Notísia foun


DILI—Argumentu sira husi deputadu bankada FRETILIN, PLP ho KHUNTO iha pedidu destituisaun ba Prezidente Parlamentu Nasionál Arão Noe bainhira laiha fundamentu polítika no jurídiku maka hetan rejeisaun, laiha dalan ba Vise Prezidente Parlamentu Nasionál atu lidera meza ba assuntu refere.

Viseprezideti Bankada Partidu CNRT, Patrocínio Fernandes dos Reis, afirma, bainhira Vise Prezidente Parlamentu sira obriga-an maka sira komete aktu asaltu poder, i ne’e labele eziste iha Timor Leste.

“Rejimentu la fó dalan ba vise-prezidente sira lidera parlamentu nasionál. Sé ida-ne’e mak akontese duni ami bolu asalta podér,”atual viseprezidenti Bankada CNRT hatete ba Jornalista sira iha Uma Fukun Parlamentu Nasionál, Sesta (08/05/2020).

Ho difikuldade ida ne’e ba partidu tolu, Patrocínio husu di’ak liu FRETILIN hanesan partidu boot ho kadeira 23 iha parlamentu, labele obriga-an involve iha asaun kontra bandu sira hanesan hatudu dadauk sinál iha parlamentu nasionál no tama iha governun daualu ne’ebé hatudu de’it tama arbiru iha ema seluk nia kuartu laran.

“FRETILIN hakarak atu ba ukun di’ak liu ba halo koaligasaun foun para forma IX Governu, FRETILIN laiha dalan atu tama VIII Governu,” Patrocínio afirma.

Maske nune’e, Viseprezidente Bankada PLP Francisco Vasconselhos, antes ne’e hatete, pedidu destituisaun ne’ebé FRETILIN, PLP ho KHUNTO aprejenta ona ba Prezidente Parlamentu Nasionál tuir Rejimentu Parlamentu Nasional artigu 16-B.

Francisco dehan, rajaun sira iha pedidu destituisaun ne’e haktuir, husi tinan-2018 to’o ohin loron, Parlamentu Nasional seidauk konsege finaliza lei importante no nesesariu sira hanesan, ezemplu ida, Lei Anti Korupsaun. Parlamentu la konsege finaliza Lei importante ida ne’e liu tinan rua ona, tanba inkapasidade prezidente parlamentu nian atu haka’as-an no lidera hodi garante parlamentu funsiona ho normal no funsiona ho di’ak.

“Tamba nu’udar membru parlamentu, ami lakon ona komfiansa ba Sr. Arão Noe nu’udar Prezidente Parlamentu Nasionál,” Francisco hatete.

Jurista Senior Timoroan Amu Júlio Crispin esplika, pedidu destituisaun ba meza parlamentu nasionál tenke iha rajaun polítika no jurídika konstitusionál. Sé la ho rajaun rua ne’e maka pedidu ne’e konsideradu individamente ka la fundamentada.

Tanba ne’e, bainhira Prezidente Parlamentu simu pedidu ne’e no halo verifikasaun katak viola ka lae regularidade rejimental sira tuir artigu 17 (e) Rejimentu Parlamentu Nasionál (RPN). Nune’e mós Prezidente Parlamentu Nasionál sei verifika mós rajaun dívidamente katak rajaun ne’e polítiku de’it ka fundamentu ne’e jurídiku mós. Husi ne’e maka Prezidente Parlamentu Nasionál foin bele desidi rejeita ka lae dívida ida ne’e.

“Prezidente parlamentu bele rejeita pedidu ida ne’e hodi dehan katak pedidu ida ne’e la verifika regularidade rejimental no mós bele dehan katak pedidu ida ne’e laiha rajaun dívidamente fundamentada jurídikamente i konstitusionalmente,” Amu Crispin subliña ba Timor Post via telefone, Sesta (08/05/2020).

Bainhira ida ne’e akontese maka, Amu Cispin dehan, laiha ona dalan ba deputadu 1/5 ne’ebé prosesa pedidu destituisaun ba Prezidente Parlamentu Nasionál iha lejislatura ida ne’e.

Amu Crispin fundamenta argumentu ne’e ho baze ba norma sira ne’ebé vigora ona inklui artigu 16 (B), ne’ebé bainhira tama iha konflitu i la responde ba validade da norma ho fundamentu iha konstituisaun entaun interisadu sira ne’ebé maka afeta gravemente ba ninia dignidade pesoal no institusionál, nia bele husu ba tribunál atu halo fiskalizasaun kongkreta. Katak, normal ne’e konstitusionalmente válidu ka lae, hanesan haktuir ho forsa konstituisaun iha artigu 152.

Nune’e, Amu Crispin dehan, norma sira ne’e sé mak iha forsa atu hatama, haree husi artigu 150, iha kazu ne’e Prezidente Parlamentu Nasionál bele hatama ou deputadu 1/5 ka liu bele prosesa ba tribunál. Katak, bele husu fiskalizasaun abstrata no bele husu fiskalizasaun kongkreta ba normas jurídika sira ne’ebé maka vigora hela.

Tanba ne’e, Amu Crispin dehan, destituisaun ne’ebé FRETILIN, PLP ho KHUNTO halo ne’e, Prezidente Parlamentu Nasionál bele halo petisaun ba tribunál ho forsa artigu 48 konstituisaun. Tanba ligadu ba material konstitusional, direitu pesoal ho interese jeral sira.

“Ne’e iha konflitu interese ne’ebé kria konflitu ba parte ida,” Amu Crispin konsidera. (flo)

Please follow and like us:

NOTÍSIA FOUN

Site Statistics

  • Users online: 0 
  • Visitors today : 189
  • Page views today : 260
  • Total visitors : 80,856
  • Total page view: 113,388

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur