Notísia foun


DILI—Konsellu Polítika Nasionál (CPN sigla Portugués) desidi fó konfiansa tomak ba Prezidente Partidu CNRT, Kayrala Xanana Gusmão atu foti desizaun ba solusaun sira durante impase polítika iha rai laran.

“CPN entrega hotu on aba Prezidente Partidu Maun Boot Kayrala Xanana Gusmão maka iha kompeténsia tomak atu ko’alia, atu hola desizaun saida de’it iha Prezidente Partidu nia liman,” Vise Prezidente CNRT, Virgilio Smith afirma liuhusi konferénsia ba imprensa, Kuarta (06/05/2020), iha Sede Sentral CNRT, Bairro dos Grilhos, Dili.

CPN foti desizaun ne’e relasiona ho deputadu sira husi bankada CNRT realiza konferénsia imprensa iha loron Tersa (05/05/2020) iha sala Bankada CNRT iha Parlamentu Nasionál, hodi husu ba Prezidente Repúblika Francisco Guterres Lú Olo bolu tan FRETILIN hodi túr hamutuk ba hakotu impase polítika iha rai laran.

CPN konsidera deklarasaun husi deputadu CNRT sira nian hanesan atus individuál no la reprejenta partidu nia pozisaun.

Nune’e, Virgilio akompaña husi Adjuntu Sekretáriu Jerál CNRT, Jacinto Rigoberto ho membru sira seluk reprejenta CPN reafirma katak, CPN mantein ho desizaun iha loron 30/04/2020 fó apoiu tomak no autoriza Prezidente Partidu CNRT atu reprejenta CPN no partidu hodi hola medida no desizaun kona-ba situasaun polítika atuál.

Nune’e mós reafirma pozisaun CPN nian apoiu tomak ba petisaun ne’ebé hatama ona ba Supremu Tribunál Justisa/Tribunál Rekursu iha loron 5/05/2020.

CNRT liuhusi Advogadu Privadu Manuél Tilman ho Miguel Faria lori ona prosesu liga ho desizaun sira durante ne’e Prezidente Repúblika Francisco Guterres Lú Olo foti liga ho situasaun polítika iha rai laran ne’ebé konsideradu hamosu violasaun klara i grave ba obrigasaun konstitusional tuir artigu 79 (2).

Prosesu ne’e hanaran petisaun inisiál ba Tribunál Rekursu atu husu fiskalizasaun ba Tribunál Rekursu atu deklara katak iha duni violasaun klara ka la’e prinsípiu konstitusionais, liuliu liga ho desizaun la fó posse ba membru governu sira husi CNRT no prosesu sira to’o indizitasaun Primeiru Ministru ba governu dasia ne’ebé prezidente repúblika nonok tiha de’it iha dalan klaran.

Antes ne’e mós Xanana afirma, atu defende lia loos no kaer metin nafatin estadu direitu demokrátiku maka prosesu ne’e lori ba tribunál rekusru.

“CNRT buka atu hatudu responsabilidade ba nasaun. Ita iha hela krize institusional,” Xanana hatete.

Xanana subliña istória sira harii governu Aliansa Mudansa ba Progresu (AMP) lideradu Taur Matan Ruak no hafoin eleisaun antesipada iha Parlamentu Nasionál mosu fali Aliansa Maioria Parlamentár ne’ebé haforsa governu daualu.

Xanana mós ko’alia kona-ba rajaun sira CNRT xumba Orsamentu Jerál Estadu (OJE) 2020, tanba la konforma ho normas, sistema finanseiru no ejekusaun.  Tanba ne’e, bainhira OJE xumbadu primeiru ministru rasik dehan governu AMP laiha ona. Nune’e, Prezidente Repúblika hola medida sira halo diálogu no iha solusaun tolu katak, últimu rekursu mak eleisaun antesipada, tuir halo movimentasaun polítika no mantein primeiru ministru governu daualu.

Xanana mós haktuir prosesu sira kontinuasaun to’o mosu koligasaun foun ida ne’ebé forma husi CNRT, KHUNTO, PD, UDT, FM ho PUDD, maibé ikus mai prezidente repúblika husik tia de’it prosesu hirak ne’e iha dalan klaran. (cao)

Please follow and like us:

NOTÍSIA FOUN

Site Statistics

  • Users online: 1 
  • Visitors today : 425
  • Page views today : 577
  • Total visitors : 78,936
  • Total page view: 110,644

PUBLISIDADE

KLIK IHA NE'E

KLIK IHA LOGO CNRT: Kayrala Xanana Gusmão Hakerek Karta ba Maijor Jeneral Lere Anan Timur