no kontinua mosu manobra polítiku iha desizaun Xefe Estadu nian ba prosesu formasaun governu dasia.

Maske nune’e, CNRT ezije nafatin ba Lú Olo atu kumpri nia orientasaun hodi hakotu impase polítika no bazeia ba nia orientasaun ho pontu tolu ne’ebé fó sai ona dia 10/02/2020. No kumpri konstituisaun no lei sira kona-ba legalidade governu daualu no formasaun governu foun.

CNRT tau kestaun ba legalidade governu daualu hafoin CNRT retira ona, laiha ona maioria iha governu daualu tanba iha aliansa ba forma governu ne’e hela deit PLP ho KHUNTO ho kadeira 13 deit. Nune’e, maske rona katak FRETILIN atu fó apoiu no nia membru sira atu tama tan iha governu daualu, maibe tenke liuhusi formasaun governu foun alias governu dasia.

“Tanba CNRT sai tiha ona husi governu, PLP ho KHUNTO la reprejenta legalmente maioria parlamentar,” Vise Prezidente CNRT, Virgílio Smith afirma liuhusi konferénsia ba imprensa, iha loron 11/05/2020, iha Sede Nasionál CNRT, Bairro dos Grilhos, Dili.

“CNRT hein katak, partidu tolu, FRETILIN, PLP ho KHUNTO sei halao ida-idak nia konferénsia nasional atu halao koligasaun foun ho difinisaun klara,” Virgílio subliña.

No husu ba Primeiru Ministru Taur Matan Ruak tenke retira husi Primeiru Ministru hodi nune’e bele iha fali indizitasaun foun husi koligasaun foun husi FRETILIN, PLP ho KHUNTO. (jmy)

Please follow and like us:

NOTÍSIA FOUN

Site Statistics

  • Users online: 2 
  • Visitors today : 824
  • Page views today : 1,158
  • Total visitors : 198,875
  • Total page view: 287,491

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur